'તારી બહેનનું આજે પુરું જ કરી નાંખવું છે..!' સાળાને ફોન કરી બનેવીનો ખૂની ખેલ, મોરબીમાં પતિએ ચારિત્ર્ય પર શંકા રાખી પત્નીને રહેંસી નાંખી

Morbi: મોરબી નજીક સિરામિક ફેકટરીમાં રહીને મજૂરી કરતા પતિએ ચારિત્ર્ય બાબતે શંકા કરી હથિયારના ઘા માથા અને મોઢાના ભાગે મારી પત્નીને મોતને ઘાટ ઉતારી દીધી હોવાનો બનાવ સામે આવ્યો છે. આ બનાવની જાણ થતા બી ડિવિઝન પોલીસ ટીમ દોડી ગઈ હતી અને ગુનો નોંધી વધુ તપાસ ચલાવી છે.

મધ્ય પ્રદેશના વતની અને હાલ મોરબીના ઊંચી માંડલ મેગા સિટી સિરામિકમાં રહીને કામ કરતા પહેલવાન ટનટયાભાઈ બારેલા (ઉ.વ.41) આરોપી કાનાભાઈ ઉર્ફે પ્યારસિંગ કુકરીયાભાઈ બારેલા (રહે. મધ્ય પ્રદેશ) વાળા વિરુદ્ધ ફરિયાદ નોંધાવી છે. પોલીસ ફરિયાદમાં જણાવ્યા મુજબ, બે વર્ષ પૂર્વે ફરિયાદીના ફૂવા ચેનસિંગ બારેલાની દીકરી બિંદાના લગ્ન કાનાભાઈ બારેલા સાથે થયા હતા. બન્ને મધ્ય પ્રદેશથી મોરબી મજૂરી કરવા આવ્યા હતા.

Rajkot: મનપાની સ્ટેન્ડિંગ કમિટીની બેઠક મળી, વિધાનસભા 68ના રોડના કામને મંજૂરી મળી

જુના ઘૂટું રોડ પર આઇકોન સિરામિક કારખાનામાં મજૂરી કામ કરતા હતા. ફઈબાની દીકરી બિંદાબેનને મળવા અવારનવાર જવાનું થતું તેમજ ફોન પર વાતચીત થતી હતી. બે માસ પૂર્વે બિંદાબેને ફોન પર જણાવ્યું હતું કે, પતિ કાના ખોટી ચારિત્ર્ય અંગે શંકા કરી ઝઘડા કરે છે. આથી બિંદાને ઝઘડો ના કરવા સમજાવી હતી અને બનેવી સાથે વાતચીત કરી ઝઘડો નહિ કરી માર નહિ મારવા સમજાવીશ તેમ કહ્યું હતું અને બનેવીને ફોન કરી બિંદા સાથે ઝઘડા કરી મારકૂટ કરો છો તેમ કહ્યું હતું.

જેથી બનેવીએ તારી બહેનને કાઈ કામકાજ કરવું નથી અને કારખાનામાં બીજા કામ કરતા માણસો સાથે આખો દિવસ વાતો કરી મજાક મસ્તી કરતી હોય છે. બિંદાને ના પાડવા છતાં માનતી નથી. આથી ઝઘડા થાય છે તેવી વાતચીત થઇ હતી

ગત તા. 13ના રોજ બપોરે બહેન બિંદાનો ફોન આવ્યો કે તમે કારખાનેથી ફ્રી થઈને મારા ઘરે આવજો. તમારા બનેવીને સમજાવજો તે ચારિત્ર્ય પર શંકા કરી ઝઘડા કરે છે. મને વતનમાં જતું રહેવું છે તેવી વાત કરી હતી.

રાતના કામ પર મોડું થતા ફરિયાદી બહેનના રૂમ પર જઈ શક્યો નહિ અને સવારના સાડા 10 અગિયાર વાગ્યે બિંદાના નાણાંભાઈ જીતેનનો ફોન આવ્યો કે બિંદાબેનના પતિ કાનાભાઈ ઉર્ફે પ્યારસિંગએ બહેન સાથે ઝઘડો કરી માર મારી બિંદાને મારી નાખી છે. તમે તેના રૂમ પહોંચો અને બાદમાં બિંદાબેનના પતિનો ફોન આવ્યો કહ્યું તારી બહેનનું આજે પુરૂ કરી નાખ્યું છે.

બહેનને માથા અને મોઢા પર કોઈ હથિયારના ઘા માર્યા હતા અને લોહી નીકળતું હતું. મૃતદેહ પોસ્ટમોર્ટમ અર્થે હોસ્પિટલ ખસેડ્યો હતો. આમ આરોપી પતિ કાનાભાઈ ઉર્ફે પ્યારસિંગ બારેલાએ ચારિત્ર્ય અંગે ખોટી શંકા કરી હથિયારના ઘા ઝીકી પત્નીની હત્યા કરી હતી. મોરબી બી ડિવિઝન પોલીસે હત્યાની ફરિયાદ નોંધી તપાસ ચલાવી છે.