Integrated Ceramic Park: ગુજરાત ઔદ્યોગિક વિકાસ નિગમ (GIDC) દ્વારા મોરબીના જાંબુડિયા-પાનેલી ખાતે વિકસાવવામાં આવેલા "ઇન્ટિગ્રેટેડ સિરામિક પાર્ક" નું લોકાર્પણ કરવામાં આવ્યું છે. રાજ્યના ઔદ્યોગિક ઇતિહાસમાં એક સીમાચિહ્નરૂપ સિદ્ધિ તરીકે જોવામાં આવતી આ મહત્વપૂર્ણ પહેલ “વિકસિત ગુજરાતથી વિકસિત ભારત”ના વિઝનને સાકાર કરતી દિશામાં એક સશક્ત પગલું છે.
જાંબુડિયા-પાનેલી ખાતે GIDC નો વ્યૂહાત્મક ઔદ્યોગિક વિકાસ
ગુજરાત ઔદ્યોગિક વિકાસ નિગમ (GIDC) દ્વારા મોરબી-રાજકોટ ઔદ્યોગિક પટ્ટામાં જાંબુડિયા-પાનેલી ખાતે એક મહત્વપૂર્ણ ઇન્ટિગ્રેટેડ સિરામિક પાર્ક વિકસાવવામાં આવી રહ્યો છે. આશરે 1050 એકર વિસ્તારમાં વિસ્તરાયેલો આ પાર્ક, વિશ્વવિખ્યાત મોરબી સિરામિક ક્લસ્ટરની નજીક હોવાને કારણે મજબૂત અને સ્થાપિત ઔદ્યોગિક ઇકોસિસ્ટમનો સંપૂર્ણ લાભ મેળવે છે.
મૂલ્ય શૃંખલામાં વિસ્તરણ અને ઔદ્યોગિક અસર
આ મહત્વાકાંક્ષી પ્રોજેક્ટ સિરામિક ઉદ્યોગની સમગ્ર મૂલ્ય શૃંખલામાં હાજરીને વિસ્તૃત કરવા માટે રચાયો છે. પાર્કમાં મુખ્યત્વે ટાઇલ્સ અને સેનિટરીવેર ઉત્પાદન પર ભાર મૂકવામાં આવશે, તેમજ ઔદ્યોગિક અને એડવાન્સ્ડ સિરામિક્સ જેવા ઉચ્ચ મૂલ્યવાળા અને વિશિષ્ટ સેગમેન્ટ્સમાં નવા રોકાણોને પ્રોત્સાહન આપવામાં આવશે. આ પહેલ ગુજરાતને વૈશ્વિક સિરામિક ઉત્પાદન નકશા પર વધુ મજબૂત સ્થાન અપાવશે.
લોજિસ્ટિક્સ અને વ્યૂહાત્મક કનેક્ટિવિટી
જાંબુડિયા-પાનેલી સિરામિક પાર્કને ઉત્તમ લોજિસ્ટિક્સ અને કનેક્ટિવિટીનો લાભ મળે છે. આ વિસ્તાર રાષ્ટ્રીય ધોરીમાર્ગ NH-27 થી માત્ર 1.5 કિમી દૂર સ્થિત છે, જ્યારે મોરબીનું નજીકનું રેલ્વે સ્ટેશન 12 કિમી અંતરે આવેલું છે. ઉપરાંત, રાજકોટમાં આવેલું હિરાસર આંતરરાષ્ટ્રીય એરપોર્ટ આશરે 70 કિમી, અને મકનસર ખાતેનું ઇનલેન્ડ કન્ટેનર ડેપો માત્ર 5 કિમી દૂર છે. નવલખી (48 કિમી), કંડલા (139 કિમી) અને મુન્દ્રા (195 કિમી) જેવા મુખ્ય બંદરોની નિકટતા વૈશ્વિક નિકાસ માટે મહત્વપૂર્ણ લાભ પૂરો પાડે છે.
બેસ્પોક ઇન્ફ્રાસ્ટ્રક્ચર અને આધુનિક સુવિધાઓ
આ પાર્કની મુખ્ય વિશેષતા એ છે કે, અહીં ઉદ્યોગોની ચોક્કસ જરૂરિયાતોને અનુરૂપ બેસ્પોક ઇન્ફ્રાસ્ટ્રક્ચર (વિશિષ્ટ ઇન્ફ્રાસ્ટ્રક્ચર ) અને વિશિષ્ટ સુવિધા ઉપલબ્ધ કરાવવામાં આવશે. એસ્ટેટમાં કોમન ડિસ્પ્લે સેન્ટર, NABL-પ્રમાણિત પ્રયોગશાળા સાથેનું સેન્ટર ઓફ એક્સેલન્સ, તેમજ નવીનતાને પ્રોત્સાહન આપવા અને કાર્યબળની કુશળતા વધારવા માટે કૌશલ્ય વિકાસ કેન્દ્ર સ્થાપિત કરવામાં આવશે.
STP સાથે વીજ પુરવઠા અને પાણી પુરવઠા માટેની સુવિધા
ઉદ્યોગોની વધતી માંગને ધ્યાનમાં રાખીને 30 MLD ક્ષમતા ધરાવતી સમર્પિત પાણી પુરવઠા વ્યવસ્થા વિકસાવવામાં આવશે. વિશ્વસનીય વીજ પુરવઠા માટે એસ્ટેટની અંદર ત્રણ સબસ્ટેશન માટે જમીન ફાળવવામાં આવી છે, જેમાં બે 66 KV અને એક 220 KV ક્ષમતાવાળું સબસ્ટેશન સામેલ છે. ઉપરાંત, પર્યાવરણીય રીતે જવાબદાર કામગીરી સુનિશ્ચિત કરવા માટે ઘન કચરા વ્યવસ્થાપન વ્યવસ્થા અને સુવેઝ ટ્રીટમેન્ટ પ્લાન્ટ (STP) માટે પણ સુવિધા ઉપલબ્ધ રહેશે.
વાઇબ્રન્ટ ગુજરાત રીજનલ કોન્ફરન્સ (VGRC) કચ્છ અને સૌરાષ્ટ્ર
આગામી વાઇબ્રન્ટ ગુજરાત રીજનલ કોન્ફરન્સ (VGRC) કચ્છ અને સૌરાષ્ટ્ર દરમિયાન રાજકોટમાં સિરામિક્સ, બંદરો, લોજિસ્ટિક્સ અને ગ્રીન એનર્જી સહિત પ્રદેશના અગ્રણી ઉદ્યોગ ક્ષેત્રના પ્રતિનિધિઓ ભાગ લેશે. 11 અને 12 જાન્યુઆરી, 2026 દરમિયાન રાજકોટમાં યોજાનારી આ કોન્ફરન્સ સ્થાનિક ઉદ્યોગ, ઉદ્યોગ અગ્રણીઓ તથા રોકાણ ભાગીદારો માટે સહયોગ અને વૃદ્ધિના નવા અવસરો સર્જશે.
પ્રતિનિધિઓ જાંબુડિયા-પાનેલી સિરામિક પાર્કને ઔદ્યોગિક વિકાસ, ટેકનોલોજી અપગ્રેડેશન અને કૌશલ્ય વૃદ્ધિના મોડલ તરીકે જુએ છે. મોરબીની આસપાસ ઉપલબ્ધ વિશાળ અને કુશળ માનવ સંસાધન તેમજ ગુણવત્તાયુક્ત માળખાગત સુવિધાઓ પુરી પાડવા માટે રાજ્ય સરકાર પ્રતિબદ્ધ છે. આ મજબૂત આધારને કારણે આ પાર્ક સિરામિક ક્ષેત્રમાં ગુણવત્તા અને ટેક્નોલોજીકલ પ્રગતિનું અગ્રણી કેન્દ્ર બની રહ્યો છે.