Surat: ઑટિઝમની બીમારીથી પીડિત સુરતના 9 વર્ષના બાળકે રાષ્ટ્રીય કક્ષાએ અનોખી સિદ્ધિ હાંસલ કરી છે. જેમાં બાળકે માત્ર 1 કલાક 11 મિનિટ અને 4 સેકન્ડમાં 1 કિલોમીટરનો દરિયો ખેડીને ઈન્ડિયા બુક ઑફ રેકોર્ડ્સમાં સ્થાન મેળવ્યું છે.
આજથી એક મહિના પૂર્વે ગત 3 જાન્યુઆરીના રોજ પોરબંદરમાં ઑલ ઈન્ડિયા સી સ્વિમિંગની કોમ્પિટિશન યોજાઈ હતી. જેમાં 60 ટકા ઓટિઝમ સ્પેક્ટ્રમ ડિસઑર્ડરથી પીડાતા સુરતના 9 વર્ષીય તીર્થ નાકરાણીએ પણ ભાગ લીધો હતો.
આ સ્પર્ધામાં તીર્થે પોતાની પોતાના મહેનત, ધગસ અને આત્મવિશ્વાસથી 1 કિલોમીટરનો દરિયો માત્ર 1 કલાક 11 મિનિટને 4 સેકન્ડમાં ખેડ્યો હતો. તીર્થની આ સિદ્ધિ બદલ ઈન્ડીયા બુક ઑફ રેકોર્ડ્સ તરફથી મેડલ, સર્ટીફિકેટ આપીને તેનું સન્માન કરવામાં આવ્યું હતુ.
આ અંગે તીર્થના પિતા જૈમિશભાઈએ જણાવ્યું કે, ઑટિઝમ હોવા છતાં તીર્થ નિયમિત ટ્રેનિંગ, દ્રઢ ઈચ્છાશક્તિ અને હિંમતથી કઠીન પડકારને પાર કર્યો છે. તીર્થની આ સિદ્ધિ ઓટિઝમથી પીડાતા અન્ય બાળકો માટે પ્રેરણારૂપ છે.