પ્રશાંત ગજ્જર, Chhota Udepur News: છોટા ઉદેપુર જિલ્લાના નસવાડી તાલુકામાંથી એક ચોંકાવનારી ઘટના સામે આવી છે, જ્યાં માત્ર 500 રૂપિયામાં નકલી જાતિના દાખલા બનાવી આપવાનું મોટું કૌભાંડ પકડાયું છે. આ મામલે નસવાડી મામલતદાર દ્વારા પોલીસ મથકે સત્તાવાર ફરિયાદ નોંધાવવામાં આવી છે.
કૌભાંડનો પર્દાફાશ કેવી રીતે થયો?
નસવાડી મામલતદાર કચેરીમાંથી અનુસૂચિત આદિજાતિનું પ્રમાણપત્ર મેળવવામાં વિલંબ થઈ રહ્યો હતો. આ વિલંબથી કંટાળીને નસવાડીના જ એક સ્થાનિક વ્યક્તિએ શોર્ટકટ અપનાવ્યો અને રૂ. 500 ચૂકવીને આ કૌભાંડીઓ પાસેથી ખોટો જાતિનો દાખલો મેળવી લીધો હતો.
જ્યારે આ નકલી દાખલાની વિગતો મામલતદારના ધ્યાને આવી, ત્યારે સમગ્ર કૌભાંડનો પર્દાફાશ થયો હતો. તાત્કાલિક ધોરણે મામલતદાર કચેરી દ્વારા આ મામલે નસવાડી પોલીસ મથકે ફરિયાદ દાખલ કરવામાં આવી છે.
મોડસ ઓપરેન્ડી: અસલી દાખલાને સ્કેન કરીને બનાવતા નકલી સર્ટિફિકેટ
પ્રાથમિક તપાસમાં બહાર આવ્યું છે કે, આરોપીઓ ખૂબ જ ચાલાકીથી અસલી જાતિના દાખલાને સ્કેન કરી લેતા હતા અને ત્યારબાદ તેમાં સ્કેનર કે એડિટિંગ ટૂલ્સની મદદથી નામ, સરનામું અને અન્ય વિગતો બદલીને અસલ જેવા જ દેખાતા હૂબહૂ નકલી પ્રમાણપત્રો તૈયાર કરતા હતા. આ કારોબાર માટે આરોપીએ નસવાડી ટાઉનમાં જ એક ખાનગી ઓફિસ ખોલી હતી, જ્યાંથી આ ગેરકાયદેસર પ્રવૃત્તિ બેરોકટોક ચલાવવામાં આવી રહી હતી.
પોલીસ તપાસ અને આગળની કાર્યવાહી
આ ઘટનાની ગંભીરતાને ધ્યાનમાં રાખીને નસવાડી પોલીસે આ કેસમાં ઊંડાણપૂર્વક તપાસ શરૂ કરી છે. પોલીસનું માનવું છે કે, આ કોઈ છૂટોછવાયો બનાવ નથી, પરંતુ આ રેકેટ પાછળ મોટું નેટવર્ક સંકળાયેલું હોઈ શકે છે. પોલીસ તપાસમાં અગાઉ પણ મોટા પ્રમાણમાં આવા નકલી જાતિના દાખલા બનાવીને નાગરિકોને આપવામાં આવ્યા હોવાના ખુલાસા થવાની પૂરેપૂરી શક્યતા છે.
હાલ આ કેસમાં આરોપીની ધરપકડ કરવામાં આવી નથી, પરંતુ પોલીસે તેની શોધખોળ તેજ કરી છે અને નસવાડી પોલીસ સ્ટેશન દ્વારા આ સમગ્ર કૌભાંડના મૂળ સુધી પહોંચવા માટે કડક કાર્યવાહી હાથ ધરવામાં આવી છે.