Vadodara News: વડોદરા શહેરના રામવાડી વિસ્તારમાં ગત મોડી રાત્રે એક ભારે અફડાતફડી અને સળગતી કાર કૂતુહલવશ જેવી સ્થાનિકો માટે અકસ્માત નોતરનારી સાબિત થઈ હતી. રામવાડી ખાતે ઊભેલી એક કારમાં અચાનક શંકાસ્પદ સંજોગોમાં આગ ભભૂકી ઉઠી હતી. ઘટનાની જાણ થતાં જ આસપાસના લોકો સ્થળ પર એકઠા થઈ ગયા હતા. પરંતુ આગની જ્વાળાઓ વચ્ચે એકાએક કારમાં રહેલો સીએનજી (CNG) ગેસનો બાટલો જોરદાર ધડાકા સાથે ફાટતાં સમગ્ર વિસ્તાર ધ્રૂજી ઊઠ્યો હતો. આ ભયાનક બ્લાસ્ટમાં સ્થળ પર હાજર પાંચ થી વધુ લોકો ગંભીર રીતે દાઝી જતાં ચકચાર મચી જવા પામી છે.
સીએનજી ગેસ સિલિન્ડર પ્રચંડ ધડાકા સાથે ફાટ્યો
ઘટનાની મળતી વિગતો અનુસાર, રામવાડી વિસ્તારમાં મોડી રાત્રે પાર્ક કરેલી કારમાંથી અચાનક ધુમાડા નીકળવાનું શરૂ થયું હતું અને જોતજોતામાં કાર આગની લપેટમાં આવી ગઈ હતી. રાત્રિના સમયે અચાનક લાગેલી આગને કારણે કૂતુહલવશ આસપાસના રહીશો અને રસ્તા પરથી પસાર થતાં લોકો સળગતી કારને જોવા માટે મોટી સંખ્યામાં ઉમટી પડ્યા હતા. લોકો હજુ કંઈ સમજે કે બચાવ કામગીરી વિચારે તે પહેલા જ કારમાં મુકેલો સીએનજી ગેસ સિલિન્ડર પ્રચંડ ધડાકા સાથે ફાટ્યો હતો.
બ્લાસ્ટ એટલો જોરદાર હતો કે તેનો અવાજ દૂર દૂર સુધી સંભળાયો
સિલિન્ડર બ્લાસ્ટ એટલો જોરદાર હતો કે તેનો અવાજ દૂર દૂર સુધી સંભળાયો હતો. આ બ્લાસ્ટની તીવ્રતાને કારણે નજીકના મકાનો અને દુકાનોની બારીઓના કાચ તૂટીને વિખેરાઈ ગયા હતા. ધડાકા સાથે જ સ્થળ પર અફડાતફડી મચી ગઈ હતી અને નજીક ઉભેલા પાંચ થી વધુ લોકો આગની ઝાળ અને વિસ્ફોટની ઝપેટમાં આવી જતાં ગંભીર રીતે દાઝી ગયા હતા. ઈજાગ્રસ્તોને તાત્કાલિક અસરથી એમ્બ્યુલન્સ અને સ્થાનિક વાહનો મારફતે સારવાર અર્થે નજીકની હોસ્પિટલમાં ખસેડવામાં આવ્યા હતા, જ્યાં તેમની સારવાર ચાલી રહી છે.
ઘટના અંગે ફાયર બ્રિગેડ અને સ્થાનિક પોલીસને જાણ કરાતાં જ કાફલો સ્થળ પર દોડી આવ્યો હતો. ફાયર ફાઈટરોએ તુરંત જ પાણીનો મારો ચલાવીને કારમાં લાગેલી આગ પર કાબૂ મેળવ્યો હતો. પોલીસે સમગ્ર વિસ્તારને કોર્ડન કરી આગળની કાનૂની તપાસ હાથ ધરી છે. કારમાં આગ કયા કારણોસર લાગી અને સીએનજી કિટ માન્ય હતી કે કેમ તે દિશામાં પણ તપાસ શરૂ કરવામાં આવી છે.