Gujarat Rain Report, 21 August: ગુજરાતમાં ચોમાસાની સિઝનમાં હળવો બ્રેક આવ્યો છે. તેમ છતાં ગાંધીનગરના સ્ટેટ ઈમરજન્સી ઓપરેશન સેન્ટર દ્વારા વહીવટી તંત્રએ જાહેર કરેલા આંકડા અનુસાર છેલ્લા 24 કલાક દરમિયાન રાજ્યના કુલ 37 તાલુકામાં હળવાથી મધ્યમ વરસાદી ઝાપટા નોંધાયા છે. જેમાં સૌથી વધુ વરસાદ ખેડા જિલ્લાના વસોમાં પડ્યો છે.
ખેડા-દાહોદ જિલ્લામાં સૌથી વધુ વરસાદ
આ પણ વાંચો
20 ઓગસ્ટના સવારે 6:00 વાગ્યાથી લઈને 21 ઓગસ્ટના સવારે 6:00 વાગ્યા સુધીના છેલ્લા 24 કલાકના સમયગાળા દરમિયાન મધ્ય ગુજરાતના ખેડા જિલ્લાના વસો તાલુકામાં સૌથી વધુ 11 મીમી (આશરે 0.42 ઈંચ) વરસાદ પડ્યો છે. જ્યારે તેના પછી બીજા ક્રમે દાહોદ જિલ્લાના ગરબાડા તાલુકામાં 10 મીમી (0.39 ઈંચ) વરસાદ ખાબક્યો છે.
દક્ષિણ ગુજરાત અને પંચમહાલમાં મેઘમહેર
દક્ષિણ ગુજરાતના આદિવાસી અને ડુંગરાળ વિસ્તાર ધરાવતા ડાંગ જિલ્લામાં પણ સારો વરસાદી માહોલ જોવા મળ્યો છે. ડાંગ જિલ્લાના વઘઇમાં 9 મીમી (0.35 ઇંચ) અને જિલ્લા મથક ડાંગ-આહવા ખાતે 8 મીમી (0.31 ઈંચ) વરસાદ નોંધાયો છે. આ ઉપરાંત ખેડા જિલ્લાના જ મહેમદાવાદ તાલુકામાં પણ 8 મીમી વરસાદ ખાબક્યો છે.
જ્યારે ખેડાના માતર અને ગળતેશ્વરમાં 6-6 મીમી, તેમજ કપડવંજમાં 5 મીમી વરસાદ નોંધાયો છે. પંચમહાલ જિલ્લાની વાત કરીએ તો હાલોલમાં 5 મીમી અને ગોધરામાં 4 મીમી વરસાદ પડ્યો છે. વલસાડ જિલ્લાના કપરાડા અને ડાંગ જિલ્લાના સુબીર તાલુકામાં પણ 5-5 મીમી વરસાદ નોંધાયો છે.
સૌરાષ્ટ્ર અને અન્ય વિસ્તારોની સ્થિતિ
સૌરાષ્ટ્ર પંથકમાં રાજકોટના જેતપુર તાલુકામાં 6 મીમી (0.24 ઈંચ) વરસાદી ઝાપટું પડ્યું છે. આ સિવાય બોટાદમાં 4 મીમી, ભાવનગરના શિહોરમાં 4 મીમી અને જૂનાગઢના મેંદરડામાં 3 મીમી વરસાદ નોંધાયો છે. નવસારીના જલાલપોર અને ખેરગામ તાલુકામાં 3-3 મિમી અને વડોદરાના દેસરમાં 3 મીમી તથા અમરેલીના લાઠીમાં 3 મીમી વરસાદની નોંધણી થઈ છે.
અન્ય તાલુકા જેવા કે તાપીના ડોલવણ, પંચમહાલના કાલોલ અને ઘોઘંબા, આણંદના સોજીત્રા, છોટાઉદેપુરના કડવાલ, દાહોદના દેવગઢબારિયા અને ખેડાના ઠાસરામાં 2-2 મીમી જેટલો નજીવો વરસાદ નોંધાયો છે. જ્યારે નર્મદાના ગરુડેશ્વર, પોરબંદર, આણંદ અને અરવલ્લીના સાઠંબા સહિતના કેટલાક તાલુકામાં માત્ર 1-1 મીમી વરસાદની નોંધ થઈ છે.