Ahmedabad Bullet Train Station: ગુજરાતના આર્થિક પાટનગર ગણાતા અમદાવાદ શહેરના રેલવે માળખાની કાયાપલટ કરવાની કામગીરી અત્યારે યુદ્ધના ધોરણે ચાલી રહી છે. આ મહત્વાકાંક્ષી પ્રોજેક્ટ્સની પ્રગતિ જાણવા માટે કેન્દ્રીય રેલ અને જળ શક્તિ રાજ્ય મંત્રી વી. સોમન્નાએ આજે અમદાવાદ રેલવે સ્ટેશન પર ચાલી રહેલા રિડેવલપમેન્ટના કાર્યો તેમજ નિર્માણાધીન હાઈ-સ્પીડ રેલ (બુલેટ ટ્રેન) સ્ટેશનનું સ્થળ પર જઈને નિરીક્ષણ કર્યું હતું.
પોતાની આ મુલાકાત દરમિયાન મંત્રીએ બંને મોટા પ્રોજેક્ટ્સની અત્યાર સુધીની પ્રગતિનો તાગ મેળવ્યો હતો. તેમણે પ્રોજેક્ટ સાથે સંકળાયેલા ઉચ્ચ અધિકારીઓ પાસેથી બાંધકામની વર્તમાન સ્થિતિ, કામ પૂર્ણ થવાની નિર્ધારિત ડેડલાઇન અને આગામી તબક્કાની કાર્યયોજના અંગે વિસ્તૃત માહિતી મેળવી જરૂરી સૂચનો આપ્યા હતા.
ઉચ્ચ અધિકારીઓની ઉપસ્થિતિમાં સમીક્ષા
આ નિરીક્ષણ મુલાકાત વેળાએ રેલવે વિભાગ અને બુલેટ ટ્રેન પ્રોજેક્ટના ટોચના અધિકારીઓ હાજર રહ્યા હતા. જેમાં અમદાવાદના ડિવિઝનલ રેલવે મેનેજર (DRM) વેદ પ્રકાશ, મુખ્ય વહીવટી અધિકારી (બાંધકામ) પ્રદીપ ગુપ્તા, રેલ ભૂમિ વિકાસ પ્રાધિકરણ (RLDA)ના CPM સંજીવ કુમાર અને નેશનલ હાઈ સ્પીડ રેલ કોર્પોરેશન લિમિટેડ (NHSRCL)ના પ્રોજેક્ટ મેનેજર રાજેશ અગ્રવાલ સહિત અન્ય વરિષ્ઠ અધિકારીઓ જોડાયા હતા.
અમદાવાદ સ્ટેશનનું રિડેવલપમેન્ટ
અમદાવાદ રેલવે સ્ટેશનને માત્ર એક રેલવે સ્ટેશન નહીં, પરંતુ ભવિષ્યની જરૂરિયાતોને ધ્યાનમાં રાખીને એક સંકલિત 'મલ્ટી-મોડલ ટ્રાન્સપોર્ટ હબ' તરીકે વિકસાવવામાં આવી રહ્યું છે. મંત્રી વી. સોમન્નાએ સ્ટેશન પરિસરમાં બની રહેલી આધુનિક મુસાફર સુવિધાઓ અને માળખાકીય બાંધકામની ઝીણવટભરી તપાસ કરી હતી.
આધુનિક સુવિધાઓ: આ પ્રોજેક્ટ હેઠળ ભવ્ય નવું સ્ટેશન બિલ્ડિંગ, મુસાફરોની ભીડને સરળતાથી સંભાળી શકે તેવો વિશાળ કોન્કોર્સ એરિયા, ટ્રાફિક હળવો કરવા માટે એલિવેટેડ રોડ અને સ્ટેશનમાં આવવા-જવા માટે અલગ અને સુગમ પ્રવેશ તથા નિકાસ દ્વાર બનાવવામાં આવી રહ્યા છે.
ત્રિવેણી સંગમ: આ સમગ્ર આયોજનનો મુખ્ય હેતુ ભારતીય રેલવે, અમદાવાદ મેટ્રો અને બુલેટ ટ્રેન સેવાઓ વચ્ચે બહેતર તાલમેલ બેસાડવાનો છે, જેથી મુસાફરોને એક જ જગ્યાએથી તમામ પરિવહન સેવાઓ સરળતાથી મળી રહે.
પ્લેટફોર્મ 10, 11 અને 12ની ઉપર આકાર લઈ રહ્યું છે બુલેટ ટ્રેન સ્ટેશન
રેલવે સ્ટેશનની કામગીરી જોયા બાદ કેન્દ્રીય રાજ્ય મંત્રીએ નિર્માણાધીન અમદાવાદ બુલેટ ટ્રેન સ્ટેશનની મુલાકાત લીધી હતી. અહીં NHSRCLના અધિકારીઓ દ્વારા પાવરપોઈન્ટ પ્રેઝન્ટેશનના માધ્યમથી બાંધકામની ટેકનિકલ બાબતો અને અત્યાર સુધી થયેલી કામગીરીનો ચિતાર રજૂ કરવામાં આવ્યો હતો.
મુંબઈ-અમદાવાદ હાઈ-સ્પીડ રેલ કોરિડોર હેઠળ આ બુલેટ ટ્રેન સ્ટેશન અંદાજે 38,000 ચોરસ મીટરના વિશાળ વિસ્તારમાં બની રહ્યું છે. એન્જિનિયરિંગની દ્રષ્ટિએ આ સ્ટેશન અત્યંત ખાસ છે, કારણ કે તે હાલના અમદાવાદ રેલવે સ્ટેશનના પ્લેટફોર્મ નંબર 10, 11 અને 12 ની બરાબર ઉપર તૈયાર કરવામાં આવી રહ્યું છે. આ સ્ટેશનની ડિઝાઇનમાં શહેરની આગવી ઓળખ અને વારસાને વણી લેવામાં આવ્યા છે. સ્ટેશનની છતને ઉત્તરાયણના પતંગો જેવો આકાર આપવામાં આવી રહ્યો છે, જ્યારે તેના બહારના ભાગની ડિઝાઇન અમદાવાદની વિશ્વપ્રસિદ્ધ 'સિદ્દી સૈયદની જાળી' પરથી પ્રેરિત છે.
સ્ટેશન પર બુલેટ ટ્રેન માટે બે પ્લેટફોર્મ હશે. આ ઉપરાંત મુસાફરો માટે આરામદાયક વેઇટિંગ રૂમ, વિશ્રામ કક્ષ, શોપિંગ માટે રિટેલ આઉટલેટ્સ, આધુનિક લિફ્ટ અને એસ્કેલેટર જેવી સુવિધાઓ ઉપલબ્ધ કરાવવામાં આવશે.
મુસાફરોની સરળ અવરજવર પર ખાસ ભાર
નિરીક્ષણ દરમિયાન મંત્રીશ્રીએ અધિકારીઓ સાથે ખાસ ચર્ચા કરી હતી કે હાલના રેલવે સ્ટેશન, નવા બુલેટ ટ્રેન સ્ટેશન અને નજીકના કાલુપુર મેટ્રો સ્ટેશન વચ્ચે મુસાફરોની અવરજવર એકદમ સરળ અને અવરોધમુક્ત રહેવી જોઈએ. આ ત્રણેય સ્ટેશનો એકબીજા સાથે એવી રીતે જોડવામાં આવશે કે મુસાફરોને સામાન સાથે એક સ્ટેશનથી બીજા સ્ટેશન પર જવામાં કોઈ તકલીફ ન પડે.
આ બંને મોટા પ્રોજેક્ટ્સ પૂર્ણ થવાથી ગુજરાતના પરિવહન માળખાને એક નવી ઊંચાઈ મળશે. અમદાવાદના સ્થાનિક નાગરિકો તેમજ બહારથી આવતા લાખો મુસાફરોને આગામી સમયમાં આંતરરાષ્ટ્રીય કક્ષાની મુસાફરીનો સુખદ અનુભવ મળશે અને રાજ્યની રેલ કનેક્ટિવિટી વધુ મજબૂત બનશે.