Randeep Hooda Statue of Unity Visit: એકતા નગર ખાતે યોજાયેલા 72મા રાષ્ટ્રીય ફિલ્મ પુરસ્કાર સમારોહમાં સામેલ થવા આવેલા અભિનેતા રણદીપ હુડાએ વિશ્વવિખ્યાત 'સ્ટેચ્યુ ઓફ યુનિટી'ની મુલાકાત લીધી હતી. તેણે અખંડ ભારતના શિલ્પી, ભારત રત્ન સરદાર વલ્લભભાઈ પટેલની 182 મીટર ઊંચી ભવ્ય પ્રતિમાના દર્શન કરી પુષ્પાંજલિ અર્પણ કરી હતી અને દેશના એકીકરણમાં તેમના અતુલ્ય યોગદાનને યાદ કર્યું હતું. આ વિશેષ મુલાકાત દરમિયાન તેમના પરિવારજનો પણ સાથે ઉપસ્થિત રહ્યા હતા.
સરદાર સાહેબને શ્રદ્ધાંજલિ અને પરિસરનું નિરીક્ષણ
મુલાકાત દરમિયાન અભિનેતા રણદીપ હુડાએ સમગ્ર સ્ટેચ્યુ ઓફ યુનિટી પરિસરનું બારીકાઈથી અવલોકન કર્યું હતું. તેણે 135 મીટરની ઊંચાઈએ આવેલી વ્યુઇંગ ગેલેરી પરથી નર્મદા નદી તેમજ વિંધ્યાચલ અને સાતપુડાની ગિરિમાળાઓના મનમોહક અને રમણીય દૃશ્યો નિહાળ્યા હતા. આ ઉપરાંત, સરદાર પટેલના જીવનચરિત્ર અને ભારતના એકીકરણના ઐતિહાસિક ઇતિહાસને આધુનિક ટેક્નોલોજી દ્વારા પ્રદર્શિત કરતા એક્ઝિબિશન હોલની મુલાકાત લઈને વિશેષ માહિતી મેળવી હતી.
"આ યાત્રા અત્યંત ભાવુક અને અભિભૂત કરનાર રહી"
પોતાની આ મુલાકાત અંગે વિઝિટર બુકમાં પ્રતિભાવ આપતા રણદીપ હુડાએ લખ્યું હતું કે- સ્ટેચ્યુ ઓફ યુનિટીની આ યાત્રા અત્યંત ભાવુક અને અભિભૂત કરનાર રહી છે. મારા પિતા અને બાળકની સાથે એક જ સમયે આ મહાન સ્મારકની મુલાકાત લેવાનો અવસર અત્યંત યાદગાર બની રહ્યો છે.
તેણે વધુમાં ઉમેર્યું હતું કે- વિશ્વની સૌથી ઊંચી પ્રતિમાની પરિવાર સાથે મુલાકાત લેવી એ મારા માટે ગર્વની ક્ષણ છે. સરદાર પટેલે અખંડ ભારતનું નિર્માણ કર્યું છે, જેની પ્રત્યેક નાગરિકે જીવનમાં એકવાર જરૂર મુલાકાત લેવી જોઈએ.
ગરિમાપૂર્ણ ઉપસ્થિતિ અને સ્વાગત
આ અવસરે સ્ટેચ્યુ ઓફ યુનિટીના મુખ્ય કારોબારી અધિકારી અમીત અરોરા દ્વારા અભિનેતા રણદીપ હુડાનું સ્મૃતિચિહ્ન અને મોમેન્ટો આપીને સ્વાગત કરવામાં આવ્યું હતું. આ પ્રસંગે નાયબ વન સંરક્ષક પ્રસાદ રવિ રાધાકૃષ્ણ, સરદાર સરોવર નર્મદા નિગમના ચીફ એન્જિનિયર શુભમ ગોયલ, નાયબ કલેક્ટર નિરવ પારિતોષ તેમજ નાયબ જનરલ મેનેજર રાહુલ પટેલ સહિતના મહાનુભાવો ઉપસ્થિત રહ્યા હતા.