Japan Earthquake Today: મંગળવારે દક્ષિણ જાપાનમાં ભૂકંપના એક શક્તિશાળી આંચકાથી સમગ્ર વિસ્તાર ધ્રુજી ઊઠ્યો છે. સમાચાર એજન્સી રોયટર્સ અનુસાર, આ કુદરતી આફત બાદ તટીય વિસ્તારોમાં તાત્કાલિક અસરથી સુનામીનું એલર્ટ જાહેર કરી દેવામાં આવ્યું છે.
જાપાન હવામાન એજન્સી (JMA)ના જણાવ્યા અનુસાર, મંગળવારે જાપાનના ક્યુશુ ક્ષેત્રમાં આવેલા કુમામોટો પ્રાંતમાં રિક્ટર સ્કેલ પર 7.1ની તીવ્રતાનો આંચકો નોંધાયો હતો. આ આંચકો એટલો તીવ્ર હતો કે સમગ્ર દક્ષિણ જાપાનમાં ભારે ભયનો માહોલ સર્જાયો હતો.
ઈમારતો ધરાશાયી, ઓવરપાસ અને પુલ તૂટ્યા
આ પણ વાંચો
ભૂકંપના એપીસેન્ટર આસપાસના વિસ્તારોમાં મોટાપાયે નુકસાનના અહેવાલો મળી રહ્યા છે. ઉકી શહેરના ફાયર ડિપાર્ટમેન્ટના જણાવ્યા મુજબ, શોર્ટ સર્કિટ અને ગેસ લીકેજના કારણે શહેરમાં કેટલીય જગ્યાએ આગ લાગવાની ઘટનાઓ બની છે, જેના લીધે ઈમરજન્સી કોલ્સનો દૌર શરૂ થઈ ગયો છે.
જાપાની મીડિયા NHKના અહેવાલ મુજબ, યાત્સુશિરોમાં ક્યુશુ એક્સપ્રેસવે પર આવેલો હાઈવે ઓવરપાસ ક્ષતિગ્રસ્ત થયો છે. આ ઉપરાંત, એ જ શહેરમાં એક મહત્વપૂર્ણ પેડેસ્ટ્રિયન બ્રિજ (પગપાળા ચાલવાનો પુલ) પણ ધરાશાયી થઈ ગયો છે.
1 મીટર સુધીના સુનામીના મોજાં ઉછળવાની ભીતિ
ભૂકંપ આવ્યાના તુરંત બાદ જાપાન હવામાન એજન્સીએ દરિયાકાંઠાના વિસ્તારો માટે સુનામીની ચેતવણી જારી કરી દીધી છે. JMAના અંદાજ મુજબ સમુદ્રમાં 1 મીટર સુધી ઊંચા વિનાશક મોજાં ઉછળી શકે છે. જેથી તટીય વિસ્તારમાં રહેતા તમામ લોકોને સુરક્ષિત અને ઊંચા સ્થળોએ ખસી જવાની કડક સૂચના આપવામાં આવી છે.
વડાપ્રધાન સનાએ તાકાઈચીની અપીલ
પરિસ્થિતિની ગંભીરતાને ધ્યાનમાં રાખીને વડાપ્રધાન સનાએ તાકાઈચી એ દેશવાસીઓને સંબોધિત કરતા કહ્યું હતું કે- લોકોએ સંપૂર્ણ સતર્ક રહેવાની જરૂર છે, કારણ કે આગામી કલાકોમાં આ જ તીવ્રતાના આફ્ટરશોક્સ આવવાની પૂરી શક્યતા છે.
તેમણે વધુમાં ઉમેર્યું હતું કે, આ હોનારતમાં કેટલાય લોકો ઘાયલ થયા હોવાની આશંકા છે. હાલમાં તારાજી અને નુકસાનના સાચા આંકડા મેળવવાની કામગીરી ચાલુ છે, પરંતુ પ્રાથમિક અહેવાલો મુજબ ઘણા લોકો ઈજાગ્રસ્ત થયા છે અને તેમને સારવાર માટે ખસેડવામાં આવી રહ્યા છે.
કયા-કયા વિસ્તારોમાં એલર્ટ જાહેર કરાયું?
સ્થિતિ વધુ વણસે નહીં તે માટે જાપાન સરકારે દક્ષિણ ક્યુશુ દ્વીપના મુખ્ય પ્રાંતોમાં ઈમરજન્સી આલાર્મ સિસ્ટમ સક્રિય કરી દીધી છે. જે વિસ્તારોમાં હાઈ એલર્ટ જારી કરાયું છે તેમાં કુમામોટો, નાગાસાકી, કાગોશિમા, ફુકુઓકા, સાગા, ઓઇટા અને મિયાઝાકી સામેલ છે.
સ્થાનિક પ્રશાસન અને આપત્તિ વ્યવસ્થાપન ટીમ સતત પરિસ્થિતિ પર નજર રાખી રહી છે અને લોકોને સરકારી નિર્દેશોનું કડકપણે પાલન કરવા વિનંતી કરવામાં આવી છે.