Vadodara News: વડોદરામાં છેલ્લા કેટલાક સમયથી તસ્કરોએ માથું ઊંચક્યું છે. પોલીસનો કોઈ પણ પ્રકારનો ડર ન હોય તેમ તસ્કરો હવે રહેણાંક વિસ્તારોને નિશાન બનાવી રહ્યા છે. વડોદરાના કલાલી વિસ્તારમાં આવેલી વિસેજા મેરીગોલ્ડ સોસાયટીમાં ગત રાત્રે તસ્કરોએ ભારે આતંક મચાવ્યો હતો. તસ્કરોએ એક જ રાતમાં કુલ 7 મકાનોના તાળા તોડી નાખ્યા હતા.
ઘટનાની વિગત
મળતી માહિતી મુજબ, કલાલી વિસ્તારની આ સોસાયટીમાં જ્યારે રહીશો ગાઢ નિદ્રામાં હતા. ત્યારે તસ્કરોએ આયોજનબદ્ધ રીતે મકાનોને નિશાન બનાવ્યા હતા. તસ્કરોએ મકાનોના મુખ્ય દરવાજાના તાળા તોડી અંદર પ્રવેશ કર્યો હતો અને કબાટોમાં રાખેલા સોના-ચાંદીના કિંમતી દાગીના તેમજ રોકડ રકમ પર હાથ ફેરો કર્યો હતો. સવારે જ્યારે રહીશો જાગ્યા ત્યારે ઘરના તાળા તૂટેલા અને સામાન વેરવિખેર હાલતમાં જોઈને ચોંકી ઉઠ્યા હતા. એક જ સોસાયટીમાં સાત-સાત ઘરોમાં ચોરીની જાણ થતા સમગ્ર વિસ્તારમાં ચકચાર મચી ગઈ હતી.
પોલીસ કાફલો ઘટના સ્થળે
ઘટનાની જાણ થતા જ સ્થાનિક પોલીસ સહિત ક્રાઈમ બ્રાન્ચની ટીમ તાત્કાલિક ઘટના સ્થળે દોડી આવી હતી. ચોરીની ગંભીરતાને ધ્યાનમાં રાખીને FSL (ફોરેન્સિક સાયન્સ લેબોરેટરી) અને ડોગ સ્ક્વોડની પણ મદદ લેવામાં આવી છે. નિષ્ણાતોની ટીમે ઘટના સ્થળેથી ફિંગરપ્રિન્ટ્સ અને અન્ય પુરાવા એકત્રિત કરવાની કાર્યવાહી હાથ ધરી છે.
CCTV ફૂટેજ અને તપાસ
પોલીસ દ્વારા સોસાયટી અને આસપાસના વિસ્તારના CCTV ફૂટેજ મેળવવામાં આવ્યા છે. પ્રાથમિક તપાસમાં કેટલાક શંકાસ્પદ શખ્સો કેમેરામાં કેદ થયા હોવાનું જાણવા મળી રહ્યું છે, જેના આધારે પોલીસે તસ્કરોનું પગેરું મેળવવા માટે ચક્રો ગતિમાન કર્યા છે.
રહીશોમાં રોષ અને ભય
એક જ રાતમાં આટલી મોટી સંખ્યામાં મકાનોના તાળા તૂટતા સ્થાનિક રહીશોમાં ભય અને ફફડાટનો માહોલ જોવા મળી રહ્યો છે. રહીશોનો આક્ષેપ છે કે, વિસ્તારમાં પોલીસનું પેટ્રોલિંગ નહિવત હોવાને કારણે તસ્કરોને મોકળું મેદાન મળી ગયું છે. લોકો હવે પોતાની સુરક્ષાને લઈને ચિંતિત છે અને પોલીસ પાસે રાત્રિના સમયે સઘન પેટ્રોલિંગની માંગ કરી રહ્યા છે.