ફ્લાયદુબઈની ફ્લાઇટમાં ડ્રામા, પાયલોટો વચ્ચે ખેલાયો ખૂની ખેલ અને અચાનક એક્ટિવ થયો હાઇજેકનો કોડ!

Flydubai Flight Emergency: દુબઈથી ઉડાન ભરેલી ફ્લાયદુબઈની આ ફ્લાઇટ જ્યારે આકાશમાં હતી, ત્યારે અચાનક તેનું રૂટ બદલવું પડ્યું અને તેને સાઉદી અરેબિયામાં ઇમરજન્સી લેન્ડિંગ કરાવવી પડી. ફ્લાઇટ ટ્રેકિંગ ડેટા અનુસાર, બોઇંગ 737 વિમાન આકાશમાં અચાનક ખૂબ જ ઝડપથી નીચે પડવા લાગ્યું. માત્ર બે મિનિટના ટૂંકા સમયગાળામાં જ વિમાન 34,000 ફૂટની ઊંચાઈથી સીધું ગગડીને 16,600 ફૂટ પર આવી ગયું, એટલે કે તે બે જ મિનિટમાં 17,400 ફૂટ નીચે આવી ગયું હતું. આ અચાનક બનેલી ઘટનાથી વિમાનમાં સવાર મુસાફરો અને અધિકારીઓમાં ભારે ગભરાટ ફેલાઈ ગયો હતો.

હાઇજેકનો '7500' કોડ અને જનરલ ઇમરજન્સી

જ્યારે વિમાન ખતરનાક રીતે જમીન તરફ નીચે આવી રહ્યું હતું, ત્યારે પાયલટો દ્વારા '7700' (જનરલ ઇમરજન્સી) કોડ મોકલવામાં આવ્યો હતો. આ કોડ મોકલ્યાના થોડા જ સમય બાદ તેને બદલીને '7500' કરી દેવામાં આવ્યો, જે એ વાતનો સ્પષ્ટ સંકેત આપે છે કે વિમાન પર કબ્જો થઈ ગયો છે અથવા તે હાઇજેક થઈ ચૂક્યું છે. આ સિગ્નલ મળતા જ દુનિયાભરમાં ખળભળાટ મચી ગયો કારણ કે હાઇજેક જેવા ગંભીર શબ્દે તમામ એજન્સીઓને એલર્ટ કરી દીધી હતી.

કોકપિટમાં પાયલટો વચ્ચે ખૂની ઝઘડો અને ચાકુબાજીનો દાવો

ઇઝરાયેલી મીડિયા અને સુરક્ષા અધિકારીઓ દ્વારા સામે લાવવામાં આવેલા તથ્યોએ સૌને ચોંકાવી દીધા. આ ઘટના પાછળ કોઈ બાહ્ય આતંકી હુમલો ન હતો, પરંતુ વિમાનના પોતાના જ બે પાયલટો વચ્ચે કોકપિટની અંદર થયેલી હિંસક ઝઘડો જવાબદાર હોવાનું સામે આવ્યું. 'ધ ટાઇમ્સ ઓફ ઇઝરાયેલ'ના અહેવાલ મુજબ, કોકપિટમાં કોઈ બાબતે થયેલા વિવાદમાં એક પાયલટ પર ચાકુ વડે હુમલો કરવામાં આવ્યો હોવાની વાત પણ સામે આવી હતી. એક અન્ય અહેવાલમાં એવું પણ દાવો કરવામાં આવ્યો હતો કે પાયલટોમાંથી કોઈ એક વિમાનને ક્રેશ કરીને આત્મહત્યા કરવા માંગતો હતો.

મુસાફરોની સૂઝબૂઝ અને ઇઝરાયેલની હિલચાલ

આ ખતરનાક પરિસ્થિતિમાં વિમાનની અંદર હાજર કેટલાક સાહસી ઇઝરાયેલી મુસાફરોએ ક્રૂ મેમ્બર્સની મદદ કરી અને હુમલાખોર પાયલટ પર કાબૂ મેળવ્યો. ફ્લાઇટમાં લગભગ 180 ઇઝરાયેલી મુસાફરો સવાર હતા. હાઇજેકનો સિગ્નલ મળતા જ ઇઝરાયેલમાં હડકંપ મચી ગયો અને તેલ અવીવ દ્વારા તાત્કાલિક પોતાના ફાઇટર જેટ આકાશમાં રવાના કરી દેવામાં આવ્યા. વડાપ્રધાન બેન્જામિન નેતન્યાહૂએ પણ તાત્કાલિક સુરક્ષા અધિકારીઓ સાથે બેઠક કરીને સ્થિતિ પર નજર રાખી હતી.

સુરક્ષિત લેન્ડિંગ અને વિમાનન સુરક્ષા પર સવાલો

અંતે, ભારે અસમંજસ અને ડર વચ્ચે આ વિમાનને સાઉદી અરેબિયાના તબૂક મિલિટરી અને સિવિલ બેઝ પર સુરક્ષિત રીતે ઉતારી લેવામાં આવ્યું. રાહતની વાત એ રહી કે આ સમગ્ર ઘટનામાં તમામ મુસાફરો અને ક્રૂ મેમ્બર્સ સંપૂર્ણપણે સુરક્ષિત બચી ગયા. વર્ષ 2020માં યુએઈ અને ઇઝરાયેલ વચ્ચે સંબંધો સામાન્ય થયા બાદ આ બંને દેશો વચ્ચે સતત કોમર્શિયલ ઉડાનો ચાલી રહી છે, પરંતુ આ પ્રકારની અસામાન્ય ઘટનાએ આંતરરાષ્ટ્રીય સ્તરે વિમાનન સુરક્ષા (Aviation Safety) અને પાયલટોની માનસિક સ્વાસ્થ્ય તપાસ સામે ગંભીર સવાલો ખડા કરી દીધા છે.