Crocodile Costume Garba:ગુજરાતની સાંસ્કૃતિક નગરી અને મગરની નગરી તરીકે જાણીતા વડોદરા શહેરમાં નવરાત્રીના પર્વનો રંગેચંગે પ્રારંભ થઈ ચૂક્યો છે. વિશ્વામિત્રી નદીના કાંઠે વસેલા આ શહેરમાં માનવ વસ્તી અને મગરોનું સહઅસ્તિત્વ એક વિશેષ ઓળખ છે. આ જ વિશેષતાને ધ્યાનમાં રાખીને નવરાત્રિના પ્રથમ દિવસે નવલખી મેદાન ખાતે યોજાયેલા સુપ્રસિદ્ધ 'વડોદરા નવરાત્રી ફેસ્ટિવલ'ના ગરબા ગ્રાઉન્ડ પર એક અનોખો અને આશ્ચર્યજનક નજારો જોવા મળ્યો હતો, જ્યાં એક યુવક અસલી મગર જેવી વેશભૂષા ધારણ કરીને હજારો ખેલૈયાઓની વચ્ચે ગરબે ઘૂમતો નજરે પડ્યો હતો.
વડોદરાના પ્રતિક સમાન મગરના ગણવેશમાં સજ્જ
નવરાત્રિના નવ દિવસો દરમિયાન ખેલૈયાઓ વિવિધ પૌરાણિક, સામાજિક અને આકર્ષક વેશભૂષામાં સજ્જ થઈને મેદાન પર ઉતરતા હોય છે. મહિલાઓની સાથે પુરુષ ખેલૈયાઓ પણ અવનવા વેશ ધારણ કરીને ઉત્સાહ વધારતા હોય છે. આ પરંપરા વચ્ચે વડોદરાના પ્રતિક સમાન મગરના ગણવેશમાં સજ્જ થઈને આવેલા આ ખેલૈયાએ ગ્રાઉન્ડ પર ઉપસ્થિત સૌ કોઈનું ધ્યાન ખેંચ્યું હતું. આ અનોખા અંદાજને કારણે ગ્રાઉન્ડ પર ભારે કુતૂહલ અને ઉત્સાહનો માહોલ સર્જાયો હતો.
સોશિયલ મીડિયા યૂઝર્સનું પણ ભરપૂર ધ્યાન
આ યુવકની અનોખી ગરબા શૈલી અને કપડાંએ માત્ર ગ્રાઉન્ડ પરના દર્શકોનું જ નહીં, પરંતુ સોશિયલ મીડિયા યૂઝર્સનું પણ ભરપૂર ધ્યાન ખેંચ્યું છે. આ ઘટનાનો વીડિયો સોશિયલ મીડિયા પર અત્યંત ઝડપથી વાયરલ થઈ રહ્યો છે. લોકો આ વીડિયોને ભારે ઉત્સાહથી શેર કરી રહ્યા છે અને વડોદરાવાસીઓની સર્જનાત્મકતા તેમજ નવરાત્રી પ્રત્યેના અદભુત ક્રેઝની પ્રશંસા કરી રહ્યા છે.
મગરની થીમ સાથે ગરબા રમવાનો આ વીડિયો
વડોદરામાં વહીવટી તંત્ર અને આયોજકો દ્વારા ખેલૈયાઓ માટે સુરક્ષિત અને ભવ્ય વ્યવસ્થાઓ કરવામાં આવી છે, ત્યારે આવા અનોખા આશ્ચર્યો ઉત્સવના માહોલમાં વધુ રંગ પૂરતા જોવા મળે છે. વડોદરાની આગવી ઓળખ સમાન મગરની થીમ સાથે ગરબા રમવાનો આ વીડિયો આ વર્ષની નવરાત્રીનું મુખ્ય આકર્ષણ બની ગયો છે, જેણે સોશિયલ મીડિયા પર ચર્ચાનો નવો વિષય જગાવ્યો છે.