Cancer Vaccine Free Gujarat: દીકરીનું દીર્ઘાયુષ્ય અને સ્વાસ્થ્ય દરેક માતા-પિતા માટે સર્વોપરી હોય છે. મહિલાઓમાં અતિ ગંભીર નીવડતા ગર્ભાશયના મુખના કેન્સર (સર્વાઇકલ કેન્સર) સામે કિશોરીઓને સુરક્ષા કવચ પૂરું પાડવામાં ગુજરાતે દેશભરમાં અગ્રેસર સ્થાન મેળવ્યું છે.
મુખ્યમંત્રી ભૂપેન્દ્ર પટેલના નેતૃત્વ હેઠળ રાજ્યમાં 14 વર્ષની 9.30 લાખથી વધુ દીકરીઓનું એચપીવી (HPV) રસીકરણ સફળતાપૂર્વક સંપન્ન થયું છે. દીકરીઓના નિરોગી ભવિષ્ય માટે વરદાનરૂપ આ મહાઅભિયાન વિશે વિગતવાર જાણીએ.
સર્વાઇકલ કેન્સર સામે આજીવન રક્ષણ
રાજ્ય સરકારની મક્કમ કટિબદ્ધતાના પરિણામે લક્ષિત વયજૂથની કિશોરીઓનું વિનામૂલ્યે રસીકરણ પૂર્ણ કરી ગુજરાતે સમગ્ર દેશ સમક્ષ ઉત્કૃષ્ટ ઉદાહરણ પૂરું પાડ્યું છે. કિશોરાવસ્થામાં આપવામાં આવતી આ HPV રસી દીકરીઓને ભવિષ્યમાં થતા સર્વાઇકલ કેન્સર સામે આજીવન રક્ષણ અને સુરક્ષા પૂરી પાડે છે.
'સેવા પર્વ'માં 10 જ દિવસમાં 1.47 લાખ દીકરીઓનું રસીકરણ
ગુજરાતની આ સરાહનીય કામગીરીને બિરદાવીને કેન્દ્ર સરકારે રાજ્યને વધારાના 2.92 લાખ ડોઝ ફાળવ્યા છે. વડાપ્રધાનના જન્મદિને શરૂ થયેલા 'સેવા પર્વ' અંતર્ગત માત્ર 10 દિવસના ટૂંક સમયમાં જ 1.47 લાખથી વધુ દીકરીઓનું સફળતાપૂર્વક રસીકરણ કરવામાં આવ્યું હતું.
સંપૂર્ણ સલામત રસી: PHC અને CHC કેન્દ્રો પર ડોઝ ઉપલબ્ધ
ગાંધીનગરના મોટી આદરાજ પ્રાથમિક આરોગ્ય કેન્દ્ર (PHC) સહિત સમગ્ર રાજ્યમાં અપાયેલી આ રસી સંપૂર્ણપણે સલામત અને આડઅસરમુક્ત છે. હવે જે કિશોરીઓ રસી લેવામાં બાકી રહી ગઈ છે, તેમના માટે રાજ્યની પ્રાથમિક આરોગ્ય કેન્દ્રો (PHC), સામુદાયિક આરોગ્ય કેન્દ્રો (CHC) અને સરકારી હોસ્પિટલોમાં 2.72 લાખ ડોઝ ઉપલબ્ધ કરાવાયા છે.
31 ડિસેમ્બર, 2026 સુધી લંબાવાઈ મુદત
રાજ્યની એક પણ દીકરી આ જીવનરક્ષક રસીથી વંચિત ન રહે તે સુનિશ્ચિત કરવા માટે ગુજરાત સરકારે આ ખાસ રસીકરણ અભિયાનની મુદત 31 ડિસેમ્બર, 2026 સુધી લંબાવવાનો મહત્ત્વનો નિર્ણય લીધો છે. માતા-પિતાની જાગૃતિ અને સમયસરનું આ રસીકરણ જ ગુજરાતની દીકરીઓને કેન્સરમુક્ત, સ્વસ્થ અને સુરક્ષિત ભવિષ્યની ભેટ આપશે.