Mehsana News: ગુજરાતની સુપ્રસિદ્ધ શક્તિપીઠ બહુચરાજી અને સંલગ્ન શંખલપુર ધામે શરદપૂર્ણિમાના પવિત્ર પર્વની ભવ્યાતિભવ્ય ઉજવણી કરવામાં આવી હતી. ચૈત્ર અને આસો મહિનાની પૂનમનું ધાર્મિક દૃષ્ટિએ વિશેષ મહત્ત્વ હોવાથી, વહેલી સવારથી જ ગુજરાતભરમાંથી હજારોની સંખ્યામાં માઈભક્તો માતાજીના દર્શનાર્થે ઉમટી પડ્યા હતા અને ભાવિકોનો આ ધસારો મોડી રાત સુધી અવિરત ચાલુ રહ્યો હતો.
ચાચરચોકમાં અલૌકિક ભક્તિભાવ
શરદપૂર્ણિમાના પાવન દિવસે મા બહુચરના દર્શનાર્થે પધારેલા શ્રદ્ધાળુઓ સંઘો સાથે આવી પહોંચ્યા હતા. મા બહુચરના જયઘોષોથી મંદિરનું ધામ ગુંજી ઉઠ્યું હતું. માઈભક્તોએ નાચતાં-ગાતાં ભક્તિમાં લીન થઈ જતાં, મંદિરના ચાચરચોકમાં એક અલૌકિક અને ભાવનાસભર વાતાવરણ સર્જાયું હતું. ભક્તો માતાજીના રંગે રંગાઈને આ ધાર્મિક ઉત્સવની ભવ્યતા માણી રહ્યા હતા.
ચાંદીની શાહી પાલખીનું મુખ્ય આકર્ષણ
શરદપૂનમની રાત્રિએ આ ઉત્સવનું સૌથી મોટું આકર્ષણ મા બહુચરની ભવ્ય પાલખી યાત્રા બની રહ્યું. માતાજીની આ શાહી સવારી 31 લાખ રૂપિયાની કિંમત અને 30 કિલો ચાંદીમાંથી બનેલી નવીન પાલખીમાં નીકળી હતી. આ ભવ્ય પાલખી અમદાવાદના આત્મ મંગળ પરિવાર દ્વારા બહુચરાજી મંદિરને અર્પણ કરવામાં આવી છે.
ચાંદીની આ પાલખીમાં બિરાજમાન થઈને માતાજીએ નિજમંદિરથી શંખલપુર ગામ સુધીની નગરચર્યા કરી હતી. પાલખી પ્રસ્થાન પામી ત્યારે પોલીસ દ્વારા ગાર્ડ ઓફ ઓનરની સલામી આપીને સન્માન કરવામાં આવ્યું હતું. ફટાકડાની આતશબાજી અને માઈભક્તોના જયઘોષ વચ્ચે મા બહુચરની પાલખી 3 કિલોમીટરનું પગપાળા અંતર કાપીને શંખલપુર ધામે પહોંચી હતી.
શંખલપુર ધામે ભવ્ય સ્વાગત
શંખલપુર ધામે માતાજીની સવારીનું મંદિરના ટ્રસ્ટી મંડળ અને ગ્રામજનો દ્વારા ભવ્યાતિભવ્ય સ્વાગત કરવામાં આવ્યું હતું. શંખલપુર મંદિરે વૈદિક મંત્રોચ્ચાર સાથે મૈયાની શાસ્ત્રોક્ત વિધિથી પૂજા-અર્ચના કરવામાં આવી હતી. માતાજીની પૂજાવિધિ સંપન્ન થયા બાદ મોડી રાત્રે ચાંદીની આ પાલખી નિજમંદિરે પરત ફરી હતી. શરદ પૂનમના આ પાવન પર્વે હજારો શ્રદ્ધાળુઓએ પાલખીયાત્રામાં ભાગ લઈને માતા બહુચરના આશીર્વાદ પ્રાપ્ત કર્યા હતા અને આસ્થાના આ દિવ્ય ઉત્સવને સફળ બનાવ્યો હતો.