Vadodara News: દિવાળીના તહેવારોને પગલે શહેરમાં ખરીદી માટે લોકોની ભારે ભીડ ઉમટી રહી છે, જેના કારણે માર્ગો પર વાહનવ્યવહાર અને ટ્રાફિકની સમસ્યા અત્યંત જટિલ બની ગઈ છે. આ સ્થિતિને ધ્યાનમાં રાખીને વડોદરા મ્યુનિસિપલ કોર્પોરેશનની દબાણ શાખા દ્વારા શહેરના મધ્યમાં આવેલા સુરસાગર તળાવ ગેટ નંબર-6થી ગાંધીનગર ગૃહ તરફ જતા મુખ્ય માર્ગ પર કડક ઝુંબેશ હાથ ધરવામાં આવી હતી.
તહેવારોની સિઝનમાં ટ્રાફિકને અવરોધતા અનાધિકૃત દબાણો સામે તંત્ર દ્વારા સઘન કામગીરી કરવામાં આવી હતી. આ વિસ્તારમાં વહીવટી ચાર્જ કે મંજૂરી મેળવ્યા વિના જ રસ્તાઓ પર લારી-ગલ્લા ઊભા રાખીને વેપાર કરતા ધંધાર્થીઓ સામે કોર્પોરેશનની ટીમે આકરા પગલાં લીધા હતા. આ ઉપરાંત, કેટલાક ફેરિયાઓ અને વેપારીઓ દ્વારા આસપાસના જાહેર માર્ગો પર મોટા પાયે ગંદકી ફેલાવવામાં આવતી હોવાનું ધ્યાને આવતા ટીમે સ્થળ પર જ શિસ્તભંગની કાર્યવાહી કરી હતી.
દબાણ હટાવવાની આ કાર્યવાહી દરમિયાન સ્થળ પર ભારે અફડાતફડી અને દોડધામનો માહોલ સર્જાયો હતો. કામગીરી વેળાએ કેટલાક સ્થાનિક વેપારીઓ અને દબાણ શાખાના કર્મચારીઓ વચ્ચે તીખી બોલાચાલી અને હળવું ઘર્ષણ પણ થયું હતું. જોકે, કોર્પોરેશનની ટીમે મક્કમ વલણ અપનાવીને પોતાની ઝુંબેશ ચાલુ રાખી હતી અને કાયદાનો ભંગ કરીને મુકાયેલી લારીઓ તથા અન્ય સામગ્રી જપ્ત કરી હતી. તંત્ર દ્વારા આ આખી કામગીરી દરમિયાન કુલ 2 ટ્રક ભરીને સામગ્રી તથા લારીઓ જપ્ત કરવામાં આવી હતી.
કોર્પોરેશનની આ અચાનક અને કડક કાર્યવાહીથી માર્ગો પર ગેરકાયદેસર રીતે વેપાર કરતા અન્ય પથારાવાળાઓ અને લારીધારકોમાં ફાળ પડી હતી. તહેવારોના ટાણે જ આ પ્રકારની આકરી ઝુંબેશ ચલાવવામાં આવતા સ્થાનિક નાના વેપારીઓ અને ધંધાર્થીઓમાં ભારે નારાજગી અને આક્રોશ જોવા મળ્યો હતો. બીજી તરફ, સ્થાનિક રહીશો અને વાહનચાલકોએ ટ્રાફિકની સમસ્યામાંથી રાહત મળતા તંત્રના આ નિર્ણયને આવકાર્યો હતો.