Vadodara News: આવતીકાલે શ્રાવણ માસના પવિત્ર અને અંતિમ સોમવાર નિમિત્તે હિમાલયની ગોદમાં બિરાજમાન ભગવાન કેદારનાથ જ્યોતિર્લિંગ મંદિરને અંદર અને બહારથી રંગબેરંગી ફૂલોથી ભવ્ય રીતે શણગારવામાં આવ્યું છે. આ દિવ્ય અને પાવન પુષ્પ શણગારની સેવા કરવાનો અદ્ભુત સૌભાગ્ય વડોદરાના નિષ્ઠાવાન શિવભક્તોને પ્રાપ્ત થયું છે, જેણે સમગ્ર વડોદરાવાસીઓમાં ગર્વ અને ભક્તિની લાગણી જગાવી છે.
એક તરફ હિમાલય ક્ષેત્રમાં ભારે વરસાદ અને પ્રતિકૂળ હવામાન ચાલી રહ્યું છે, તેમ છતાં શિવભક્તોના ઉત્સાહ અને મહાદેવ પ્રત્યેની અખૂટ શ્રદ્ધા સામે કુદરતની આ મુશ્કેલીઓ પણ વામણી સાબિત થઈ છે. અવિરત વરસાદ અને ઠંડી વચ્ચે પણ ભક્તો દ્વારા કેદારનાથ મંદિરને વિવિધ પ્રજાતિના આકર્ષક અને સુગંધિત ફૂલોથી મનોહર રીતે સજાવવામાં આવી રહ્યું છે. હર હર મહાદેવના નાદ સાથે ગુંજતા આ પવિત્ર પરિસરમાં ફૂલોનો આ દિવ્ય શણગાર દર્શનાર્થે આવનાર લાખો શ્રદ્ધાળુઓ માટે વિશેષ આકર્ષણનું કેન્દ્ર બન્યો છે.
બાબા કેદારનાથના દરબારને અલંકૃત કરવાની આ સુંદર સેવા સહજાનંદ-લોટસ ગ્રુપ અને જય ભોલે ગ્રુપના સંયુક્ત ઉપક્રમે સાકાર થઈ રહી છે. આ ભક્તિસભર આયોજનમાં મયંકભાઈ, પ્રિતેશભાઈ, કમલેશભાઈ અને સ્વેજલ વ્યાસ સહિતના સમર્પિત શિવભક્તોએ સક્રિય યોગદાન આપીને પોતાની સેવાનું ઉત્તમ ઉદાહરણ પૂરું પાડ્યું છે. તમામ અડચણોને પાર કરીને ભક્તોએ પોતાની શ્રદ્ધાને સર્વોપરી રાખી છે અને બાબાના ચરણોમાં પુષ્પાંજલિ અર્પણ કરી ધન્યતા અનુભવી છે.
શ્રાવણ માસના અંતિમ સોમવારે બાબા કેદારનાથના ધામને ફુલોથી સજાવવાની આ પવિત્ર પહેલ વડોદરાના શિવભક્તો માટે માત્ર એક આયોજન નથી, પરંતુ ભગવાન શિવ પ્રત્યેના સમર્પણ, સેવા અને ભક્તિનું જીવંત પ્રતીક છે. ભારે વરસાદની પરવા કર્યા વગર શિવ આરાધનામાં લીન થયેલા આ ભક્તોની નિષ્ઠાએ સાબિત કરી દીધું છે કે સાચી ભક્તિ મુશ્કેલીઓથી ક્યારેય અટકતી નથી. કેદારનાથ ધામમાં થયેલા આ ભવ્ય પુષ્પ શણગારના અલૌકિક દ્રશ્યો સોશિયલ મીડિયા પર પણ વાયરલ થઈ રહ્યા છે, અને દેશભરના શિવભક્તો વડોદરાના આ ભક્તોના આ ભગીરથ કાર્યની સરાહના કરી રહ્યા છે.