Ambalal Patel Agahi: ગુજરાતમાં ચોમાસાની ઋતુ હવે તેના અંતિમ અથવા ઉત્તરાર્ધના તબક્કામાં છે, તેમ છતાં વાતાવરણમાં આવતા સતત પલટાને કારણે મેઘરાજા હજુ પણ સંપૂર્ણપણે વિદાય લેવાના મૂડમાં નથી. રાજ્યના અલગ-અલગ વિસ્તારોમાં ફરી એકવાર વરસાદી માહોલ જામ્યો છે. જાણીતા હવામાન નિષ્ણાત અંબાલાલ પટેલ દ્વારા કરવામાં આવેલી તાજેતરની આગાહી મુજબ, આગામી 48 કલાક રાજ્યના હવામાન માટે ખૂબ જ મહત્ત્વપૂર્ણ સાબિત થઈ શકે છે.
કયા વિસ્તારોમાં રહેશે વરસાદનો પ્રકોપ?
અંબાલાલ પટેલના અંદાજ મુજબ, આગામી બે દિવસ દરમિયાન ગુજરાતના ઉત્તર, મધ્ય અને દક્ષિણ ભાગોમાં વાદળછાયું વાતાવરણ જોવા મળી શકે છે. કેટલીક જગ્યાએ અચાનક ગાજવીજ અને પવન સાથે ધોધમાર ઝાપટાં પડવાની શક્યતા છે. ખાસ કરીને દરિયાકાંઠાના વિસ્તારોમાં પવનની ગતિ સામાન્ય કરતાં વધુ રહી શકે છે, જેના કારણે માછીમારો અને ખેડૂતોમાં ચિંતાનું મોજું ફરી વળ્યું છે.
દક્ષિણ ગુજરાત: સુરત, નવસારી, વલસાડ અને ડાંગ પંથકમાં હળવાથી મધ્યમ વરસાદી ઝાપટાં વરસી શકે છે.
મધ્ય ગુજરાત: અમદાવાદ, ગાંધીનગર અને આસપાસના વિસ્તારોમાં પણ અચાનક વાતાવરણ બદલાતા હળવા ગાઝવીજ સાથે વરસાદ પડવાની સંભાવના છે.
ઉત્તર ગુજરાત: બનાસકાંઠા અને સાબરકાંઠા જેવા સરહદી વિસ્તારોમાં પણ વાદળોની અવરજવર જોવા મળી શકે છે.
ખેડૂતો માટે ચિંતા અને રાહતનો મિશ્ર માહોલ
આ સમયગાળો ખેડૂતો માટે બહુ સંવેદનશીલ માનવામાં આવે છે. જે પાક હાલમાં પાકવાના આરે છે અથવા કપાતની તૈયારીમાં છે, તેવા પાક માટે અચાનક આવતો આ વરસાદ નુકસાનકારક સાબિત થઈ શકે છે. બીજી તરફ, જે વિસ્તારોમાં પાણીની અછત છે ત્યાંના પાક માટે આ વરસાદ નવજીવન સમાન બની રહે છે. ખેડૂતો અત્યારે આકાશ તરફ મીટ માંડીને બેઠા છે કે કયા સમયે કયું પગલું ભરવું.
હવામાન વિભાગની પણ નજર
માત્ર ખાનગી નિષ્ણાતો જ નહીં, પરંતુ ભારતીય હવામાન વિભાગ (IMD) દ્વારા પણ રાજ્યના બદલાતા હવામાન પર સતત નજર રાખવામાં આવી રહી છે. વાયુમંડળમાં સર્જાતી સિસ્ટમોને કારણે ભેજનું પ્રમાણ વધ્યું છે, જેના કારણે આગામી સપ્તાહ સુધી વાતાવરણમાં આ પ્રકારની પલટા-પલટી જોવા મળી શકે છે.
રાજ્યના 17 જિલ્લાઓમાં 'ઓરેન્જ એલર્ટ'
હવામાન વિભાગે સ્થિતિની ગંભીરતા જોઈને રાજ્યના 17 મહત્વપૂર્ણ વિસ્તારોમાં 'ઓરેન્જ એલર્ટ' જારી કર્યું છે. જેમાં કચ્છ, વાવ, થરાદ, બનાસકાંઠા, પાટણ, મહેસાણા, અમદાવાદ, આણંદ, ભરૂચ, ભાવનગર, બોટાદ, અમરેલી, ગીર સોમનાથ, દીવ, જૂનાગઢ, દ્વારકા અને જામનગરનો સમાવેશ થાય છે. આ તમામ વિસ્તારોમાં મુશળધારથી અતિ ભારે વરસાદ વરસી શકે છે. આ ઉપરાંત અન્ય 10 જિલ્લાઓમાં 'યલો એલર્ટ' આપવામાં આવ્યું છે. જેમાં સાબરકાંઠા, અરવલ્લી, ગાંધીનગર, ખેડા, વડોદરા, સુરત, નવસારી, દમણ, વલસાડ તેમજ દાદરા અને નગર હવેલીનો સમાવેશ થાય છે.
નાગરિકો અને વાહનચાલકોએ આગામી 48 કલાક દરમિયાન અચાનક બદલાતા હવામાનને ધ્યાનમાં રાખીને સાવચેતી રાખવી અનિવાર્ય છે, વિશેષ કરીને ખુલ્લા વિસ્તારોમાં વીજળી પડવાના જોખમ સામે સાવધાન રહેવું જરૂરી છે.
નવી સિસ્ટમ અને વાવાઝોડાનું મોટું જોખમ
માત્ર આગામી 48 કલાક જ નહીં, પરંતુ બંગાળની ખાડીમાં આગામી 18 અને 25 સપ્ટેમ્બરની આસપાસ વધુ બે મજબૂત સિસ્ટમ સક્રિય થવાની સંભાવના છે.
આ સિવાય ISROના વૈજ્ઞાનિક અભ્યાસ મુજબ વર્ષના અંતિમ મહિનાઓમાં (ઓક્ટોબરથી ડિસેમ્બર દરમિયાન) સંભવિત વાવાઝોડાં સીધા ગુજરાતના દરિયાકાંઠા તરફ ટકરાવાનું જોખમ પણ તોળાઈ રહ્યું છે. બંગાળની ખાડી તેમજ અરબી સમુદ્રમાં ઉદ્ભવનારા ચક્રવાત જો ઓમાન તરફ નહીં ફંટાય, તો તે સીધા ગુજરાતના દરિયાકિનારે ટકરાઈને વિનાશ વહેરી શકે છે. તેથી પ્રશાસન અને નાગરિકોએ આગામી દિવસોમાં સતર્ક રહેવું અત્યંત જરૂરી છે.