Gandhinagar: ઉત્તર પ્રદેશના રાજ્યપાલ આનંદીબેન પટેલે આજરોજ ગાંધીનગર સ્થિત નેશનલ ફોરેન્સિક સાયન્સિસ યુનિવર્સિટી (NFSU)ની મુલાકાત લીધી હતી. જ્યાં તેમની હાજરીમાં ઉત્તર પ્રદેશની ત્રણ યુનિવર્સિટીઓએ ફોરેન્સિક સાયન્સ ક્ષેત્રમાં ક્ષમતા-નિર્માણ માટે NFSU સાથે સમજૂતી કરાર કર્યા હતા.
આ તકે આનંદીબેન પટેલે NFSUના રિસર્ચરો અને અધ્યાપક ગણ સાથે વાતચીત કરી હતી. આ સાથે જ NFSUના કુલપતિ અને પદ્મશ્રીથી સન્માનિત ડૉ. જે.એમ. વ્યાસ સાથે ફોરેન્સિક સાયન્સ ક્ષેત્રે પ્રગતિમાં NFSUની વર્તમાન અને ભવિષ્યની ભૂમિકા અંગે વિસ્તૃત ચર્ચા પણ કરી હતી.
લખનઉ સ્થિત ડૉ. એપીજે અબ્દુલ કલામ ટેકનિકલ યુનિવર્સિટી (AKTU)ના કુલપતિ પ્રો. જે.પી. પાંડે, કાનપુર સ્થિત હાર્કોર્ટ બટલર ટેકનિકલ યુનિવર્સિટી (HBTU)ના કુલપતિ, પ્રો. સમશેર અને ગોરખપુર સ્થિત મદન મોહન માલવીયા યુનિવર્સિટી ઓફ ટેકનોલોજી (MMTU)ના કુલપતિ પ્રો. જય પ્રકાશ સૈની અને નેશનલ ફોરેન્સિક સાયન્સિસ યુનિવર્સિટી (NFSU)ના કુલપતિ ડો. જે.એમ. વ્યાસે સમજૂતી કરાર પર હસ્તાક્ષર કર્યા હતા.
આ પણ વાંચો
પોતાના વક્તવ્ય દરમિયાન ઉત્તર પ્રદેશના રાજ્યપાલ આનંદીબેન પટેલે જણાવ્યું કે, ગુજરાતે શિક્ષણના ક્ષેત્રમાં પણ પોતાને એક ‘મોડેલ સ્ટેટ’ તરીકે સ્થાપિત કર્યું છે. 70થી વધુ યુનિવર્સિટીઓ સાથે ગુજરાત વિવિધ શાખાઓમાં શૈક્ષણિક પ્રગતિની વિશાળ તક પૂરી પાડે છે. આ યુનિવર્સિટીઓમાં નેશનલ ફોરેન્સિક સાયન્સિસ યુનિવર્સિટી (NFSU) ફોરેન્સિક વિજ્ઞાનને સમર્પિત એક વિશિષ્ટ યુનિવર્સિટી તરીકે કાર્ય કરી રહી છે.
NFSU શૈક્ષણિક શ્રેષ્ઠતા અને દૈનિક ઉપયોગ વચ્ચેના અંતરને દૂર કરવામાં મહત્ત્વનો ભાગ ભજવી રહી છે. ભારતના શૈક્ષણિક અને વૈજ્ઞાનિક પરિદૃશ્યને મજબૂત બનાવતી આ પ્રકારની વિશિષ્ટ યુનિવર્સિટીની દેશના તમામ રાજ્યોમાં સ્થાપના થાય તેવી આકાંક્ષા વધી રહી છે. NFSUને વિશ્વ કક્ષાના સંસ્થાન તરીકે નિર્માણ કરવામાં ડૉ. જે.એમ. વ્યાસના સમર્પણ-નિષ્ઠાને હું બિરદાવું છું.
NFSU ખાતે નિર્માણ પામેલા 'મેક ઈન ઇન્ડિયા' ઉત્પાદનો, જેમ કે મોબાઇલ ફોરેન્સિક વાન, સાયબર કિઓસ્ક, NDPS ડ્રગ ટેસ્ટિંગ કીટ વગેરેને પણ રાજ્યપાલે નિહાળ્યા હતા. ઉત્તર પ્રદેશના રાજ્યપાલે વિવિધ અત્યાધુનિક માળખાગત સુવિધાઓ જેમ કે સેન્ટર ઓફ એક્સેલન્સ ઇન સાયબર સિક્યુરિટી, બેલિસ્ટિક્સ રિસર્ચ સેન્ટર એન્ડ ટેસ્ટિંગ રેન્જ, સેન્ટર ઓફ એક્સેલન્સ ઇન DNA ફોરેન્સિક્સ અને સેન્ટર ઓફ એક્સેલન્સ ઇન ડિજિટલ ફોરેન્સિક્સ, સેન્ટર ઓફ એક્સેલન્સ ઇન ઇન્વેસ્ટિગેટિવ એન્ડ ફોરેન્સિક સાયકોલોજીની મુલાકાત પણ લીધી હતી.
આ પ્રસંગે પ્રો. (ડૉ.) એસ.ઓ. જુનારે, કેમ્પસ ડાયરેક્ટર, NFSU-ગાંધીનગર દ્વારા પ્રેઝન્ટેશન રજૂ કરવામાં આવ્યું હતું. તેમણે NFSUની વિવિધ પ્રવૃત્તિઓ અંગેની વિસ્તૃત માહિતી આપી હતી.