Gandhinagar News: ગાંધીનગરના સેક્ટર-5 વિસ્તારમાં છેલ્લા ચાર દિવસથી ઝરખ (Hyena) ખુલ્લેઆમ આંટાફેરા મારી રહ્યું હોવાની ફરિયાદો ઉઠી છે. પાટનગરના રહેણાંક વિસ્તારમાં વન્ય પ્રાણી દેખાતા સ્થાનિક રહીશોમાં ફફડાટ ફેલાયો છે. સ્થાનિકોનો દાવો છે કે, ઝરખે અત્યાર સુધીમાં 3 જેટલી નીલગાયનું મારણ કર્યું છે. વન વિભાગની ટીમે તપાસ હાથ ધરી હોવા છતાં ઝરખ વિસ્તારમાં ફરતું હોવાનું પણ માનવું છે.
ત્રણ નીલગાયનો શિકાર કર્યાનો પણ દાવો
હરિયાળા શહેર તરીકે ઓળખાતા ગાંધીનગરના રહેણાંક વિસ્તારમાં વન્ય પ્રાણીઓની અવરજવર વધી રહી હોવાના કારણે સ્થાનિકોમાં ચિંતા જોવા મળી રહી છે. સેક્ટર-5 વિસ્તારમાં છેલ્લા 4 દિવસથી એક ઝરખ આંટાફેરા મારી રહ્યું હોવાની ફરિયાદો છે. સ્થાનિક રહીશોના જણાવ્યા અનુસાર, ઝરખે આ વિસ્તારમાં શિકાર કરવાનું પણ શરૂ કર્યું છે.
સ્થાનિકોએ દાવો કર્યો છે કે ઝરખે અત્યાર સુધીમાં વિસ્તારમાં ફરતી 3 જેટલી નીલગાયનું મારણ કર્યું છે. નીલગાય જેવા મોટા પ્રાણીનો શિકાર થયાના દાવાને પગલે રહીશોમાં ગભરાટ વધુ વધ્યો છે. રહેણાંક વિસ્તારમાં વન્ય પ્રાણીની હાજરીને કારણે ખાસ કરીને નાના બાળકો અને વૃદ્ધોની સુરક્ષા અંગે સ્થાનિકો ચિંતા વ્યક્ત કરી રહ્યા છે.
વન વિભાગની ટીમે સઘન તપાસ હાથ ધરી
ઝરખની સતત અવરજવર અને શિકારની ઘટના અંગે સ્થાનિક નાગરિકોએ તાત્કાલિક વન વિભાગને જાણ કરી હતી. ફરિયાદ મળતા જ વન વિભાગની ટીમ ઘટના સ્થળે દોડી ગઈ અને વિસ્તારમાં તપાસ હાથ ધરી હતી. જોકે, વન વિભાગની કામગીરી છતાં ઝરખ હજુ પણ વિસ્તારમાં હોવાનો અને તેના આંટાફેરા ચાલુ હોવાનો સ્થાનિકોનો દાવો છે.
સવાર-સાંજ વોક માટે નીકળતા લોકોમાં ભય
ગાંધીનગરમાં મોટી સંખ્યામાં લોકો વહેલી સવારે મોર્નિંગ વોક માટે અને મોડી સાંજે ચાલવા માટે ઘરની બહાર નીકળતા હોય છે. પરંતુ સેક્ટર-5 અને આસપાસના વિસ્તારોમાં ઝરખની હાજરીના અહેવાલોને પગલે લોકોમાં ભયનો માહોલ છે. લોકોના જણાવ્યા અનુસાર, કેટલાક રહીશોએ સાવચેતીના ભાગરૂપે સવાર-સાંજ ઘરની બહાર નીકળવાનું ટાળવાનું શરૂ કર્યું છે.
ઝરખને પકડી જંગલમાં ખસેડવાની લોકમાંગ
સેક્ટર-5 ના રહીશોએ વન વિભાગ સમક્ષ વિસ્તારમાં સઘન પેટ્રોલિંગ કરવાની માંગ કરી છે. આ ઉપરાંત યોગ્ય સ્થળોએ પાંજરાં ગોઠવીને ઝરખને વહેલી તકે પકડી જંગલ વિસ્તારમાં ખસેડવામાં આવે તેવી રજૂઆત પણ કરી છે. વન વિભાગ દ્વારા અસરકારક કાર્યવાહી કરવામાં આવે તેવી સ્થાનિકો આશા રાખી રહ્યા છે.
