France Riots News: યુરોપિયન દેશ ફ્રાન્સમાં વધતી જતી મોંઘવારી અને જાહેર સેવાઓની કથળતી સ્થિતિને લઈને શરૂ થયેલા વિરોધ પ્રદર્શનોએ હવે અત્યંત હિંસક અને ભયાનક સ્વરૂપ ધારણ કરી લીધું છે. પેરિસ, માર્સેલી, લ્યોન અને લિમોજ સહિતના અનેક પ્રમુખ શહેરોમાં રમખાણો, આગજની અને મોટા પાયે લૂંટફાટની ઘટનાઓ સામે આવી છે. દેશમાં કાયદો અને વ્યવસ્થા સંપૂર્ણપણે ખોરવાઈ જતાં ફ્રેંચ સરકારે સ્થિતિ પર કાબૂ મેળવવા માટે સુરક્ષા બંદોબસ્ત અત્યંત સખત બનાવી દીધો છે.
સ્થાનિક સ્તરે કરફ્યુનો આદેશ અને ઇમરજન્સીની ચેતવણી
સ્થિતિની ગંભીરતાને ધ્યાનમાં રાખીને ફ્રાન્સના વડાપ્રધાન સેબેસ્ટિયન લેકોર્નુએ સોમવારે મહત્વની જાહેરાત કરી હતી. તેમણે સ્થાનિક તંત્ર અને નગરપાલિકાઓને હિંસા પ્રભાવિત વિસ્તારોમાં સીમિત અને આંશિક કરફ્યુ (Curfew) લાગુ કરવા માટે આદેશ આપ્યો છે.
આ સાથે જ વડાપ્રધાને સ્પષ્ટ સંકેત આપ્યા છે કે જો પરિસ્થિતિ વધુ વણસશે તો સરકાર પાસે સમગ્ર દેશમાં 'ઇમરજન્સી' (State of Emergency - કટોકટી) જાહેર કરવાનો વિકલ્પ ખુલ્લો છે. તેમણે જણાવ્યું હતું કે- જો સ્થિતિ માંગ કરશે અને શાંતિ પુનઃસ્થાપિત કરવા માટે જરૂરી જણાશે, તો અમે ઇમરજન્સી લાગુ કરવાથી પાછળ નહીં હટીએ.
2400થી વધુની ધરપકડ, 70% પુખ્ત વયના
અધિકારીઓ અને એપી (AP)ના અહેવાલ મુજબ, શનિવાર અને રવિવાર દરમિયાન દેશભરમાંથી 2400થી વધુ હિંસક વિરોધકર્તાઓની ધરપકડ કરવામાં આવી છે. ફ્રાન્સના ન્યાય મંત્રી ગેરાર્ડ ડારમેનિને જણાવ્યું હતું કે વીકેન્ડ દરમિયાન 2330થી વધુ લોકોને પોલીસ કસ્ટડીમાં લેવાયા છે, જેમાં આશરે 70 ટકા લોકો પુખ્ત વયના છે.
તોફાની તત્વો અને દંગાખોરોના ટોળાઓએ સરકારી ઈમારતો, સિટી હોલ, બેંકો અને સેંકડો ખાનગી શોરૂમ કે દુકાનોમાં તોડફોડ કરી લૂંટફાટ ચલાવી છે. અનેક જગ્યાએ વાહનો અને જાહેર મિલકતોને સળગાવી દેવામાં આવી છે.
સરકારે માન્યું- 'અમે સ્થિતિનો અંદાજ લગાવવામાં નિષ્ફળ રહ્યા'
આ ભયાનક અશાંતિ વચ્ચે ફ્રેંચ સરકારે જાહેરમાં સ્વીકાર કર્યો છે કે તેઓ શરૂઆતમાં આ વિરોધ પ્રદર્શન કેટલું ઉગ્ર સ્વરૂપ લેશે તેનો સાચો અંદાજ લગાવવામાં નિષ્ફળ રહ્યા હતા. બીજી તરફ, રાષ્ટ્રપતિ ઇમ્મેન્યુઅલ મેક્રોને સુરક્ષા વ્યવસ્થામાં થયેલી મોટી ચૂક અંગે સમીક્ષા બેઠકના આદેશ આપ્યા છે. આ દરમિયાન આંતરિક બાબતોના મંત્રી લોરેન્ટ નુનેજે રાજીનામું આપવાની રજૂઆત કરી હતી, પરંતુ રાષ્ટ્રપતિ મેક્રોને તેમનું રાજીનામું અસ્વીકાર કરી દીધું છે.
વિદેશી પ્રવાસીઓ માટે ટ્રાવેલ એડવાઈઝરી જાહેર
ફ્રાન્સમાં ફાટી નીકળેલી આ હિંસાને પગલે અનેક યુરોપિયન દેશો અને વિશ્વના અન્ય રાષ્ટ્રોએ પોતાના નાગરિકો માટે ટ્રાવેલ એડવાઈઝરી (Travel Advisory) જારી કરી દીધી છે. પ્રવાસીઓને ફ્રાન્સના મુખ્ય શહેરો, ભીડભાડ વાળા વિસ્તારો અને વિરોધ પ્રદર્શનવાળી જગ્યાઓથી દૂર રહેવાની કડક સલાહ આપવામાં આવી છે.
સરકારે વચન આપ્યું છે કે પોલીસ વ્યવસ્થા અને તપાસ પ્રક્રિયામાં મોટા ફેરફારો કરીને હિંસા ભડકાવવા માટે જવાબદાર તમામ મુખ્ય સૂત્રધારોને વહેલી તકે કાયદાના શિકંજામાં લાવવામાં આવશે.