Flydubai Pilot Smit Machhar zayed ii award: UAEમાં ફ્લાયદુબઈના કેપ્ટન સ્મિત મચ્છરનું તેમના સાહસ અને ફરજ પ્રત્યેની જવાબદારી માટે સન્માન કરવામાં આવ્યું છે. ફ્લાઇટ FZ1073માં બનેલી ગંભીર ઘટના દરમિયાન 172 મુસાફરો અને ક્રૂના જીવ બચાવવામાં મહત્ત્વપૂર્ણ ભૂમિકા ભજવવા બદલ તેમને અને અન્ય ક્રૂ સભ્યોને ‘ફર્સ્ટ ક્લાસ ઓર્ડર ઓફ જાયદ II’થી નવાજવામાં આવ્યા છે. UAEના રાષ્ટ્રપતિ શેખ મોહમ્મદ બિન જાયદ અલ નાહયાને આ સન્માન આપ્યું છે.
કેપ્ટન સ્મિત મચ્છરને UAEમાં મોટું સન્માન
UAEના રાષ્ટ્રપતિ શેખ મોહમ્મદ બિન જાયદ અલ નાહયાને ફ્લાયદુબઈના કેપ્ટન સ્મિત મચ્છર અને ફ્લાઇટ FZ1073ના ક્રૂ સભ્યોને ‘ફર્સ્ટ ક્લાસ ઓર્ડર ઓફ જાયદ II’થી સન્માનિત કર્યા છે. વિમાનમાં સર્જાયેલી ગંભીર પરિસ્થિતિ દરમિયાન મુસાફરોની સુરક્ષા માટે તેમણે બતાવેલી હિંમત, જવાબદારી અને માનવજીવન બચાવવાના પ્રયાસોને ધ્યાનમાં રાખીને આ સન્માન આપવામાં આવ્યું છે. દુબઈના શાસક અને UAEના ઉપરાષ્ટ્રપતિ તથા વડાપ્રધાન શેખ મોહમ્મદ બિન રાશિદ અલ મક્તૂમ પણ હાજર રહ્યા હતા. તેમણે ક્રૂ સભ્યોની કામગીરીની પ્રશંસા કરી હતી અને મુસાફરોની સુરક્ષા માટે તેમની પ્રતિબદ્ધતાને બિરદાવી હતી.
172 મુસાફરોના જીવ જોખમમાં મુકાયા હતા
30 સપ્ટેમ્બરના રોજ દુબઈથી તેલ અવિવ જઈ રહેલી ફ્લાયદુબઈની ફ્લાઇટ FZ1073માં કોકપિટમાં ગંભીર ઘટના બની હતી. પરિસ્થિતિને ધ્યાનમાં રાખીને વિમાનને સાઉદી અરેબિયાના તબુક તરફ વાળવામાં આવ્યું હતું. આ ઘટનામાં કેપ્ટન સ્મિત મચ્છર ઘાયલ થયા હતા, પરંતુ ક્રૂ સભ્યો અને મુસાફરોએ મળીને સ્થિતિને કાબૂમાં લેવામાં મદદ કરી હતી. આખરે વિમાનનું સુરક્ષિત લેન્ડિંગ કરવામાં આવ્યું હતું અને તેમાં સવાર તમામ 172 મુસાફરો તથા ક્રૂ સભ્યો સુરક્ષિત બચી ગયા હતા.
UAEના નેતૃત્વએ ક્રૂની હિંમતને બિરદાવી
કેપ્ટન સ્મિત મચ્છર સારવાર લઈ રહ્યા હતા ત્યારે દુબઈના ક્રાઉન પ્રિન્સ શેખ હમદાન બિન મોહમ્મદ બિન રશિદ અલ મક્તૂમે પણ તેમની મુલાકાત લીધી હતી. તેમણે કેપ્ટનના સાહસ, ફરજ પ્રત્યેની નિષ્ઠા અને માનવજીવનની રક્ષા માટેના સમર્પણની પ્રશંસા કરી હતી.
શેખ હમદાને સોશિયલ મીડિયા પ્લેટફોર્મ X પર કેપ્ટન સ્મિત મચ્છર પ્રત્યે ગર્વ વ્યક્ત કર્યો હતો. તેમણે જણાવ્યું હતું કે કેપ્ટન મચ્છર દેશની ગૌરવપૂર્ણ કહાનીનો ભાગ છે અને તેમણે હિંમત, જવાબદારી તથા માનવજીવનની સુરક્ષાનું ઉત્તમ ઉદાહરણ પૂરું પાડ્યું છે.
કો-પાયલટના હુમલા બાદ પણ કેપ્ટને હિંમત ન હારી
UAEના અખબાર ‘ધ નેશનલ’ સાથેની વાતચીતમાં કેપ્ટન સ્મિત મચ્છરે ઘટનાને યાદ કરતાં જણાવ્યું હતું કે કોકપિટનો દરવાજો ખોલતાં પહેલાં કો-પાયલટે તેમના પર અનેક વખત હુમલો કર્યો હતો. જોકે, મુશ્કેલ પરિસ્થિતિ વચ્ચે પણ તેઓ કોકપિટનો દરવાજો ખોલવામાં સફળ રહ્યા હતા.
આ ઘટનામાં કેપ્ટન અને ક્રૂ સભ્યોએ બતાવેલી હિંમતને કારણે મુસાફરોની સુરક્ષા સુનિશ્ચિત કરવામાં આવી હતી. કેપ્ટન સ્મિત મચ્છરનું આ સન્માન વિમાન ઉડ્ડયન ક્ષેત્રમાં ફરજ પ્રત્યેની નિષ્ઠા અને સંકટના સમયે જવાબદારી નિભાવવાના મહત્ત્વને ઉજાગર કરે છે.