ગાંધીનગર લોકસભામાં હરિયાળી ક્રાંતિ, 1 કરોડ વૃક્ષોનું વાવેતર થશે; અમદાવાદથી અમિત શાહ કરાવશે અભિયાનનો પ્રારંભ

400 પ્લોટમાં વૃક્ષારોપણ, અમદાવાદમાં 38

ચાલુ વર્ષે "એક પેડ મા કે નામ" અભિયાન અંતર્ગત 1 કરોડ વૃક્ષો વાવવાનો અને તેના જતનનો લક્ષ્યાંક છે. આ માટે અંદાજિત 400 જેટલા પ્લોટ શોધવામાં આવ્યા, જેમાંથી 38 પ્લોટ માત્ર અમદાવાદમાં જ છે. આ માટે કલેક્ટરના પ્લોટ, ગૌચરની જમીન અને ખાલી પડેલી જગ્યાનો ઉપયોગ કરાશે. દરેક કાર્યકર્તાને ચોક્કસ પ્લોટની જવાબદારી સોંપવામાં આવી છે, અને તેઓ રોજ વૃક્ષોની સંભાળ અને મોનીટરીંગ કરશે.

એક કરોડ વૃક્ષો વાવવાનું લક્ષ્યાંક

વિધાનસભાનું નામ	વૃક્ષોની સંખ્યા
ગાંધીનગર ઉત્તર	21,23,459
ઘાટલોડિયા	4,46,996
કલોલ	16,64,675
નારણપુરા	79,400
સાબરમતી	1,43,192
સાણંદ	52,64,504
વેજલપુર	3,87,800
કુલ	1,01,10,026

કયા વિસ્તારમાં કેટલા વૃક્ષો વવાશે?

આ અભિયાન હેઠળ લાખો વૃક્ષોનું આયોજનબદ્ધ રીતે વાવેતર થશે. વૃક્ષારોપણના મુખ્ય આંકડા મુજબ:

• સાણંદના મખીયાવ ગામ નજીક: 10 લાખ
• સરખેજના મકતમપુરામાં: 8.50 લાખ
• ગાંધીનગરના પીપળજ ગામ નજીક: 6 લાખ
• સાયન્સ સિટીમાં: 4 લાખ
• સાબરમતી રેલવે કોલોની: 60 હજાર
• કલોલમાં: 60 હજાર
• ગોતામાં: 50 હજાર

વિવિધ સંસ્થાઓ-સોસાયટીનો સહકાર મળશે

આ મહાઅભિયાનમાં ધાર્મિક સંસ્થાઓ, NGO અને બિલ્ડરોએ પણ ભાગીદારી નોંધાવી છે. ખાસ કરીને સ્વામિનારાયણ સંસ્થા અને ભાગવત વિદ્યાપીઠ જેવી સંસ્થાએ મોટી જવાબદારી લીધી છે. આ સાથે જ, કેન્દ્રીય ગૃહમંત્રીએ ગાંધીનગર લોકસભાની તમામ સોસાયટીના ચેરમેન અને સેક્રેટરીને પત્ર લખીને અપીલ કરી છે કે સોસાયટી-ફ્લેટની આસપાસ ઓછામાં ઓછા 11 અને ગ્રામ્ય વિસ્તારોમાં ઓછામાં ઓછા 50 જેટલા લાંબુ આયુષ્ય ધરાવતા વૃક્ષ વાવે.

ગાંધીનગરના ગ્રીન કવરમાં ધરખમ વધારો

કેન્દ્રીય ગૃહમંત્રી અમિત શાહ દ્વારા વર્ષ 2019 થી જ ગાંધીનગરને હરિયાળી લોકસભા બનાવવાની ઝુંબેશ ચલાવવામાં આવી રહી છે. દર વર્ષે લાખો વૃક્ષો વાવવાના પરિણામે ગાંધીનગર લોકસભા વિસ્તારના ગ્રીન કવરમાં 11.25 ટકાનો નોંધપાત્ર વધારો જોવા મળ્યો છે. આ ઉપરાંત, છેલ્લા 4 વર્ષમાં 100થી વધુ ઓક્સિજન પાર્ક તૈયાર કરવામાં આવ્યા છે.