Railway News: જૈન ધર્મના સર્વોચ્ચ તીર્થધામ ગણાતા પાલિતાણા ખાતે આગામી ફાગણ ફેરીના પર્વ નિમિત્તે શ્રદ્ધાળુઓનો ભારે ધસારો જોવા મળી રહ્યો છે. મુસાફરોની આ વધારાની ભીડને પહોંચી વળવા અને મુંબઈ સ્થિત પ્રવાસીઓને સીધી કનેક્ટિવિટી પૂરી પાડવા માટે પશ્ચિમ રેલવે દ્વારા બાંદ્રા ટર્મિનસ અને પાલિતાણા વચ્ચે વિશેષ ભાડા સાથે સુપરફાસ્ટ સ્પેશિયલ ટ્રેન દોડાવવાનો મહત્વનો નિર્ણય લેવામાં આવ્યો છે.
પશ્ચિમ રેલવેના મુખ્ય જનસંપર્ક અધિકારી વિનીત અભિષેક દ્વારા જારી કરાયેલ સત્તાવાર યાદી મુજબ, આ ટ્રેનનું સંચાલન મર્યાદિત સમયગાળા માટે કરવામાં આવશે.
ટ્રેનનું સમયપત્રક અને સંચાલન વિગતો
ટ્રેન સંખ્યા 09013 (બાંદ્રા ટર્મિનસ – પાલિતાણા સુપરફાસ્ટ સ્પેશિયલ)
આ ટ્રેન શનિવાર, 28 ફેબ્રુઆરી, 2026ના રોજ બાંદ્રા ટર્મિનસથી સવારે 11:00 કલાકે ઉપડશે અને તે જ દિવસે મધ્યરાત્રિ બાદ એટલે કે રવિવારના રોજ 00:50 કલાકે પાલિતાણા પહોંચશે.
ટ્રેન સંખ્યા 09014 (પાલિતાણા – બાંદ્રા ટર્મિનસ સુપરફાસ્ટ સ્પેશિયલ)
વળતી દિશામાં, આ ટ્રેન રવિવાર, 01 માર્ચ, 2026નારોજ પાલિતાણાથી બપોરે 3:00 કલાકે પ્રસ્થાન કરશે અને સોમવારે વહેલી સવારે 05:00 કલાકે મુંબઈના બાંદ્રા ટર્મિનસ ખાતે પરત ફરશે.
મુખ્ય સ્ટોપેજ અને માર્ગ
આ સ્પેશિયલ ટ્રેન મહારાષ્ટ્ર અને ગુજરાતના મહત્વના શહેરોને સાંકળશે. મુસાફરોની સુવિધા માટે બંને દિશામાં આ ટ્રેન નીચેના સ્ટેશનો પર ઉભી રહેશે, જેમાં બોરીવલી, વાપી, સુરત, વડોદરા, અમદાવાદ, બોટાદ, ધોળા, સોનગઢ અને સિહોર રોકાશે.
કોચનું માળખું અને સુવિધાઓ
મુસાફરોની સુખદાયક મુસાફરી માટે રેલવેએ આ ટ્રેનમાં આધુનિક કોચની વ્યવસ્થા કરી છે. ટ્રેનમાં એસી 2-ટાયર (2-Tier AC), એસી 3-ટાયર (3-Tier AC), સ્લીપર ક્લાસ (Sleeper Class) અને સામાન્ય મુસાફરો માટે જનરલ સેકન્ડ ક્લાસ (General Second Class)ના કોચ જોડવામાં આવશે. સુપરફાસ્ટ કેટેગરીની આ ટ્રેન ઓછા સમયમાં અંતર કાપીને શ્રદ્ધાળુઓને પાલિતાણા પહોંચાડશે.
બુકિંગની માહિતી
મુસાફરોએ નોંધ લેવી કે આ ટ્રેન (નંબર 09013 અને 09014) માટેનું બુકિંગ 25 ફેબ્રુઆરી, 2026થી તમામ રેલવે પીઆરએસ (PRS) કાઉન્ટરો અને IRCTCની સત્તાવાર વેબસાઇટ પર શરૂ થઈ ગયું છે. આ ટ્રેન વિશેષ ભાડા (Special Fare) સાથે ચલાવવામાં આવશે.
વધુ માહિતી માટે મુસાફરો ભારતીય રેલવેની પૂછપરછ વેબસાઇટ www.enquiry.indianrail.gov.inની મુલાકાત લઈ શકે છે. ફાગણ ફેરી માટે જતા સંઘો અને વ્યક્તિગત યાત્રિકો માટે આ ટ્રેન આશીર્વાદરૂપ સાબિત થશે.