Gujarat Budget 2026-27 Latest News: આગામી સમયમાં આવનારા ગુજરાતના બજેટ સેશન પૂર્વે ગુજરાત વિધાનસભાની મહત્વપૂર્ણ કામકાજ સલાહકાર સમિતિની બુધવારે પુન:રચના કરવામાં આવી છે. 10 સભ્યોની સમિતિમાં મહિલા મંત્રીને પણ સ્થાન આપવામાં આવ્યું છે. રાજ્ય મંત્રીમંડળમાં તાજેતરમાં થયેલા ફેરબદલને કારણે ખાલી પડેલી જગ્યાઓ ભરવા અને વિધાનસભાના સુચારુ સંચાલન માટે આ સમિતિનું પુનર્ગઠન કરાયું છે.
ગુજરાત વિધાનસભા સચિવાલય દ્વારા આ અંગે સત્તાવાર જાહેરાત કરવામાં આવી હતી. આ પુન:રચના વિધાનસભાના સુચારુ અને કાર્યક્ષમ સંચાલન માટે અનિવાર્ય હોવાનું જણાવાયું છે. આ સમિતિ વિધાનસભાના કામકાજની રૂપરેખા, કાર્યસૂચિ અને મહત્વપૂર્ણ વિધેયકો પર નિર્ણય લેવામાં કેન્દ્રીય ભૂમિકા ભજવે છે. તે વિધાનસભા સત્રો દરમિયાન કાયદાકીય પ્રક્રિયાઓને સુવ્યવસ્થિત કરવા અને સમયસર પૂર્ણ કરવામાં મદદરૂપ થાય છે. ગુજરાત વિધાનસભા સચિવાલય દ્વારા જારી કરાયેલી યાદી અનુસાર, નવી રચાયેલી કામકાજ સલાહકાર સમિતિના સભ્યો આ મુજબ છે:
- અધ્યક્ષ શંકર ચૌધરી
- મુખ્યમંત્રી ભુપેન્દ્ર પટેલ
- નાયબ મુખ્યમંત્રી હર્ષ સંઘવી
- કેબિનેટ મંત્રી કનુ દેસાઇ
- કેબિનેટ મંત્રી જીતુ વાઘાણી
- સંસદીય બાબતોના મંત્રી ઋષિકેશ પટેલ
- કેબિનેટ મંત્રી કુંવરજી બાવળીયા
- રાજ્યકક્ષાના મંત્રી ડૉ. મનિષા વકીલ
- સરકારના મુખ્ય દંડક બાળકૃષ્ણ ખંડેરાવ શુક્લ
- કોંગ્રેસ પક્ષના નેતા ડૉ. તુષાર ચૌધરી
ગુજરાત વિધાનસભાના નિયમ-190 અન્વયે, અધ્યક્ષ આ સમિતિના પ્રમુખ તરીકે કાર્યભાર સંભાળશે. આ પુન:રચનાનો મુખ્ય ઉદ્દેશ્ય વિધાનસભાના કાયદાકીય કાર્યોના સંચાલન માટે અનુભવી અને મહત્વપૂર્ણ નેતાઓને એક મંચ પર લાવવાનો છે, જેથી આગામી વિધાનસભા સત્રો દરમિયાન કાર્યક્ષમતા અને સત્તાપક્ષ તેમજ વિપક્ષ વચ્ચે સુમેળ સુનિશ્ચિત કરી શકાય.