Surat Metro Bridge: સુરત શહેરના જાહેર પરિવહન અને આધુનિક ઇન્ફ્રાસ્ટ્રક્ચરમાં વધુ એક મહત્વપૂર્ણ અધ્યાય ઉમેરાયો છે. અડાજણથી અઠવા ચોપાટી વચ્ચે સુરતનો પહેલો તાપી નદી પરનો મેટ્રો બ્રિજ સંપૂર્ણ સજ્જ થઈ ગયો છે. ફ્રાન્સની રાજધાની પેરિસના પ્રખ્યાત પોન્ટ ડી બીર-હાકીમ બ્રિજની તર્જ પર તૈયાર થયેલો આ બ્રિજ સુરતના શહેરી પરિવહન માટે મહત્ત્વપૂર્ણ સાબિત થવાની સાથે દક્ષિણ ગુજરાતના વિકાસને પણ નવી ગતિ આપશે.આ બ્રિજ પરથી પસાર થતી વખતે મેટ્રોના મુસાફરોને તાપી નદી અને કરોડોના ખર્ચે આકાર લઈ રહેલા તાપી રિવરફ્રન્ટ પ્રોજેક્ટનો ભવ્ય નજારો જોવા મળશે. આધુનિક ડિઝાઇન અને વિશેષ એન્જિનિયરિંગ ટેક્નોલોજીથી તૈયાર થયેલો આ બ્રિજ સુરતના આકર્ષક ઇન્ફ્રાસ્ટ્રક્ચરમાં વધુ એક ઓળખ ઉમેરશે.
અડાજણથી બુલેટ ટ્રેન સ્ટેશન સુધીની કનેક્ટિવિટી બનશે સરળ
મેટ્રો બ્રિજ શરૂ થયા બાદ રાંદેર, પાલ અને અડાજણ વિસ્તારના નાગરિકો માટે શહેરના અન્ય વિસ્તારો સુધી પહોંચવું વધુ સરળ બનશે. મેટ્રો સેવા શરૂ થતાં આ વિસ્તારોના મુસાફરોને જાહેર પરિવહનનો ઝડપી વિકલ્પ મળશે અને રસ્તાઓ પરના ટ્રાફિકનું ભારણ ઘટાડવામાં મદદ મળશે. આ પ્રોજેક્ટની સૌથી મહત્ત્વપૂર્ણ વિશેષતા ભવિષ્યમાં બુલેટ ટ્રેન સાથે મળનારી કનેક્ટિવિટી છે. અડાજણથી મેટ્રોમાં મુસાફરી કરીને મુસાફરો અંત્રોલી ખાતે આવેલા હાઈસ્પીડ બુલેટ ટ્રેન સ્ટેશન સુધી પહોંચી શકશે. GMRC દ્વારા સરોલીથી આગળ 4.4 કિલોમીટરના વધારાના મેટ્રો વિસ્તરણનું આયોજન કરવામાં આવ્યું છે. આ વિસ્તરણ પૂર્ણ થયા બાદ મુસાફરો મેટ્રો મારફતે અંત્રોલી પહોંચી મુંબઈ તરફ જતી બુલેટ ટ્રેન પકડી શકશે.
2006ના વિનાશક પૂરમાંથી બોધપાઠ લઈ તૈયાર કરાયું એન્જિનિયરિંગ
તાપી નદી પર મેટ્રો બ્રિજનું નિર્માણ કરવું એ સમગ્ર પ્રોજેક્ટનું સૌથી પડકારજનક કામ હતું. ખાસ કરીને સુરતમાં વર્ષ 2006માં આવેલા વિનાશક પૂરના ટેકનિકલ ડેટાનો ગહન અભ્યાસ કરીને બ્રિજની ડિઝાઇન તૈયાર કરવામાં આવી છે. નદીના કુદરતી વહેણમાં કોઈ અવરોધ ન સર્જાય તે માટે સામાન્ય રીતે ઉપયોગમાં લેવાતા 25 મીટરના સ્પાનની જગ્યાએ 50 મીટરના 8 વિશાળ સ્પાન બનાવવામાં આવ્યા છે. આ ઉપરાંત બ્રિજના નિર્માણમાં કુલ 144 પ્રિકાસ્ટ સેગમેન્ટલ બોક્સ ગર્ડરનો ઉપયોગ કરવામાં આવ્યો છે. આ આધુનિક માળખા પર 764 મુસાફરોની ક્ષમતા ધરાવતી મેટ્રો ટ્રેન 80 કિલોમીટર પ્રતિ કલાકની ઝડપે દોડી શકશે.
ઉકાઈ ડેમમાંથી પાણી છોડાય તો પણ સુરક્ષિત રહે તેવું આયોજન
સુરત માટે તાપી નદીમાં આવતું પૂર હંમેશાં એક મોટો પડકાર રહ્યો છે. ખાસ કરીને ઉકાઈ ડેમમાંથી લાખો ક્યુસેક પાણી છોડવામાં આવે ત્યારે નદીના જળસ્તરમાં મોટો વધારો થાય છે. આ બાબતને ધ્યાનમાં રાખીને મેટ્રો બ્રિજના પાયાના નિર્માણમાં ડીપ-પાઈલ ફાઉન્ડેશન પર વિશેષ કામગીરી કરવામાં આવી છે. બ્રિજની ઊંચાઈ પણ ખાસ રીતે નક્કી કરવામાં આવી છે. આ બ્રિજ સરદાર બ્રિજ અને પાલ-ઉમરા બ્રિજ કરતાં આશરે 5થી 7 મીટર વધુ ઊંચો છે. શહેરમાં અત્યાર સુધી નોંધાયેલા હાઈએસ્ટ ફ્લડ લેવલ કરતાં પણ 7 મીટરનું વધારાનું સેફ્ટી ક્લિયરન્સ આપવામાં આવ્યું છે. આશરે 20 મીટરની કુલ ઊંચાઈ ધરાવતો આ મેટ્રો બ્રિજ 23.5 મીટરના ક્લિયરન્સ ધરાવતા અડાજણ કેબલ બ્રિજ બાદ સુરતનો બીજો સૌથી ઊંચો બ્રિજ બનશે.
18.74 કિલોમીટરની મેટ્રો લાઇન-2નું મહત્ત્વપૂર્ણ કામ પૂર્ણ
સુરત મેટ્રોની 18.74 કિલોમીટર લાંબી લાઇન-2 ભેસાણથી સરોલી સુધીની છે. આ રૂટનું કામ બે તબક્કામાં હાથ ધરવામાં આવ્યું છે, જેમાં સરોલીથી મજૂરા અને મજૂરાથી ભેસાણ સુધીના વિસ્તારોનો સમાવેશ થાય છે. આ સમગ્ર રૂટમાં તાપી નદી પર મેટ્રો વાયડક્ટ ઊભો કરવો સૌથી મુશ્કેલ પડકાર હતો. પેકેજ CS-5 હેઠળ કોન્ટ્રાક્ટર એજન્સી દ્વારા નદીમાં સૌપ્રથમ હંગામી જેટ્ટી બનાવવામાં આવી હતી. ત્યારબાદ ઊંડા પાઈલ ફાઉન્ડેશનનું નિર્માણ કરવામાં આવ્યું હતું.મેટ્રોનો સમગ્ર રૂટ એલિવેટેડ હોવાથી નદી પર પણ એ જ એલિવેટેડ અલાઇનમેન્ટ જાળવવું જરૂરી હતું. આ કારણે નદી ઉપર પૂરતી ઊંચાઈ સાથે બ્રિજનું નિર્માણ કરવામાં આવ્યું છે.
સુરતના પરિવહન અને વિકાસને મળશે નવી દિશા
તાપી નદી પર તૈયાર થયેલો આ મેટ્રો બ્રિજ માત્ર બે કિનારાને જોડતો પુલ નથી, પરંતુ સુરતના ભવિષ્યના પરિવહન માળખાનો મહત્ત્વપૂર્ણ હિસ્સો છે. મેટ્રો, બુલેટ ટ્રેન અને રિવરફ્રન્ટ જેવા મોટા પ્રોજેક્ટ વચ્ચે કનેક્ટિવિટી વિકસતાં સુરતના શહેરી વિકાસને નવી દિશા મળવાની અપેક્ષા છે. આધુનિક ડિઝાઇન, સુરક્ષાને ધ્યાનમાં રાખીને કરાયેલું એન્જિનિયરિંગ અને નદીના કુદરતી વહેણને જાળવવાની વ્યવસ્થા સાથે તૈયાર થયેલો આ બ્રિજ સુરતના ઇન્ફ્રાસ્ટ્રક્ચરમાં એક મહત્ત્વપૂર્ણ સીમાચિહ્ન બની રહ્યો છે.