Gandhidham Puri Express: ઓડિશાના પ્રખ્યાત તીર્થધામ પુરી (Puri) જતા મુસાફરો માટે રેલવે વિભાગ દ્વારા એક મહત્વપૂર્ણ નોટિસ જાહેર કરવામાં આવી છે. પૂર્વ તટ રેલવે (East Coast Railway)ના ખુર્દા રોડ મંડળ હેઠળ આવતા પુરી રેલવે સ્ટેશન પર પ્લેટફોર્મ ઓગ્રેડેશન અને આધુનિકીકરણની કામગીરી હાથ ધરવામાં આવી રહી છે. આ વિકાસકાર્યો માટે રેલવે દ્વારા બ્લોક લેવામાં આવ્યો હોવાથી ગાંધીધામથી પુરી જતી અને આવતી સાપ્તાહિક એક્સપ્રેસ ટ્રેનોના રૂટમાં ઓક્ટોબર સુધી આંશિક ફેરફાર (Short Termination/Origination) કરવામાં આવ્યો છે.
કઈ ટ્રેનોના રૂટમાં ફેરફાર કરાયો? (ટ્રેન વિગત)
રેલવે પ્રશાસન દ્વારા નીચે મુજબની ટ્રેનોના રૂટ માલતીપાટપુર (Maltipatpur) સ્ટેશન સુધી સીમિત કરવામાં આવ્યા છે.
ગાંધીધામ – પુરી સાપ્તાહિક એક્સપ્રેસ (ટ્રેન નંબર 22973)
આ ટ્રેન 26 ઓગસ્ટ 2026 થી 14 ઓક્ટોબર 2026 સુધી પુરી સ્ટેશનના બદલે માલતીપાટપુર (Maltipatpur) સ્ટેશન પર જ શોર્ટ ટર્મિનેટ (યાત્રા પૂર્ણ) થશે.
પુરી – ગાંધીધામ સાપ્તાહિક એક્સપ્રેસ (ટ્રેન નંબર 22974)
આ ટ્રેન 29 ઓગસ્ટ 2026 થી 17 ઓક્ટોબર 2026 સુધી પુરીના બદલે માલતીપાટપુર સ્ટેશનથી જ શોર્ટ ઓરિજિનેટ (યાત્રા શરૂ) થશે.
ગાંધીધામ – પુરી સાપ્તાહિક એક્સપ્રેસ (ટ્રેન નંબર 12993)
આ ટ્રેન 28 ઓગસ્ટ 2026 થી 16 ઓક્ટોબર 2026 સુધી માલતીપાટપુર સ્ટેશન સુધી જ જશે.
પુરી – ગાંધીધામ સાપ્તાહિક એક્સપ્રેસ (ટ્રેન નંબર 12994)
આ ટ્રેન 31 ઓગસ્ટ 2026 થી 19 ઓક્ટોબર 2026 સુધી માલતીપાટપુર સ્ટેશનથી ઉપડશે.
મુસાફરો પર શું થશે અસર?
ગાંધીધામ, અમદાવાદ અને ગુજરાતના અન્ય સ્ટેશનોથી જગન્નાથ પુરીના દર્શનાર્થે જતા શ્રદ્ધાળુઓ અને મુસાફરોએ હવે પુરી સ્ટેશનના બદલે માલતીપાટપુર સ્ટેશને ઊતરવું પડશે. માલતીપાટપુર સ્ટેશનથી પુરી મુખ્ય શહેર અને મંદિરનું અંતર આશરે 7 થી 8 કિલોમીટર છે, જેથી મુસાફરોએ ત્યાંથી સ્થાનિક વાહનવ્યવહાર (ટેક્સી કે ઓટો)નો ઉપયોગ કરવાનો રહેશે.
રેલવે વિભાગની મુસાફરોને અપીલ
પશ્ચિમ રેલવે અને પૂર્વ તટ રેલવે દ્વારા તમામ મુસાફરોને અનુરોધ કરવામાં આવ્યો છે કે તેઓ પોતાની યાત્રાનું આયોજન કરતા પહેલા ટ્રેનના સમય અને રૂટની ચકાસણી કરી લે.
ટ્રેનના પરિચાલન સમય, રોકાણ (Stoppages) અને અન્ય વિગતો જાણવા માટે ભારતીય રેલવેની સત્તાવાર વેબસાઇટ National Train Enquiry System (NTES)ની મુલાકાત લેવી.