Surat News: આગામી દિવાળી અને છઠ્ઠ મહાપર્વ દરમિયાન મુસાફરોની ભીડને ધ્યાનમાં રાખીને પશ્ચિમ રેલવેના વડોદરા મંડળ દ્વારા એક મહત્વપૂર્ણ નિર્ણય લેવામાં આવ્યો છે. સુરત શહેરના ઉત્રાણ રેલવે સ્ટેશનને લાંબા અંતરની ટ્રેનોના સંચાલન માટે એક સક્ષમ અને વધારાના વિકલ્પ તરીકે વિકસાવાશે. પશ્ચિમ રેલવેના વડોદરા મંડળના જનસંપર્ક અધિકારી અનુભવ સક્સેનાના જણાવ્યા અનુસાર, નવી વ્યવસ્થાથી તહેવારોમાં ઉત્તર ભારત, પશ્ચિમ ભારત અને પૂર્વ ભારત તરફ જતા લાખો મુસાફરોને હોલીડે સ્પેશિયલ ટ્રેનોની સુવિધા મળશે.
આ પહેલનો સૌથી મોટો ફાયદો સુરત અને ઉધના જેવા અતિ વ્યસ્ત સ્ટેશનો પરથી મુસાફરોનું ભારણ ઘટાડવામાં થશે. સાથે જ, ભરૂચ અને અંકલેશ્વરમાં રહેતા પરપ્રાંતીય મુસાફરોને પણ આ માળખાગત સુવિધાનો સીધો લાભ મળશે. લાંબા અંતરની વિશેષ ટ્રેનોમાં મુસાફરી કરવા માટે મુસાફરોને હવે સુરત કે ઉધના સુધી લાંબા થવું નહીં પડે, પરંતુ ઉત્રાણ સ્ટેશનથી જ ટ્રેન પકડવાનો સાનુકૂળ વિકલ્પ મળી રહેશે. આનાથી મુસાફરોની અવરજવર વધુ સુવિધાજનક બનશે અને મુખ્ય સ્ટેશનો પર ભીડનું વ્યવસ્થાપન સરળ બનશે.
આ પણ વાંચો
ઉત્રાણ સ્ટેશન પર લાંબા અંતરની ટ્રેનોનું સરળતાથી સંચાલન થઈ શકે તે માટે પ્લેટફોર્મ સંબંધિત માળખાગત સુવિધાનો ઝડપથી વિસ્તાર કરવામાં આવી રહ્યો છે. જૂના અને નાની લંબાઈ ધરાવતા પ્લેટફોર્મને દૂર કરીને સ્ટેશનની ઉત્તર દિશામાં આશરે 600 મીટર લાંબો નવો પ્લેટફોર્મ તૈયાર કરવામાં આવ્યો છે. આ પ્લેટફોર્મ આશરે 24 કોચ ધરાવતી લાંબા અંતરની ટ્રેનોના સંચાલન અને રોકાણ માટે સંપૂર્ણ રીતે ઉપયોગી બનશે.
આ ઉપરાંત, સ્ટેશનના પ્લેટફોર્મ નંબર 3 અને 4 ની લંબાઈ વધારવાનું કામ પણ પુરજોશમાં ચાલી રહ્યું છે. તમામ કામગીરી પૂર્ણ થતા જ ઉત્રાણ સ્ટેશન પર ચાર સંપૂર્ણ લંબાઈના પ્લેટફોર્મ ઉપલબ્ધ થઈ જશે. તહેવારોની મોસમમાં મુસાફરોની સુવિધા વધારવા, ભીડનું યોગ્ય સંચાલન કરવા અને સુરત વિસ્તારમાં રેલવેની ઓપરેશનલ ક્ષમતા મજબૂત બનાવવા માટે રેલવેનું આ પગલું ખૂબ જ મહત્વપૂર્ણ સાબિત થશે.