બનાસકાંઠા ફૂડ વિભાગની મોટી કાર્યવાહી: 49 એકમોમાં ચેકિંગ, 31 કિલો શંકાસ્પદ ખોરાકનો નાશ

રાજ્ય આરોગ્ય મંત્રી પ્રફુલ પાનશેરિયાની સૂચનાથી બનાસકાંઠામાં ‘ઓપરેશન હેલ્થ’ હેઠળ ફૂડ સેફ્ટી વિભાગની મોટી કાર્યવાહી. હાઈ-વે કોરિડોર પરની 49 હોટેલ, રેસ્ટોરન્ટ અને ડેરી પાર્લરમાં ચેકિંગ કરી 31 કિલો અખાદ્ય જથ્થાનો સ્થળ પર નાશ કરાયો.

By: Jignesh ParmarEdited By:Jignesh ParmarPublish Date: Sun, 22 Nov 2026 08:24 AM (IST)Updated: Sun, 22 Nov 2026 08:24 AM (IST)
banaskantha-food-safety-raid-49-hotels-checked-31-kg-unhygienic-food-destroyed

Banaskantha Food Safety Raid: રાજ્ય આરોગ્ય મંત્રી પ્રફુલ પાનશેરિયાની સૂચના અનુસાર જાહેર જનતાના સ્વાસ્થ્યની સુરક્ષા અને ખાદ્યપદાર્થોની ગુણવત્તા જાળવવાના હેતુથી રાજ્યવ્યાપી ‘ઓપરેશન હેલ્થ’ અંતર્ગત તા. 19 નવેમ્બર, 2026થી હાઈ-વે કોરિડોર પર આવેલી હોટેલ્સ અને રેસ્ટોરન્ટ્સમાં વિશેષ તપાસ ઝુંબેશ હાથ ધરવામાં આવી છે. આ અભિયાન અંતર્ગત ખોરાક અને ઔષધ નિયમન તંત્રના ફૂડ સેફ્ટી વિભાગ, પાલનપુરની ટીમ દ્વારા સિનિયર ફૂડ સેફ્ટી ઓફિસરો, ફૂડ સેફ્ટી ઓફિસરો તેમજ ‘ફૂડ સેફ્ટી ઓન વ્હીલ્સ’ વાનની મદદથી સઘન ચેકિંગ હાથ ધરવામાં આવ્યું હતું.

આ વિશેષ ઝુંબેશ દરમિયાન બનાસકાંઠા જિલ્લામાં હાઈ-વે કોરિડોર પર આવેલી કુલ 49 હોટેલ્સ, રેસ્ટોરન્ટ્સ અને ડેરી પાર્લર સહિતના એકમોની તપાસ અને ચકાસણી કરવામાં આવી હતી. જેમાં ફૂડ સેફ્ટી ઓફિસરો દ્વારા 26 હોટેલ્સ અને રેસ્ટોરન્ટ્સની રૂબરૂ તપાસ કરવામાં આવી હતી, જ્યારે ફૂડ સેફ્ટી વાન મારફતે પણ વિવિધ એકમોમાં ખાદ્યપદાર્થોનું સ્થળ પર જ પરીક્ષણ કરવામાં આવ્યું હતું. તપાસ દરમિયાન ગંદકી અને બિનઆરોગ્યપ્રદ પરિસ્થિતિમાં સંગ્રહિત શંકાસ્પદ જણાયેલા કુલ 31 કિલોગ્રામ ખાદ્યપદાર્થોના જથ્થાનો જાહેર આરોગ્યના હિતમાં સ્થળ પર જ નાશ કરવામાં આવ્યો હતો.

ઝુંબેશના ભાગરૂપે તમામ હોટેલ્સ, રેસ્ટોરન્ટ્સ અને ડેરી પાર્લર સંચાલકોને વેચાણ માટે રાખવામાં આવતા ‘આઈસ્ક્રીમ’ અને ‘ફ્રોઝન ડેઝર્ટ’ વચ્ચેનો તફાવત ગ્રાહકો સરળતાથી જાણી શકે તે માટે સરકાર દ્વારા નિર્ધારિત માહિતીપ્રદ બોર્ડ/પોસ્ટર ફરજિયાત લગાવવા સૂચના આપવામાં આવી છે. આ ઉપરાંત તમામ ખાદ્યપદાર્થોના વિક્રેતાઓને સ્વચ્છતા જાળવવા, ખાદ્યપદાર્થોની ગુણવત્તા સુનિશ્ચિત કરવા તથા ફૂડ સેફ્ટીના નિયમોનું ચુસ્તપણે પાલન કરવા તાકીદ કરવામાં આવી છે.