Vadodara News: વડોદરા શહેરના બાજવા ગધેડા ગેટ વિસ્તારમાં પાણી ભરવા જેવી સામાન્ય બાબતે બનેલી એક ચોંકાવનારી ઘટનાએ સમગ્ર વિસ્તારમાં ચકચાર મચાવી દીધી છે. ઘરના સભ્યો પાણી ભરવા આવે ત્યારે ગાળો કેમ આપો છો તેમ પૂછવા ગયેલા એક વાહનના કંડક્ટર પર મહિલાએ ઉશ્કેરાઈને ચપ્પુથી જીવલેણ હુમલો કર્યો હતો. આ હુમલામાં કંડક્ટરને પેટ, છાતી અને હાથના ભાગે ગંભીર ઈજાઓ પહોંચતા તેમને તાત્કાલિક હોસ્પિટલમાં ખસેડવામાં આવ્યા છે.
ઘટનાની વિગતો અનુસાર, બાજવા ગધેડા ગેટ વિસ્તારમાં રહેતા અને છૂટક વાહનોમાં કંડક્ટર તરીકે નોકરી કરતા 37 વર્ષીય ઠાકરભાઈ બીજલભાઈ ઠાકોર ગત 1 નવેમ્બરની રાત્રે અંદાજે 11 વાગ્યાના સુમારે ખોડિયાર ટ્રાન્સપોર્ટ વોનસન ઓફિસ પાસે એકલા બેઠા હતા. તે દરમિયાન ત્યાંથી પસાર થતાં નજીકના જ રહેવાસી મહિલાને ઠાકરભાઈએ રોક્યા હતા. ઠાકરભાઈએ તેમને પૂછ્યું હતું કે, તમારા ઘરના સભ્યો જ્યારે પાણી ભરવા આવે છે, ત્યારે તમે કેમ ગાળો આપો છો?
આટલી સામાન્ય વાત પૂછતા જ લીલાબેન ઉશ્કેરાઈ ગયા હતા અને તેમણે રસ્તા પર જ ઠાકરભાઈને ગંદી ગાળો ભાંડવાનું શરૂ કરી દીધું હતું. ઠાકરભાઈએ ગાળો બોલવાની ના પાડતાં મામલો વધુ ઉગ્ર બન્યો હતો. ગુસ્સામાં ભરાયેલા લીલાબેન તાત્કાલિક પોતાના ઘરની અંદર ગયા હતા અને થોડી જ વારમાં હાથમાં ઘાતક ચપ્પુ લઈને બહાર આવ્યા હતા.
તેમણે કોઈ પણ જાતની શેહશરમ રાખ્યા વગર સીધો જ ઠાકરભાઈના પેટમાં ડૂંટીના નીચેના ભાગે ચપ્પુનો ઘા ઝીંકી દીધો હતો. આ અચાનક થયેલા હુમલાથી બચવા માટે ઠાકરભાઈએ આમતેમ ભાગવાનો પ્રયાસ કર્યો હતો, પરંતુ ઉશ્કેરાયેલા મહિલાએ તેમની છાતીના ભાગે તેમજ ડાબા હાથની કોણીના ઉપરના ભાગે પણ ચપ્પુના ઘા માર્યા હતા.
અચાનક થયેલા આ હુમલાથી ઠાકરભાઈ લોહીલુહાણ હાલતમાં રસ્તા પર પડી ગયા હતા અને તેમણે બૂમાબૂમ શરૂ કરી હતી. બૂમો સાંભળીને આસપાસના સ્થાનિક રહીશો તાત્કાલિક દોડી આવ્યા હતા. લોહીથી લથપથ હાલત જોઈને લોકોએ તાત્કાલિક 108 એમ્બ્યુલન્સને ફોન કરીને બોલાવી લીધી હતી. ઈજાગ્રસ્ત ઠાકરભાઈને તાત્કાલિક સારવાર અર્થે વડોદરાની ગોત્રી જનરલ હોસ્પિટલ ખાતે ખસેડવામાં આવ્યા હતા. હાલમાં તેમના પેટમાં થયેલી ગંભીર ઈજા સહિત અન્ય ઘાની સારવાર ચાલી રહી છે, અને ડોક્ટરોના જણાવ્યા અનુસાર તેમની સ્થિતિ પર નજર રાખવામાં આવી રહી છે.
આ ગંભીર બનાવ અંગે ઈજાગ્રસ્ત ઠાકરભાઈ ઠાકોરે હુમલો કરનાર મહિલા લીલાબેન વિરુદ્ધ સ્થાનિક પોલીસ સ્ટેશનમાં સત્તાવાર ફરિયાદ નોંધાવી છે. પોલીસે ગુનો નોંધીને મહિલા વિરુદ્ધ કાયદેસરની કડક કાર્યવાહી હાથ ધરી છે અને આસપાસના લોકોની પૂછપરછ કરી વધુ તપાસ ચલાવી રહી છે. પાણી જેવા પાયાના પ્રશ્ને અને સામાન્ય બોલાચાલીમાં વાત લોહિયાળ સંઘર્ષ સુધી પહોંચતા વિસ્તારમાં ભય અને આશ્ચર્યનો માહોલ છવાઈ ગયો છે.