Amreli: સૌરાષ્ટ્રના ગીર પંથકમાં સિંહો માનવ વસાહતમાં આવી જવાના બનાવો સામે આવતા રહે છે. ઘણી વખત સિંહો માનવ વસાહતમાં ઘુસીને માલધારીઓના પશુઓનું મારણ કરતા હોય અને ગામના લોકોની સામે જ મિજબાની માણતા હોય તેવા વીડિયો સામે આવી ચૂક્યા છે. સિંહ દ્વારા માનવ પર હુમલો કરવામાં આવ્યો હોવાના બનાવો પણ કેટલીક વખત સામે આવી ચૂક્યા છે, ત્યારે આવો જ વધુ એક કિસ્સો અમરેલીના જાફરાબાદમાંથી સામે આવ્યો છે.
આ અંગે પ્રાપ્ત વિગતો મુજબ, જીગર બારૈયા નામનો યુવક કુદરતી હાજતે જવા માટે જાભરાબાદના લાઈટ હાઉસ વિસ્તારમાં બાવળની કાંટ તરફ જઈ રહ્યો હતો. આ સમયે અચાનક સિંહે જીગર પર હુમલો કર્યો હતો.
સિંહના હુમલામાં યુવકને કપાળ અને હાથના ભાગે ઈજા પહોંચી છે. આ ઘટના બાદ ઈજાગ્રસ્ત યુવકને સૌ પ્રથમ જાફરાબાદ હોસ્પિટલમાં પ્રાથમિક સારવાર બાદ સઘન સારવાર અર્થે રાજુલા ખસેડવામાં આવ્યો છે.
બીજી તરફ આ બનાવની જાણ થતાં વન વિભાગનો કાફલો ઘટના સ્થળે પહોંચી ગયો હતો. હાલ તો હુમલો કર્યા બાદ સિંહ ક્યા છે? તેનું લોકેશન મેળવવા માટે સ્કેનિંગ હાથ ધરવામાં આવ્યું છે.