Donald Trump UNGA Speech Iran Warning: સંયુક્ત રાષ્ટ્ર મહાસભા (UNGA) ના સત્રને સંબોધિત કરતી વખતે અમેરિકી રાષ્ટ્રપતિ ડોનાલ્ડ ટ્રમ્પે ઈરાન સામે આકરું વલણ અપનાવતા સ્પષ્ટ શબ્દોમાં ચેતવણી આપી છે. તેમણે જણાવ્યું હતું કે અમેરિકા ઈરાનને કોઈપણ સંજોગોમાં પરમાણુ બોમ્બ વિકસાવવા દેશે નહીં, કારણ કે તે સમગ્ર વિશ્વ માટે મોટો ખતરો છે. જો ઈરાન અમેરિકા સાથે શાંતિ કરાર નહીં કરે, તો તેને ભારે વિનાશનો સામનો કરવો પડશે. ટ્રમ્પે અન્ય દેશોને પણ ઈરાનને આર્થિક રીતે અલગ-થલગ કરવામાં જોડાવા માટે આહ્વાન કર્યું હતું, જેથી આર્થિક દબાણ દ્વારા તેને વાટાઘાટોના ટેબલ પર લાવી શકાય.
પોતાની સિદ્ધિઓ ગણાવી અને આંતરરાષ્ટ્રીય મુદ્દાઓ પર પ્રહાર
પોતાના સંબોધન દરમિયાન ટ્રમ્પે વિશ્વભરમાં આઠ સંઘર્ષો અટકાવવાનો શ્રેય લીધો હતો—જેમાં 'ઓપરેશન સિંદૂર' દરમિયાન ભારતની સૈન્ય કાર્યવાહીનો પણ સમાવેશ થાય છે. આ ઉપરાંત ક્યુબાની મુક્તિ નજીક હોવાનો સંકેત આપતા ક્યુબા સામે પણ સૈન્ય કાર્યવાહી કરવાની શક્યતા દર્શાવી હતી. તેમણે આંતરરાષ્ટ્રીય ફોજદારી અદાલત (ICC) ને બિનજરૂરી ગણાવી ફગાવી દીધી હતી અને યુએન પર અતિ-ડાબેરી માનસિકતા ધરાવવાનો આરોપ મૂક્યો હતો. યુએનના વહીવટીતંત્ર પર પ્રહાર કરતા તેમણે અમેરિકાના યોગદાનમાં ૧૫ ટકાનો કાપ મુકવાની જાહેરાત કરી હતી, જેનાથી અંદાજે 4,000 જેટલા અમલદારશાહી પદો નાબૂદ થશે.
ઈરાની પ્રતિનિધિઓએ બહિષ્કાર કર્યો, બહાર વિરોધ પ્રદર્શન
ટ્રમ્પે જેવું ઈરાન સામે આકરા પગલાં લેવા અંગે બોલવાનું શરૂ કર્યું, તે સાથે જ હોલમાં હાજર ઈરાની પ્રતિનિધિમંડળના સભ્યો વોકઆઉટ કરી બહાર નીકળી ગયા હતા. સંયુક્ત રાષ્ટ્રના મુખ્યાલયની બહાર પણ ઈરાન-વિરોધી પ્રદર્શનકારીઓએ ઈરાનમાં સરમુખત્યારશાહીનો અંત લાવવાની માંગ સાથે દેખાવો કર્યા હતા.
વિશ્વના નેતાઓ સાથે યોજશે બેઠકો
પોતાના સંબોધન બાદ ટ્રમ્પ યુકે, જાપાન, યુક્રેન અને વેનેઝુએલા સહિત લગભગ 11 દેશોના શીર્ષ નેતાઓ સાથે દ્વિપક્ષીય અને સામૂહિક બેઠકો યોજવાના છે. ટ્રમ્પે આશા વ્યક્ત કરી હતી કે ઈરાન સાચો માર્ગ પસંદ કરીને શાંતિ કરાર પર હસ્તાક્ષર કરશે.