Vadodara Advocates Strike: ગુજરાત સરકાર દ્વારા લાવવામાં આવેલા નવા ‘ગુજરાત ભાડા અધિનિયમ’ (Gujarat Rent Act) સામે વડોદરા વકીલ મંડળ દ્વારા ભારે વિરોધ નોંધાવવામાં આવ્યો છે. વકીલોએ આ નવા કાયદાને ‘કાળો કાયદો’ ગણાવીને આગામી 1 થી 3 ઓક્ટોબર દરમિયાન તમામ કોર્ટ કામગીરીથી અલિપ્ત રહેવાનો અને ત્રણ દિવસ માટે કામકાજ સંપૂર્ણપણે બંધ રાખવાનો મક્કમ નિર્ધાર કર્યો છે.
વકીલોએ મુખ્યમંત્રીને આપ્યું આવેદનપત્ર
વડોદરા બાર એસોસિએશન દ્વારા આ અંગે રાજ્યના મુખ્યમંત્રીને આવેદનપત્ર તથા પત્ર લખીને સત્તાવાર રીતે જાણ કરી દેવામાં આવી છે. વકીલ મંડળનો આરોપ છે કે, નવો કાયદો આમ જનતા અને ભાડૂતોના હિતમાં નથી પરંતુ ભ્રષ્ટાચારને પ્રોત્સાહન આપે તેવો છે. વકીલોએ મહેસૂલ વિભાગમાં વ્યાપ્ત ભ્રષ્ટાચાર અંગે ગંભીર આક્ષેપો કર્યા હતા અને શંકા વ્યક્ત કરી હતી કે, આ નવા કાયદાના અમલથી મહેસૂલી વહીવટમાં ભ્રષ્ટાચારનું પ્રમાણ અતિશય વધી જશે, જેના કારણે સામાન્ય નાગરિકો અને પક્ષકારો ભારે મુશ્કેલીમાં મુકાશે.
કાયદો પાછો ખેંચવા વકીલોની ઉગ્ર માંગ
વકીલોની સ્પષ્ટ માંગ છે કે, સરકાર દ્વારા આ લોકવિરોધી કાયદો તાત્કાલિક અસરથી પાછો ખેંચવામાં આવે. વકીલ મંડળે ચીમકી આપી છે કે, જો તેમની વાજબી માંગણીઓ સંતોષવામાં નહીં આવે, તો આગામી દિવસોમાં આ વિરોધ પ્રદર્શનને વધુ આક્રમક બનાવીને રાજ્યવ્યાપી હડતાળનું શસ્ત્ર ઉગામવામાં આવશે.
વકીલોની ત્રણ દિવસની હડતાળ ચીમકી
વકીલોની આ ત્રણ દિવસીય હડતાળ અને કામગીરીથી અલિપ્ત રહેવાના નિર્ણયના કારણે વડોદરાની અદાલતોમાં કેસોનું કામકાજ ઠપ્પ થઈ જશે, જેનાથી હજારો પક્ષકારો અને અરજદારોને હાલાકી ભોગવવી પડે તેવી સ્થિતિ નિર્માણ પામી છે. વકીલ મંડળના આ વલણથી ન્યાયિક ક્ષેત્રે ભારે ગરમાવો આવી ગયો છે.