California Highway Plane Crash: કેલિફોર્નિયાના સેન જોસ સ્થિત એક એક્સપ્રેસ-વે પર એક નાનું પ્લેન દુર્ઘટનાગ્રસ્ત થતા અફરાતફરી મચી ગઈ હતી. આ સમગ્ર ઘટના રસ્તા પર ઉભેલી એક કારના ડેશકેમમાં કેદ થઈ હતી. સદનસીબે આ બનાવમાં વિમાનમાં સવાર કે રોડ પર ઉભેલા કોઈપણ વ્યક્તિ સહિત કોઈ જાનહાનિ થઈ નથી.
અચાનક હાઈવે પર પટકાયું વિમાન
સોશિયલ મીડિયા પર સામે આવેલા ફૂટેજ અનુસાર, નાનું પ્રોપેલર વિમાન શનિવારે સેન જોસના કેપિટોલ એક્સપ્રેસ-વે અને એક્સ કેલિબર ડ્રાઇવના ચોકડી પાસે અત્યંત ઓછી ઊંચાઈએ અને તીવ્ર ખૂણે ઉડતું જોવા મળ્યું હતું. રસ્તાના કિનારેથી પસાર થતી વખતે વિમાનની પાંખ સ્ટ્રીટ લાઈટના થાંભલા સાથે જોરદાર રીતે અથડાઈને તૂટી ગઈ હતી.
પાંખ તૂટતા જ વિમાન અનિયંત્રિત થઈને પાક્કા રસ્તા પર ઊંધું થઈને પડી ગયું હતું, જેના કારણે વિમાનનો આગળનો ભાગ સંપૂર્ણ રીતે કચડાઈ ગયો હતો. આ ભયાનક અકસ્માત છતાં વિમાનમાં સવાર બે વયસ્કો અને એક બાળક સહિત ત્રણેય પ્રવાસીઓનો ચમત્કારિક બચાવ થયો છે.
સદનસીબે મોટી હોનારત ટળી હતી
સેન જોસ ફાયર ડિપાર્ટમેન્ટના જણાવ્યા અનુસાર, વિમાનમાં સવાર ત્રણેય લોકોને તકેદારીના ભાગરૂપે તાત્કાલિક સ્થાનિક હોસ્પિટલમાં ખસેડવામાં આવ્યા હતા. ડૉક્ટરોએ પુષ્ટિ કરી છે કે કોઈ પણ પ્રવાસીને જીવલેણ ઈજાઓ પહોંચી નથી. સદનસીબે, અત્યંત વ્યસ્ત રસ્તો હોવા છતાં અન્ય કોઈ વાહન આ અકસ્માતની ઝપેટમાં આવ્યું નહોતું, જેથી મોટી હોનારત ટળી હતી. અકસ્માત બાદ રસ્તા પર ઢોળાયેલા ઈંધણને સુરક્ષા કર્મચારીઓએ સાફ કરી દીધું હતું.
48 કલાકમાં બીજી વિમાન દુર્ઘટના
ઉલ્લેખનીય છે કે, સેન જોસમાં 48 કલાકના સમયગાળામાં વિમાન દુર્ઘટનાની આ બીજી ઘટના હતી. આ ઘટનાના એક દિવસ અગાઉ, શુક્રવારે રીડ-હિલવ્યૂ એરપોર્ટ પર લેન્ડિંગ દરમિયાન લેન્ડિંગ ગિયરમાં તકનીકી ખામી સર્જાવાને કારણે અન્ય એક નાનું વિમાન ક્રેશ-લેન્ડ થઈ ગયું હતું. ફાયર ડિપાર્ટમેન્ટ દ્વારા આપવામાં આવેલી માહિતી મુજબ, તે અકસ્માતમાં પણ વિમાનમાં સવાર બંને વ્યક્તિ સુરક્ષિત બહાર નીકળી આવ્યા અને ઈંધણ લીકેજ થયું નહોતું.