Jabalpur Somnath Express: ભારતીય રેલવેની સંવેદનશીલતા અને માનવીય અભિગમનું એક અદભૂત ઉદાહરણ આજે જબલપુર-સોમનાથ એક્સપ્રેસમાં જોવા મળ્યું હતું. અમદાવાદથી વેરાવળ જઈ રહેલી આ ટ્રેનમાં એક ગર્ભવતી મહિલાને અચાનક પ્રસૂતિની પીડા ઉપડતા ટ્રેન કોચમાં જ સુરક્ષિત પ્રસૂતિ થઈ હતી. માતા અને નવજાત બાળક બંને સ્વસ્થ છે.
ટ્રેન બની હોસ્પિટલ
પ્રાપ્ત માહિતી અનુસાર, અમદાવાદથી વેરાવળ જતી જબલપુર-સોમનાથ એક્સપ્રેસ (ટ્રેન નં. 11466)માં એક મહિલા પોતાના પતિ સાથે કોચ નંબર S-2માં મુસાફરી કરી રહી હતી. ટ્રેન અમદાવાદ સ્ટેશનથી રવાના થયાના થોડા સમય બાદ મહિલાને અચાનક પ્રસૂતિની પીડા શરૂ થઈ. ગભરાયેલા પરિવારે તાત્કાલિક ફરજ પરના ટિકિટ નિરીક્ષક (TTE) રામજીવન કુમારને જાણ કરી હતી.
રેલવે સ્ટાફ અને મુસાફરોની સજ્જતા
પરિસ્થિતિની ગંભીરતા સમજીને TTE રામજીવન કુમારે તાત્કાલિક ભાવનગર મંડળની વાણિજ્ય નિયંત્રણ કચેરીને જાણ કરી અને મદદ માટે બેડશીટની વ્યવસ્થા કરી હતી. આ દરમિયાન, ચાંદલોડિયા સ્ટેશન પસાર થયા બાદ પ્રસૂતિની પીડા વધતા, કોચમાં સવાર અન્ય મહિલા મુસાફરોએ દેવદૂત બનીને મદદ કરી હતી. તેમના સહયોગથી ટ્રેન ચાલુ હતી ત્યારે જ મહિલાએ સ્વસ્થ બાળકને જન્મ આપ્યો હતો.
રેલવે તંત્ર દ્વારા તાત્કાલિક તબીબી સહાય
રેલવે પ્રશાસને ત્વરિત કાર્યવાહી કરીને વિરમગામ સ્ટેશન પર એમ્બ્યુલન્સ અને તબીબી ટીમ તૈયાર રાખી હતી. ટ્રેન વિરમગામ પહોંચતા જ માતા અને નવજાતને સુરક્ષિત રીતે નીચે ઉતારીને તાત્કાલિક સરકારી હોસ્પિટલમાં ખસેડવામાં આવ્યા હતા. તબીબોના જણાવ્યા અનુસાર, માતા અને નવજાત બંનેની સ્થિતિ સામાન્ય છે.
રેલવે પ્રબંધક દ્વારા પ્રશંસા
ભાવનગર મંડળના વરિષ્ઠ મંડળ વાણિજ્ય પ્રબંધક અતુલ કુમાર ત્રિપાઠીએ જણાવ્યું હતું કે, રેલવે માત્ર મુસાફરીનું સાધન નથી પરંતુ જરૂરિયાતના સમયે મુસાફરોની પડખે ઉભી રહેતી સંસ્થા છે. મંડળ રેલ પ્રબંધક દિનેશ વર્માએ આ પ્રસંગે ફરજ પરના TTE રામજીવન કુમારની કર્તવ્યનિષ્ઠા અને મદદ કરનાર મહિલા મુસાફરોની સરાહના કરી હતી. પરિવારજનોએ રેલવે સ્ટાફ અને મુસાફરોનો હૃદયપૂર્વક આભાર માન્યો હતો.