GSRTC News: ગુજરાતની જીવાદોરી સમાન એસ.ટી. નિગમ (GSRTC) હવે મુસાફરો માટે માત્ર મુસાફરીનું સાધન જ નહીં, પરંતુ ટેક્નોલોજીના સથવારે 'સ્માર્ટ ટ્રાન્સપોર્ટ'નું ઉત્તમ ઉદાહરણ પૂરું પાડી રહી છે. અગાઉ બસની રાહ જોઈને કલાકો સુધી સ્ટેન્ડ પર બેસી રહેવું પડતું હતું, પરંતુ હવે હાઈટેક OPRS (ઓનલાઈન પેસેન્જર રિઝર્વેશન સિસ્ટમ) અને 'લાઈવ બસ ટ્રેકિંગ' સુવિધાએ મુસાફરોનો અનુભવ બદલી નાખ્યો છે.
એક ક્લિક પર બસનું લોકેશન
રાજકોટ ડિવિઝન દ્વારા લાંબા અંતરની અને ઈન્ટરસિટી તમામ 500થી વધુ બસોમાં GPS સિસ્ટમ કાર્યરત કરવામાં આવી છે. રાજકોટથી અમદાવાદ, વડોદરા, સુરત કે સોમનાથ જતી બસ ક્યાં પહોંચી છે, તેની વિગત હવે મુસાફરો ઘરે બેઠા જાણી શકે છે. આ સુવિધાનો લાભ રાજકોટના અંદાજે 1.50 લાખથી વધુ યાત્રિકો દર મહિને લઈ રહ્યા છે.
આ પણ વાંચો
SMS દ્વારા સીધી લિંક: નવી સુવિધાનો પ્રારંભ
એસ.ટી. નિગમે 15મી ડિસેમ્બરથી એક મહત્વપૂર્ણ સુવિધા ઉમેરી છે. હવે જ્યારે મુસાફર ઓનલાઈન અથવા કાઉન્ટર પરથી રિઝર્વેશન કરાવશે, ત્યારે તેમના રજિસ્ટર્ડ મોબાઈલ નંબર પર ટિકિટના કન્ફર્મેશન મેસેજની સાથે બસ ટ્રેક કરવાની એક ડાયરેક્ટ લિંક પણ મોકલવામાં આવશે. આ લિંક પર ક્લિક કરતાની સાથે જ મુસાફર જોઈ શકશે કે તેમની બસ અત્યારે કયા સ્થળે છે અને કેટલા સમયમાં તેમના સ્ટેન્ડ પર પહોંચશે.
ટેક્નોલોજી કેવી રીતે કામ કરે છે?
- GPS ટ્રેકિંગ: બસમાં લગાવાયેલું GPS સાધન સેટેલાઈટ દ્વારા દર સેકન્ડે બસનું ચોક્કસ લોકેશન મેળવે છે.
- રિયલ ટાઈમ ડેટા: આ ડેટા GSRTC ના મુખ્ય કંટ્રોલ રૂમ અને મોબાઈલ એપ સાથે જોડાયેલો રહે છે.
- મોનિટરિંગ: આ સિસ્ટમથી બસની સ્પીડ પર પણ નજર રાખી શકાય છે, જેના કારણે ડ્રાઈવર પર અંકુશ રહે છે અને અકસ્માતોનું પ્રમાણ ઘટાડી શકાય છે. ઉપરાંત, બસ નિર્ધારિત રૂટ પર ચાલે છે કે નહીં તેનું પણ મોનિટરિંગ થાય છે.
બસ ટ્રેક કરવાની રીતો
- GSRTC એપ: એપ્લિકેશનમાં 'ટ્રેક યોર બસ' (Track Your Bus) સેક્શનમાં જઈ PNR અથવા બસ નંબર દાખલ કરીને લોકેશન જાણી શકાય છે.
- GSRTC લાઈવ ટ્રેકિંગ એપ: આ ખાસ એપમાં નજીકનું બસ સ્ટેશન, બસનું લાઈવ સ્ટેટસ અને રૂટનું ટાઈમટેબલ પણ જોઈ શકાય છે.
- વેબસાઈટ: GSRTC ની સત્તાવાર વેબસાઈટ પરથી પણ ઓનલાઈન ટ્રેકિંગની સુવિધા ઉપલબ્ધ છે.
ખાનગી લક્ઝરી બસોના મોંઘા ભાડાની સામે એસ.ટી. નિગમ આધુનિક સુવિધાઓ અને સચોટ સમયપાલન સાથે મુસાફરોનો વિશ્વાસ જીતવામાં સફળ રહી છે. આ ટેક્નોલોજીથી હવે મુસાફરોનો કિંમતી સમય બચશે અને બસ સ્ટેન્ડ પરની બિનજરૂરી ભીડ પણ ઘટશે.