ગૂગલ મેપ અને ટપાલમાં પણ ચમકશે ખાવડા! વિશ્વના સૌથી મોટા ગ્રીન એનર્જી હબને મળ્યો ખાસ પિનકોડ

Khavda Renewable Energy Park: ગુજરાતના કચ્છમાં આવેલા વિશ્વના સૌથી મોટા ખાવડા રિન્યુએબલ એનર્જી પાર્કને હવે એક અનોખી ભૌગોલિક ઓળખ મળી છે. આ ગ્રીન એનર્જી હબ માટે ભારતીય ટપાલ વિભાગ દ્વારા એક સમર્પિત ડિલિવરી પોસ્ટ ઓફિસ સાથે નવો પોસ્ટલ ઈન્ડેક્સ નંબર (PIN) 370246 ફાળવવામાં આવ્યો છે. આ નવો પિનકોડ ખાવડાના અભૂતપૂર્વ પરિવર્તન અને આર્થિક કેન્દ્ર તરીકે તેના વધતા મહત્વને દર્શાવે છે.

538 ચોરસ કિલોમીટરમાં ફેલાયેલું વિશાળ પાવર હબ

અદાણી ગ્રીન એનર્જી લિમિટેડ (AGEL) અને અન્ય ડેવલપર્સ દ્વારા આશરે 538 ચોરસ કિલોમીટરમાં ફેલાયેલા આ વિશાળ પાર્કનો વિકાસ કરવામાં આવી રહ્યો છે. હાલમાં અહીં 10 ગીગાવોટથી વધુ રિન્યુએબલ એનર્જી ક્ષમતા કાર્યરત થઈ ચૂકી છે, અને AGELનો લક્ષ્યાંક વર્ષ 2029 સુધીમાં તેને 30 ગીગાવોટ સુધી પહોંચાડવાનો છે.

વેરાન રણમાંથી આધુનિક ટાઉનશિપનું નિર્માણ

આ ભગીરથ વિકાસને કારણે ક્યારેક વેરાન ગણાતો કચ્છનો આ વિસ્તાર આજે એક ધમધમતા ટાઉનશિપમાં ફેરવાઈ ગયો છે. હાલમાં અહીં 15,000 થી વધુ કામદારો અને સ્ટાફ વસવાટ કરે છે. આ વધતી વસ્તી માટે પાકા રસ્તા, ડ્રેનેજ નેટવર્ક, પાણી માટે ડિસેલિનેશન પ્લાન્ટ અને 200 કિલોમીટરથી વધુ લાંબી ઓપ્ટિકલ ફાઈબર કનેક્ટિવિટી જેવી સુવિધાઓ ઊભી કરવામાં આવી છે. આ ઉપરાંત હેલ્થકેર, રિટેલ આઉટલેટ્સ અને બેંકિંગ સેવાઓ પણ ઉપલબ્ધ છે.

ટપાલ અને ડિજિટલ બેંકિંગ સુવિધાઓનો વિસ્તાર

અગાઉ આ વિસ્તારની ટપાલ સેવાઓ ખાવડા અને કુરાન બ્રાન્ચ પોસ્ટ ઓફિસ દ્વારા સંચાલિત થતી હતી. પરંતુ વસ્તી અને વ્યાપારિક ગતિવિધિઓ વધતા, અહીં એક સમર્પિત સુવિધા અનિવાર્ય બની હતી. હવે નવી ‘રિન્યુએબલ એનર્જી પાર્ક, ખાવડા પોસ્ટ ઓફિસ’ દ્વારા સ્પીડ પોસ્ટ, પાર્સલ બુકિંગ, બચત ખાતા અને આધાર-આધારિત ડિજિટલ બેંકિંગ (IPPB) જેવી સેવાઓ સીધી જ ઉપલબ્ધ થશે.

વિકાસની સફરમાં વધુ એક સુવર્ણ પ્રકરણ

આ નવો પિનકોડ માત્ર ટપાલ સેવા પૂરતો મર્યાદિત નથી, પરંતુ તે ઈ-કોમર્સ, લોજિસ્ટિક્સ, બેંકિંગ અને ઈન્સ્યોરન્સ કંપનીઓ માટે આ વિસ્તારની સર્વિસેબિલિટી નક્કી કરવામાં મહત્વની ભૂમિકા ભજવશે. અદાણી ગ્રૂપે જ્યારે આ પ્રોજેક્ટની શરૂઆત કરી ત્યારથી લઈને આજ સુધીમાં ખાવડાની કાયાપલટ થઈ ચૂકી છે, અને આ નવો પિનકોડ તેના વિકાસની સફરમાં વધુ એક સોવર્ણ પ્રકરણ સાબિત થયો છે.