Surat News: નેશનલ રોડ સેફટી ઓથોરિટી પ્રેરિત અને સુરત પોલીસ આયોજિત ‘રાષ્ટ્રીય માર્ગ સલામતી માસ-2026’ની ઉજવણીનો શહેરના પોલીસ કમિશનર અનુપમસિંહ ગહલૌતે પોલીસ પરેડ ગ્રાઉન્ડ ખાતેથી વિધિવત પ્રારંભ કરાવ્યો હતો. આ પ્રસંગે શહેરના મેયર દક્ષેશભાઈ માવાણી સહિત ઉચ્ચ પોલીસ અધિકારીઓ અને આરટીઓ (RTO) ના પદાધિકારીઓ ઉપસ્થિત રહ્યા હતા.
સુરતનું ‘સિગ્નલ મોડલ’ દેશ માટે ઉદાહરણ
કાર્યક્રમ દરમિયાન મેયર દક્ષેશ માવાણીએ સુરતીઓની ટ્રાફિક શિસ્તના વખાણ કરતા જણાવ્યું હતું કે, સુરતના 'સિગ્નલ ઇમ્પ્લિમેન્ટેશન' મોડલની નોંધ આજે દેશભરમાં લેવામાં આવી રહી છે. તેમણે ગૌરવ સાથે જણાવ્યું કે સમગ્ર ગુજરાતના 35 ટકા ઇલેક્ટ્રિક વ્હીકલ્સ માત્ર સુરત શહેરમાં છે, જે દર્શાવે છે કે સુરતીઓ ટેકનોલોજી અને પર્યાવરણ પ્રત્યે અત્યંત જાગૃત છે.
કડક કાર્યવાહી અને જાગૃતિનો સમન્વય
પોલીસ કમિશનર અનુપમસિંહ ગહલૌતે વર્ષ 2025 દરમિયાન થયેલી કામગીરીના આંકડા રજૂ કરતા જણાવ્યું હતું કે, ટ્રાફિક વ્યવસ્થાને સુધારવા માટે કડક અમલવારી જરૂરી છે.
- ગયા વર્ષની કાર્યવાહી: વર્ષ 2025માં રોંગ સાઈડ ડ્રાઈવિંગમાં 55 હજાર, ઓવર સ્પીડમાં 2.36 લાખ અને સિગ્નલ ભંગમાં 1.30 લાખ લોકો સામે કાર્યવાહી કરવામાં આવી હતી.
- ગ્રીન કોરિડોર: સુરત પોલીસે છેલ્લા એક વર્ષમાં 28 જેટલા 'ગ્રીન કોરિડોર' બનાવીને અંગદાનના અંગોને સમયસર અમદાવાદ પહોંચાડવાની પ્રશંસનીય કામગીરી કરી અનેક જીવ બચાવ્યા છે.
- અભિયાનો: શહેરમાં 'હેલ્મેટ ડ્રાઈવ'ની સાથે ધ્વનિ પ્રદૂષણ રોકવા 'નો હોર્ન' અભિયાન પર પણ વિશેષ ભાર મૂકવામાં આવી રહ્યો છે.
વિદ્યાર્થીઓ અને નાગરિકોની ભાગીદારી
સુરત પોલીસ, મહાનગર પાલિકા અને RTO સંયુક્ત રીતે કામ કરી રહ્યા છે. ઉજવણી દરમિયાન વિદ્યાર્થીઓએ ટ્રાફિક ચિન્હો (સાઇન બોર્ડ) દ્વારા માર્ગ સલામતીની સમજ આપી હતી અને નુક્કડ નાટક દ્વારા અકસ્માતથી બચવા જાગૃતિ ફેલાવી હતી. અકસ્માત સમયે મદદ કરનાર રાજવીર નામના યુવકને પ્રશંસાપત્ર આપી સન્માનિત કરવામાં આવ્યો હતો.
પ્રતિજ્ઞા અને બાઈક રેલી
કાર્યક્રમના અંતે હાજર રહેલા તમામ અધિકારીઓ, જવાનો અને નાગરિકોએ માર્ગ સલામતીની પ્રતિજ્ઞા લીધી હતી. ત્યારબાદ મહાનુભાવોએ ફ્લેગ ઓફ આપીને શહેરભરમાં જનજાગૃતિ ફેલાવવા નીકળેલી બાઈક રેલીનું પ્રસ્થાન કરાવ્યું હતું. સુરત પોલીસ હવે શાળા-કોલેજો અને માર્કેટ વિસ્તારોમાં આખું મહિનો વિશેષ અભિયાન ચલાવશે.
પોલીસ કમિશનરના મતે, હેલ્મેટ અને સીટ બેલ્ટના ઉપયોગથી માર્ગ અકસ્માતમાં નોંધપાત્ર ઘટાડો થયો છે. સુરતની જનતાને ટ્રાફિક નિયમોને પોતાની સંસ્કૃતિનો ભાગ બનાવવા અપીલ કરવામાં આવી છે.
