Pavagadh Navratri 2026: આગામી સમયમાં શરૂ થઈ રહેલા પવિત્ર આસો નવરાત્રીના મહાપર્વ દરમિયાન માતાજીના દર્શને જતા લાખો શ્રદ્ધાળુઓની મુસાફરી સરળ અને અનુકૂળ બને તે માટે એસ.ટી. નિગમ દ્વારા અત્યારથી જ પૂરતી તૈયારીઓ કરી લેવામાં આવી છે. ગોધરા એસ.ટી. વિભાગ દ્વારા મુસાફરોની ભારે ભીડને ધ્યાનમાં રાખીને વિશેષ આયોજન કરવામાં આવ્યું છે.
તારીખ 11 થી 26 ઓક્ટોબર સુધી વિશેષ બસ સેવા
આસો નવરાત્રીના પાવન અવસરે પાવાગઢ ખાતે દેશ-વિદેશથી આવતા દર્શનાર્થીઓની સુવિધા માટે એસ.ટી. વિભાગ, ગોધરા દ્વારા તારીખ 11/10/2026 થી તા. 26/10/2026 સુધી પાવાગઢ રૂટ પર ખાસ 55 વધારાની બસો ફાળવવામાં આવી છે. આ વધારાની બસો શરૂ થવાથી મુસાફરોને લાંબી કતારોમાં રાહ જોવી પડશે નહીં અને સમયસર પોતાના ગંતવ્ય સ્થાને પહોંચી શકશે.
250 કર્મચારીઓની 'રાઉન્ડ ધ ક્લોક' તૈનાતી
બસોના સુચારુ સંચાલન અને ટ્રાફિક વ્યવસ્થાપનમાં કોઈ અડચણ ન આવે તે માટે એસ.ટી. વિભાગના અંદાજે 250 જેટલા અધિકારીઓ અને કર્મચારીઓને ચોવીસ કલાક (રાઉન્ડ ધ ક્લોક) ફરજ પર સોંપવામાં આવ્યા છે. આ સમગ્ર વ્યવસ્થા પર વિભાગના ઉચ્ચ અધિકારીઓ દ્વારા સતત મોનિટરિંગ કરવામાં આવશે, જેથી યાત્રાળુઓને કોઈપણ પ્રકારની અગવડ ન પડે.
બસ સ્ટેન્ડ પર મુસાફરો માટે વિશેષ સુવિધાઓ
નવરાત્રી દરમિયાન પાવાગઢ આવતા-જતા મુસાફરોની સગવડતાને પ્રાથમિકતા આપીને તંત્ર દ્વારા ખાસ વ્યવસ્થાઓ ઊભી કરવામાં આવી છે-
- ભીડને નિયંત્રિત કરવા માટે સ્થળ પર મંડપ અને બેઠક વ્યવસ્થા કરવામાં આવી છે.
- શ્રદ્ધાળુઓ માટે પીવાના શુદ્ધ પાણીની પૂરતી સુવિધા ઉપલબ્ધ કરાઈ છે.
- બસમાં સુરક્ષિત અને વ્યવસ્થિત રીતે ચડવા-ઉતરવા માટે ક્યુ સિસ્ટમ (લાઇન વ્યવસ્થા) ગોઠવવામાં આવી છે.
તંત્રની ધર્મપ્રેમી જનતાને અપીલ
ગોધરા એસ.ટી. વિભાગીય નિયામક દ્વારા તમામ ધર્મપ્રેમી જનતા તથા દર્શનાર્થીઓને ખાનગી વાહનોના ભારે ટ્રાફિકથી બચવા અને સુરક્ષિત મુસાફરીનો આનંદ માણવા માટે આ એસ.ટી. વિભાગની વિશેષ સુવિધાનો મહત્તમ લાભ લેવા નમ્ર અપીલ કરવામાં આવી છે.