Khel Mahakumbh 2026 Gandhinagar: ગાંધીનગર ઉત્તર વિધાનસભા દ્વારા ભારતીય જનતા પાર્ટી અને સહાય ફાઉન્ડેશનના સંયુક્ત ઉપક્રમે આયોજિત 'રમોત્સવ-2026'નો સેક્ટર-11 સ્થિત રામકથા મેદાન ખાતે ગઈકાલે રાતે પ્રારંભ થયો હતો. રાજ્યના ગૃહમંત્રી અને નાયબ મુખ્યમંત્રી હર્ષ સંઘવીના હસ્તે આ મલ્ટીસ્પોર્ટ્સ ઇવેન્ટનું ઉદ્ઘાટન કરવામાં આવ્યું હતું, જેમાં તેમની સક્રિય ઉપસ્થિતિ મુખ્ય આકર્ષણનું કેન્દ્ર બની રહી. તેમણે બેટિંગ પર હાથ અજમાવીને યુવાનોનો ઉત્સાહ વધાર્યો હતો.
ઉદ્ઘાટન સમારોહ બાદ નાયબ મુખ્યમંત્રીએ ક્રિકેટની પીચ પર બેટિંગમાં અજમાવ્યો હતો. નાયબ મુખ્યમંત્રીએ ફટકા લગાવતા ઉપસ્થિત દર્શકો, ખેલાડીઓ અને પદાધિકારીઓમાં ભારે ઉત્સાહ છવાઈ ગયો હતો. રાજકારણની વ્યસ્તતા વચ્ચે પણ રમતગમત પ્રત્યેનો તેમનો અનોખો લગાવ આ ક્ષણે સ્પષ્ટપણે જોવા મળ્યો હતો.
આ અવસરે ગાંધીનગર ઉત્તરના ધારાસભ્ય રીટાબેન પટેલે જણાવ્યું હતું કે, આ રમોત્સવનું આયોજન કરવાનો મુખ્ય ઉદ્દેશ્ય સ્થાનિક યુવા પ્રતિભાઓને યોગ્ય મંચ પૂરો પાડવાનો અને તેમને રમતગમત ક્ષેત્રે પ્રોત્સાહિત કરવાનો છે. રમોત્સવ-2026 અંતર્ગત માત્ર ક્રિકેટ જ નહીં, પરંતુ ચેસ, વોલીબોલ અને દોડ જેવી વિવિધ રમતોનું પણ આયોજન કરવામાં આવ્યું છે. 36-જીએનપીએલ ક્રિકેટ ટુર્નામેન્ટ આ સ્પર્ધાનું મુખ્ય આકર્ષણ રહેશે.
આ ભવ્ય ઉદ્ઘાટન સમારોહમાં શહેર ભાજપ પ્રમુખ આશિષભાઈ દવે સહિત અનેક પદાધિકારીઓ અને રમતપ્રેમી નાગરિકો ઉપસ્થિત રહ્યા હતા. નાયબ મુખ્યમંત્રી હર્ષ સંઘવીએ તેમના પ્રાસંગિક ઉદ્બોધનમાં આયોજકોને શુભેચ્છા પાઠવી હતી. સહાય ફાઉન્ડેશન અને ભાજપના કાર્યકરો દ્વારા ખેલાડીઓ માટે મેદાન પર તમામ આવશ્યક સુવિધાઓ સુનિશ્ચિત કરવામાં આવી છે.
નાયબ મુખ્યમંત્રી દ્વારા કરવામાં આવેલી બેટિંગે આ રમોત્સવને એક યાદગાર પ્રારંભ આપ્યો છે, જેનાથી શહેરના યુવાનોમાં રમતગમત પ્રત્યે નવી ઉર્જાનો સંચાર થયો છે. આગામી દિવસોમાં આ મલ્ટી-સ્પોર્ટ્સ ઇવેન્ટ ગાંધીનગરના રમતપ્રેમીઓ માટે એક ઉત્સવ સમાન બની રહેશે.