Climate Masterclass Ahmedabad: અમદાવાદની જેએલ હાઈસ્કૂલ ખાતે ગ્લોબલ ક્લાઈમેટ ઈનિશિયેટિવ Avoid3ના સ્થાપક અને ન્યૂ જર્સીની ધ પિંગ્રી સ્કૂલની વિદ્યાર્થીની આશના શાહ દ્વારા આબોહવા પરિવર્તન (ક્લાઈમેટ ચેન્જ) વિષય પર એક વિશેષ સંવાદાત્મક માસ્ટરક્લાસનું આયોજન કરવામાં આવ્યું હતું. સમુદ્રો અને સમયના તફાવતને પાર કરીને વર્ચ્યુઅલ માધ્યમથી જોડાયેલી આશના શાહે પાઠ્યપુસ્તકીય ભાષણો આપવાને બદલે અમદાવાદના વિદ્યાર્થીઓ સાથે અત્યંત ગંભીર અને વર્તમાન પરિસ્થિતિને અનુરૂપ પર્યાવરણીય સંવાદ સાધ્યો હતો.
તેમણે ચાર વર્ષ પહેલાં શરૂ કરેલી 'Avoid3' ચળવળનો ઉદ્દેશ્ય સમજાવતા સ્પષ્ટ કર્યું કે વર્તમાન પરિસ્થિતિ મુજબ પૃથ્વીનું તાપમાન 3°C વધવાની ભયાનક દિશામાં આગળ વધી રહ્યું છે જેને રોકવું અત્યંત જરૂરી છે.
પોતાના વક્તવ્યમાં આશના શાહે વૈશ્વિક આબોહવા સંકટને અમદાવાદની સ્થાનિક વાસ્તવિકતા સાથે જોડીને રજૂ કર્યું હતું. તેમણે ચેતવણી આપી હતી કે અનિયંત્રિત ગ્લોબલ વોર્મિંગના કારણે શહેરની જીવાદોરી સમાન સાબરમતી નદી ભયાનક દુષ્કાળ અને ફ્લેશ ફ્લડ્સ (અચાનક આવતા પૂરો) વચ્ચે ઝૂલતી થઈ શકે છે.
તાજેતરમાં નેપાળમાં આવેલા પૂરોની હોનારતનો ઉલ્લેખ કરીને તેમણે વિદ્યાર્થીઓને આગ્રહ કર્યો હતો કે તેઓ પર્યાવરણીય રક્ષણને માત્ર ટેકનિકલ એન્જિનિયરિંગ તરીકે ન જોતાં સ્પોન્જ-સિટી ડિઝાઇન્સ અને પૂર્વ ચેતવણી નેટવર્ક્સ દ્વારા માનવ જીવનનું રક્ષણ કરવાની એક નૈતિક ફરજ ગણે.
આ સત્ર દરમિયાન કેલિફોર્નિયાના દવાનળ અને અમદાવાદના શહેરી તાપમાનની સરખામણી કરીને યુવા પેઢીના સમાન ભવિષ્ય પર પ્રકાશ પાડવામાં આવ્યો હતો.સત્રના અંતે વિદ્યાર્થીઓ સાથે પાણી સંરક્ષણ, રિન્યુએબલ એનર્જી પોલિસી અને યુવા નેતૃત્વ જેવા વિષયો પર જીવંત ચર્ચા થઈ હતી. આશના શાહે વિદ્યાર્થીઓને યાદ અપાવ્યું હતું કે તેઓ જ આ પૃથ્વીના ભવિષ્યને બચાવનારી નિર્ણાયક પેઢી છે, જેનાથી પ્રેરાઈને જેએલ હાઈસ્કૂલના વિદ્યાર્થીઓએ પોતાના શહેર અને પર્યાવરણના રક્ષણ માટે સંગઠિત થઈને કાર્ય કરવાનો મજબૂત સંકલ્પ લીધો હતો.