Bullet Train Surat Bilimora: ભારતના પ્રથમ હાઈ-સ્પીડ રેલવે (બુલેટ ટ્રેન) પ્રોજેક્ટનું નિર્માણ કાર્ય હવે આખરી તબક્કા અને અત્યંત મહત્વપૂર્ણ માઈલસ્ટોન તરફ આગળ વધી રહ્યું છે. નેશનલ હાઈ સ્પીડ રેલ કોર્પોરેશન લિમિટેડ (NHSRCL) દ્વારા એક જાહેર સુરક્ષા નોટિસ જારી કરીને માહિતી આપવામાં આવી છે કે મુંબઈ-અમદાવાદ બુલેટ ટ્રેન કોરિડોરના સુરત–બીલીમોરા એલિવેટેડ સેક્શન પર નાખવામાં આવેલા ઓવરહેડ ઈલેક્ટ્રિકલ વાયરોને 20 નવેમ્બર, 2026 અથવા ત્યારબાદ ગમે ત્યારે પાવર સપ્લાય આપીને હાઈ-વોલ્ટેજ વીજળીથી સજ્જ (Energised) કરવામાં આવશે.
જાહેર જનતા માટે કડક સુરક્ષા સૂચના
NHSRCLએ સ્થાનિક નાગરિકો, ખેડૂતો અને આસપાસના રહીશોની સુરક્ષાને ધ્યાનમાં રાખીને વિશિષ્ટ એડવાઈઝરી જારી કરી છે:
વાયરોને લાઈવ જ ગણવા: 20 નવેમ્બરથી આ સેક્શન પરના તમામ ઓવરહેડ વાયરો અને ઈલેક્ટ્રિકલ ઈન્સ્ટોલેશનને કરંટ ધરાવતા (Live Wires) જ માનવાના રહેશે, ભલે પછી પાવર સપ્લાય ચાલુ દેખાતો હોય કે નહિ.
અનધિકૃત પ્રવેશ પર મનાઈ: કોઈ પણ અનધિકૃત વ્યક્તિએ આ એલિવેટેડ કોરિડોર, ટ્રેક કે ઈલેક્ટ્રિકલ સબ-સ્ટેશનની નજીક જવું નહીં અથવા ત્યાં કોઈ પણ પ્રકારનું કામ હાથ ધરવું નહીં.
અકસ્માત નિવારણ: આ હાઈ-વોલ્ટેજ વીજળી લાઈન અત્યંત શક્તિશાળી હોવાથી તેના સંપર્કમાં આવવું અથવા નજીક જવું જાનલેવા સાબિત થઈ શકે છે. આ જાહેર નોટિસનો મુખ્ય હેતુ જાનમાલની હોનારત કે અકસ્માત અટકાવવાનો છે.
2027ના ઓપરેશનલ લક્ષ્યાંક તરફ મોટો માઈલસ્ટોન
કેન્દ્રીય રેલવે મંત્રી અશ્વિની વૈષ્ણવે અગાઉ કરેલી જાહેરાત મુજબ, સુરતથી બીલીમોરા વચ્ચેનો આ પ્રથમ સેક્શન વર્ષ 2027 સુધીમાં ઓપરેશનલ (મુસાફરો માટે કાર્યરત) કરવાનો લક્ષ્યાંક રાખવામાં આવ્યો છે.
ટ્રાયલ રનનો માર્ગ સાફ: ઓવરહેડ ઈલેક્ટ્રિકલ વાયરોનું પાવરફિકેશન થવું એ હાઈ-સ્પીડ બુલેટ ટ્રેનના ટ્રાયલ રન શરૂ કરવા માટેનું અત્યંત મહત્વનું પ્રાથમિક ચરણ છે.
પ્રોજેક્ટની ઝડપ: સુરત અને બીલીમોરા વચ્ચે વાયરોનું લાઈવ થવું એ દર્શાવે છે કે સિવિલ વર્ક, વાયડક્ટ (પિલર) અને ટ્રેક બેડનું કામ પૂર્ણતાના આરે છે.
મુંબઈથી અમદાવાદ વચ્ચેના 508 કિમી લાંબા આ હાઈ-સ્પીડ કોરિડોરમાં સુરત-બીલીમોરા રૂટ સૌથી પહેલા શરૂ થવા જઈ રહ્યો છે, જે ભારતના રેલવે ઈતિહાસમાં એક નવો અધ્યાય લખશે.