Gujarat E-Detection System: ગુજરાતના હાઈવે પર મુસાફરી કરતા ખાનગી વાહનચાલકો માટે મહત્વના સમાચાર સામે આવ્યા છે. માર્ગ સલામતી વધારવા અને ટ્રાફિકના નિયમોનું કડક પાલન કરાવવાના હેતુથી રાજ્યમાં હવે ખાનગી કાર અને અન્ય ખાનગી વાહનોના દસ્તાવેજોની ચકાસણી પણ ઈ-ડિટેક્શન સિસ્ટમ મારફતે કરવામાં આવશે. વાહન વ્યવહાર કમિશનરની કચેરી દ્વારા આ દિશામાં કાર્યવાહી આગળ ધપાવવામાં આવી રહી છે અને વાહનચાલકોને પોતાના કાગળિયાં અપડેટ રાખવા તાકીદ કરાઈ છે.
અત્યાર સુધી માત્ર ભારે અને માલવાહક વાહનો પૂરતી મર્યાદિત હતી વ્યવસ્થા
આ પહેલાં રાજ્યના વિવિધ હાઈવે પર આવેલા ટોલ પ્લાઝા ખાતે ઈ-ડિટેક્શન સિસ્ટમનો ઉપયોગ મુખ્યત્વે કોમર્શિયલ વાહનો પૂરતો સીમિત હતો. ટ્રક, બસ અને માલસામાનની હેરફેર કરતી ગાડીઓની વિગતો આ સિસ્ટમ દ્વારા તપાસવામાં આવતી હતી. હવે સરકાર અને તંત્ર દ્વારા આ નેટવર્કનો વ્યાપ વધારીને રોજિંદી અવરજવર કરતા ખાનગી વાહનોને પણ તેની હેઠળ લાવવાનો નિર્ણય લેવાયો છે, જેથી નિયમો ભંગ કરનારા વાહનો સરળતાથી ઝડપાઈ શકે.
ટોલ પ્લાઝા પર નંબર પ્લેટ સ્કેન થતાં જ ખુલશે સમગ્ર કુંડળી
હાઈવે પરના ટોલ પ્લાઝા પર ગોઠવવામાં આવેલા હાઈ-રિઝોલ્યુશન કેમેરા વાહન પસાર થાય ત્યારે તેની નંબર પ્લેટ ઝડપી લે છે. સ્કેનિંગ બાદ આ નંબર સીધો સિસ્ટમ સાથે જોડાયેલા ડેટાબેઝ સાથે મેચ થાય છે અને વાહનના જરૂરી દસ્તાવેજો સક્રિય છે કે કેમ તથા તેની મુદત પૂરી થઈ ગઈ છે કે કેમ તેની ઓટોમેટિક ચકાસણી થાય છે. આ પ્રક્રિયા ઝડપી અને ડિજિટલ હોવાથી વાહનચાલકોને ટોલ પર ઊભા રાખીને મેન્યુઅલ તપાસ કરવાની જરૂર રહેતી નથી.
વાહનચાલકોએ આ 3 દસ્તાવેજો અપડેટ રાખવા અનિવાર્ય
નવી વ્યવસ્થા હેઠળ હાઈવે પર નીકળતા દરેક ખાનગી વાહનચાલકે પોતાના વાહનના ત્રણ મુખ્ય દસ્તાવેજો સમયસર અપડેટ રાખવા પડશે. જો આમાંથી કોઈ પણ એક દસ્તાવેજની મુદત પૂરી થઈ ગઈ હશે તો સિસ્ટમમાં ખામી નોંધાશે.
PUC (પ્રદૂષણ નિયંત્રણ પ્રમાણપત્ર): વાહનમાંથી નીકળતો ધુમાડો નિયંત્રણમાં છે કે નહીં તે દર્શાવતું PUC સર્ટિફિકેટ માન્ય અને ચાલુ હોવું ફરજિયાત છે.
વીમો (Insurance): અકસ્માત કે અન્ય નુકસાન સામે રક્ષણ આપતો વાહનનો વીમો એક્ટિવ હોવો જરૂરી છે.
રજિસ્ટ્રેશન (RC): વાહનનું રજિસ્ટ્રેશન માન્ય હોવું જોઈએ અને તેમાં કોઈ પ્રકારની કાનૂની કે મુદત સંબંધી અડચણ ન હોવી જોઈએ.
મુદત વીતી હશે તો ઘરે બેઠા આવશે ઈ-ચલણ
ઈ-ડિટેક્શન દ્વારા થતી તપાસમાં જો કોઈ વાહનનો વીમો, PUC અથવા રજિસ્ટ્રેશન અમાન્ય જણાય કે તેની સમયમર્યાદા પૂરી થઈ ગઈ હોવાનું સામે આવે, તો નિયમો અનુસાર વાહનમાલિકને ઈ-ચલણ મોકલવાની કાર્યવાહી હાથ ધરવામાં આવશે. ઘણીવાર વાહનચાલકો કાગળિયાંની એક્સપાયરી ડેટ ભૂલી જતા હોય છે, પરંતુ હવે આ બેદરકારી સીધા દંડમાં પરિણમી શકે છે.
મુસાફરી પહેલાં કાગળિયાં તપાસવા તંત્રની અપીલ
વાહન વ્યવહાર કમિશનરની કચેરીએ નાગરિકોને અપીલ કરી છે કે લાંબી કે ટૂંકી મુસાફરી પર નીકળતા પહેલાં પોતાના વાહનના તમામ દસ્તાવેજોની વેલિડિટી અગાઉથી ચકાસી લે. સમયસર રિન્યુઅલ કરાવવાથી હાઈવે પર થતી સંભવિત મુશ્કેલી અને ઈ-ચલણની કાર્યવાહી બંનેથી બચી શકાય છે. સાથોસાથ ટ્રાફિકના નિયમોનું પાલન કરી સુરક્ષિત ડ્રાઈવિંગ કરવા પણ જનતાને અનુરોધ કરાયો છે.
