Palanpur News: ઠાકોર સમાજના બંધારણ મામલે નવો વિવાદ ઉભો થયો છે. થોડા સમય પહેલા ડીજે મુદ્દે ગબ્બર ઠાકોર સામે સમાજના આગેવાનો દ્વારા પગલાં ભરવામાં આવ્યા હતા. ત્યારે હવે ગાયક ગબ્બર ઠાકોર દ્વારા એક નવું ગીત બનાવવામાં આવ્યું છે. આ ગીત સોશિયલ મીડિયામાં વાયરલ થયું છે. ડીજેના ધબકારે…ગીતમાં ગબ્બર ઠાકોરે સમાજના મોટા લોકો બંધારણ તોડતા હોવાનો ઉલ્લેખ કર્યો છે પરંતુ તેમની સામે કોઇ કાર્યવાહી ન થતી હોવાનું અને દારુનું ખુલ્લેઆમ વેચાણ થતું હોવાનું કહી સમાજના આગેવાનો સામે નિશાન તાક્યું છે.
નવા ગીત થકી આગેવાનો પર તાક્યું નિશાન
આ પણ વાંચો
ગબ્બર ઠાકોર દ્વારા ગવાયેલા આ નવા ગીતમાં સમાજની વર્તમાન સ્થિતિ અને આગેવાનોની કાર્યશૈલી પર સીધા પ્રહાર કરવામાં આવ્યા છે. ગીતના શબ્દોમાં તેમણે આક્ષેપ કર્યો છે કે, લગ્ન પ્રસંગોમાં ડીજે (DJ) વગાડવા જેવા મુદ્દે આગેવાનો ત્વરિત હરકતમાં આવે છે અને બંધારણના ભંગ બદલ કડક વલણ અપનાવે છે. જોકે, બીજી તરફ ગ્રામ્ય વિસ્તારોમાં ખુલ્લેઆમ ચાલતા દારૂના દૂષણ અને તેના ચલણ સામે સમાજના આ જ આગેવાનો કોઈ નક્કર કાર્યવાહી કરતા નથી.
ગાયકે ગીત મારફતે સવાલ ઉઠાવ્યો છે કે, સામાજિક બંધારણના નિયમો શું માત્ર ગબ્બર ઠાકોર જેવા વ્યક્તિઓ માટે જ છે? તેમણે ઉમેર્યું હતું કે જ્યારે સમાજના મોટા ગણાતા લોકો અથવા આગેવાનો પોતે નિયમોનું ઉલ્લંઘન કરે છે, ત્યારે તેમની સામે કોઈ શિક્ષાત્મક પગલાં લેવામાં આવતા નથી.
ગબ્બર ઠાકોરે વધુમાં આક્ષેપ કર્યો છે કે ડીજેના મુદ્દે માત્ર તેમને જ લક્ષ્ય બનાવવામાં આવી રહ્યા છે. જ્યારે તેઓ આ અન્યાય સામે અવાજ ઉઠાવે છે અથવા ન્યાયની વાત કરે છે, ત્યારે તેમને સામાજિક સ્તરે ધમકીઓ આપવામાં આવે છે. આ ગીત હાલ સોશિયલ મીડિયાના વિવિધ પ્લેટફોર્મ પર ભારે ચર્ચાનો વિષય બન્યું છે.
ઉલ્લેખનીય છે કે ઠાકોર સમાજ દ્વારા સામાજિક કુરિવાજો દૂર કરવા અને લગ્ન જેવા પ્રસંગોમાં થતા બિનજરૂરી ખર્ચ ઘટાડવા માટે 'બંધારણ' અમલમાં મૂકવામાં આવ્યું છે. આ બંધારણ હેઠળ ડીજે વગાડવા પર પ્રતિબંધ સહિતના અનેક નિયમો બનાવવામાં આવ્યા છે. જોકે, સમયાંતરે આ નિયમોના અમલીકરણમાં પક્ષપાત થતો હોવાના આક્ષેપો થતા રહ્યા છે. આ વાયરલ વીડિયોના કારણે ઠાકોર સમાજમાં સામાજિક ન્યાય અને નિયમોની સમાનતા અંગે નવી ચર્ચા છેડાઇ શકે છે. ગાયક ગબ્બર ઠાકોરના આ ગીત બાદ હવે સમાજના અગ્રણીઓ અને આગેવાનો આ મુદ્દે શું પ્રતિક્રિયા આપે છે, તેના પર સૌની નજર ટકેલી છે.