Captain Smit Machar First Video: દુબઈથી તેલ અવીવ જઈ રહેલી ફ્લાયદુબઈની ફ્લાઇટ (FZ1073)ના કોકપીટમાં થયેલા લોહિયાળ ઝઘડા બાદ ઘાયલ થયેલા ભારતીય કેપ્ટન સ્મિત મચ્છરને વધુ યોગ્ય સારવાર માટે ગુરુવારે અબુધાબી રિફર કરવામાં આવ્યા છે. આ દરમિયાન સ્મિતનો પહેલો વિડિયો સામે આવ્યો છે.
તાબુકમાં વિમાન લેન્ડ થયા બાદ સ્મિત મચ્છરને પ્રાથમિક સારવાર આપવામાં આવી હોવાનો એક વિડિયો સોશિયલ મીડિયા પર વાયરલ થઈ રહ્યો છે. આ ફૂટેજમાં સ્મિતને સ્ટ્રેચર પર વિમાનની બહાર લઈ જતા જોઈ શકાય છે અને તેમના શરીર પર અનેક ઘા સ્પષ્ટપણે નજરે પડી રહ્યા છે.
માતા-પિતા સાઉદી અરેબિયા જવા રવાના
હાલમાં કેપ્ટન સ્મિત મચ્છરની તબિયત સ્થિર હોવાનું જણાવવામાં આવી રહ્યું છે. સ્મિતના પરિવારના જણાવ્યા અનુસાર, તેમના માતા-પિતા તેમની સારવાર અને ખબર-અંતર પૂછવા માટે સાઉદી અરેબિયા રવાના થઈ ચૂક્યા છે. આ દરમિયાન, સાઉદી અરેબિયાએ આરોપી સહ-પાયલોટ વિરુદ્ધ પ્રાથમિક તપાસ શરૂ કરી દીધી છે, જે બાદ તેને આગળની કાર્યવાહી માટે યુએઈ (UAE)ને સોંપવામાં આવશે.
જે ઇમારતમાં સ્મિત મોટા થયા, ત્યાં આજે દરેકની આંખમાં ગર્વ અને દુઆ
મુંબઈના તિલક નગરની સોસાયટીમાં ગુરુવારે માહોલ ખૂબ જ ભાવુક હતો, જ્યાં કેપ્ટન સ્મિત મચ્છરે પોતાનું બાળપણ અને જીવનના ઘણા વર્ષો વિતાવ્યા છે. સાઉદી અરેબિયાના તાબુકમાં સારવાર કરાવી રહેલા સ્મિતના ઝડપથી સાજા થવાની કામના સાથે મોટી સંખ્યામાં લોકો તેમના આવાસની બહાર એકત્ર થયા હતા.
હાથમાં તિરંગા અને સ્મિતની તસવીરો લઈને લોકોએ તેમના સાહસને સલામ કરી અને તેઓ જલ્દી મુંબઈ પરત ફરે તેવી પ્રાર્થના કરી. પડોશીઓ અને બાળપણના મિત્રો માટે આ દિવસ ગર્વની સાથે-સાથે ચિંતાથી પણ ભરેલો રહ્યો.
શું હતી સમગ્ર ઘટના?
ઉલ્લેખનીય છે કે 30 સપ્ટેમ્બરે ફ્લાયદુબઈનું વિમાન દુબઈથી તેલ અવીવ જઈ રહ્યું હતું. ઉપલબ્ધ અહેવાલો મુજબ, ઉડાણ દરમિયાન કોકપીટમાં સહ-પાયલોટે કેપ્ટન સ્મિત પર ચાકુથી હુમલો કરી દીધો હતો. હુમલા બાદ વિમાન ઝડપથી નીચે આવ્યું હતું.
ઘાયલ હોવા છતાં સ્મિતે કોકપીટનો દરવાજો ખોલવામાં સફળતા મેળવી હતી. ત્યારબાદ ક્રૂ મેમ્બર્સ અને મુસાફરોએ કથિત હુમલાખોરને કાબૂમાં લીધો હતો. વિમાનને સાઉદી અરેબિયાના તાબુકમાં સુરક્ષિત રીતે ઉતારવામાં આવ્યું હતું. આ વિમાનમાં કુલ 174 લોકો સવાર હતા.
પડોશીઓ કરી રહ્યા છે બહાદુરીની ચર્ચા
આ દરમિયાન મુંબઈમાં સ્મિત મચ્છરના પડોશીઓ અને પરિચિતો વચ્ચે તેમની બહાદુરીની ચર્ચા થતી રહી. સ્મિતના જૂના પડોશી ડૉ. જનિત શાહે તેમને પ્રતિભાશાળી, શાંત સ્વભાવના અને સારા ઇન્સાન ગણાવ્યા. તેમણે કહ્યું કે તેઓ આ પરિવારને 10-15 વર્ષથી ઓળખે છે. બાળપણના મિત્ર પ્રતીક ગાંધીએ પણ સ્મિતના સંયમિત સ્વભાવને યાદ કર્યો. તેમણે જણાવ્યું કે ઘટનાની માહિતી મળ્યા બાદ પરિવાર અને પરિચિતોમાં ભારે ચિંતા ફેલાઈ ગઈ હતી.
ફડણવીસે ગણાવ્યા મુંબઈના દીકરા
મહારાષ્ટ્રના મુખ્યમંત્રી દેવેન્દ્ર ફડણવીસે પણ સ્મિતના સાહસ અને સૂઝબૂઝની પ્રશંસા કરી. તેમણે સ્મિતને મુંબઈનો દીકરો ગણાવતા તેમના પ્રત્યે સન્માન વ્યક્ત કર્યું. વડાપ્રધાન નરેન્દ્ર મોદીએ પણ પહેલી ઓક્ટોબરે સ્મિતના પરિવાર સાથે ફોન પર વાત કરી અને તેમના સાહસની પ્રશંસા કરી હતી.
તિલક નગરમાં એકત્ર થયેલા લોકોના ચહેરા પર ચિંતા સાથે ગર્વ પણ સ્પષ્ટ દેખાઈ રહ્યો હતો. કોઈએ તિરંગો પકડી રાખ્યો હતો તો કોઈના હાથમાં સ્મિતની તસવીર હતી. પડોશીઓ અને પરિચિતો માત્ર એક જ વાત કહી રહ્યા હતા - જે શહેરમાં સ્મિતે ઉડાન ભરવાનું સપનું જોયું અને જીવનનો મોટો ભાગ વિતાવ્યો, તે જ મુંબઈ આજે તેમના સ્વસ્થ થઈને પરત ફરવાની દુઆ કરી રહી છે.