Gujarat Navratri Food Safety Drive: નવરાત્રી પર્વ દરમિયાન અને ત્યારબાદ પણ રાજ્યના નાગરિકોના આરોગ્યની જાળવણી માટે શુદ્ધ અને ભેળસેળરહિત ખાદ્યપદાર્થો ઉપલબ્ધ થાય તે સુનિશ્ચિત કરવા આરોગ્ય મંત્રી પ્રફુલ પાનશેરીયાએ ગાંધીનગર ખાતે ખોરાક અને ઔષધ નિયમન તંત્રના કમિશનર અને ઉચ્ચ અધિકારીઓ સાથે એક મહત્વપૂર્ણ સમીક્ષા બેઠક યોજી હતી. આ બેઠકમાં આરોગ્ય મંત્રીએ સ્પષ્ટ કર્યું હતું કે, શુદ્ધ અને ભેળસેળમુક્ત ખોરાક મેળવવો એ ગુજરાતના પ્રત્યેક નાગરિકનો હક છે.
મોબાઈલ ફૂડ ટેસ્ટિંગ વાન દ્વારા સ્થળ પર જ તપાસ
આરોગ્ય મંત્રી પ્રફુલ પાનશેરીયાએ ભારપૂર્વક જણાવ્યું કે, નવરાત્રિ દરમિયાન મીઠાઈ, ફરસાણ, દૂધ અને ઘી જેવા ખાદ્ય પદાર્થોમાં થતી ભેળસેળ રોકવા માટે રાજ્યમાં મોબાઈલ ફૂડ ટેસ્ટિંગ વાન કાર્યરત રહેશે. આ વાહનો સ્થળ પર જ ખાદ્ય સામગ્રીની ગુણવત્તા ચકાસશે. આ ઉપરાંત, ભેળસેળયુક્ત કે હલકી ગુણવત્તાનો ખોરાક વેચનારાઓ સામે રાજ્ય સરકાર દ્વારા કડકમાં કડક કાનૂની પગલાં ભરવામાં આવશે તેવી મંત્રીએ સ્પષ્ટ ચીમકી પણ આપી હતી.
નાગરિકોને જાગૃત રહેવા અપીલ, ફરિયાદની સુવિધા
આરોગ્ય મંત્રીએ જનતાને જાગૃત કરતા અપીલ કરી હતી કે, શુદ્ધ અને પૌષ્ટિક આહાર ગ્રહણ કરવો એ દરેક નાગરિકનો અધિકાર છે. ગ્રાહકો હોટેલ કે રેસ્ટોરન્ટના રસોડાની સ્વચ્છતાની ચકાસણી જાતે જ કરી શકે છે. જો ક્યાંય પણ અસ્વચ્છતા માલૂમ પડે, તો નાગરિકો તુરંત તેની સત્તાવાર ફરિયાદ ખોરાક અને ઔષધ નિયમન તંત્રની કચેરી, ગાંધીનગર ખાતે નોંધાવી શકે છે.
હોસ્ટેલ-કેન્ટીનમાં સ્પેશિયલ ડ્રાઈવના પરિણામો
મંત્રી પ્રફુલ પાનશેરીયાના માર્ગદર્શન હેઠળ ગુજરાત રાજ્ય ખોરાક અને ઔષધ નિયંત્રણ તંત્ર દ્વારા 14 થી 28 સપ્ટેમ્બર 2026 દરમિયાન રાજ્યવ્યાપી હોસ્ટેલ-કેન્ટીન સ્પેશિયલ ડ્રાઈવ હાથ ધરવામાં આવી હતી. આ ડ્રાઈવ દરમિયાન કુલ 1407 હોસ્ટેલ-કેન્ટીનની તપાસ કરવામાં આવી હતી. જેમાં 259 સરકારી, 303 અર્ધસરકારી તથા 845 ખાનગી એકમોનો સમાવેશ થાય છે.
તપાસ દરમિયાન ક્ષતિઓ જણાતાં કુલ 328 હોસ્ટેલ-કેન્ટીનને ઈમ્પ્રુવમેન્ટ નોટિસ આપવામાં આવી હતી, તથા 459 હોસ્ટેલ-કેન્ટીનના ખાદ્ય નમૂનાઓ લઈને લેબોરેટરીમાં ચકાસણી માટે મોકલવામાં આવ્યા હતા. આ ઝુંબેશ દરમિયાન 16 એકમો સ્વૈચ્છિક રીતે બંધ કરવામાં આવ્યા હતા, તેમજ 5 એકમોના લાયસન્સ સસ્પેન્ડ કરવામાં આવ્યા હતા.
કાયમી ધોરણે કામગીરી ચાલુ રાખવા કડક આદશે
આરોગ્ય મંત્રી પાનશેરીયાએ જણાવ્યું હતું કે, આ આહાર સુરક્ષા અભિયાન માત્ર તહેવારો પૂરતું મર્યાદિત ન રહેતા કાયમી ધોરણે ચાલુ રહેવું જોઈએ, જેથી નાગરિકોના સ્વાસ્થ્ય સાથે કોઈ ચેડાં ન થાય અને દરેકને શુદ્ધ ખોરાક મળતો રહે. આ ઉપરાંત, ખાસ કરીને સુરત, અમદાવાદ અને વડોદરા જેવી મહાનગરપાલિકાની ટીમો દ્વારા દિવસ-રાત કરવામાં આવતી ચકાસણી કામગીરીને તેમણે અત્યંત પ્રશંસનીય ગણાવી હતી.