Gujarat News Today Live: સુરતથી ઉદયપુર વચ્ચે વંદે ભારત ટ્રેન શરૂ, સી.આર. પાટીલે લીલી ઝંડી બતાવી કરાવ્યો પ્રારંભ

મુખ્યમંત્રી ભૂપેન્દ્ર પટેલે ગાંધી જયંતિ અવસરે ગાંધીનગરમાં ખાદી હાટમાંથી ખાદી ખરીદી કરી હતી. વડાપ્રધાન નરેન્દ્ર મોદીએ ખાદી ફોર ફેશન-ખાદી ફોર નેશનના મંત્ર સાથે ખાદીના ઉપયોગ અને ખાદી ખરીદીનો વ્યાપ વધારવાની કરેલી અપીલનો મુખ્યમંત્રીએ પ્રતિસાદ આપ્યો હતો. મુખ્યમંત્રી ભૂપેન્દ્ર પટેલ પોરબંદરમાં કીર્તિ મંદિર ખાતે ગાંધી જયંતિ નિમિત્તે યોજાયેલી સર્વધર્મ પ્રાર્થના સભામાં સહભાગી થઈને ગાંધીનગર પરત આવતાવેંત સૌરાષ્ટ્ર રચનાત્મક સમિતિના ખાદી ગ્રામોદ્યોગ હાટ પહોંચ્યા હતા. તેમણે આ ખાદી ભંડારામાંથી વિવિધ ખાદી વસ્ત્ર ઉત્પાદનો ખરીદ કરીને ડિજિટલ ટ્રાન્ઝેક્શનને વેગ આપવાના વડાપ્રધાનના આહવાન અનુરૂપ ડિજિટલ પેમેન્ટ કર્યું હતું.

સુરતના મુસાફરો માટે મુસાફરી હવે વધુ સરળ બનશે, કારણ કે સુરતથી ઉદયપુર વચ્ચે નવી વંદે ભારત એક્સપ્રેસ ટ્રેન સેવાનો ધમાકેદાર પ્રારંભ થઈ ગયો છે, જેને કેન્દ્રીય જળશક્તિ મંત્રી સી.આર. પાટીલે લીલી ઝંડી બતાવી પ્રસ્થાન કરાવ્યું હતું. આ ટ્રેન સુરતથી સવારે 6:10 વાગ્યે ઉપડશે અને બપોરે 1:40 વાગ્યે ઉદયપુર પહોંચશે. જ્યારે પરત ફરતી વખતે આ ટ્રેન ઉદયપુરથી બપોરે 3:35 વાગ્યે ઉપડીને રાત્રે 11 વાગ્યે સુરત પરત આવી પહોંચશે.

રાષ્ટ્રપિતા મહાત્મા ગાંધીજીની જન્મજયંતી નિમિત્તે પોરબંદરના ઐતિહાસિક કીર્તિમંદિરમાં મુખ્યમંત્રી ભૂપેન્દ્ર પટેલે રાષ્ટ્રપિતાને શ્રદ્ધાસુમન અર્પણ કર્યા હતા. આ પ્રસંગે તેમણે જણાવ્યું હતું કે, આ અવસરે આયોજિત સર્વધર્મ પ્રાર્થના સભામાં ઉપસ્થિત રહી બાપુના સત્ય, અહિંસા અને સર્વોદયના ઉચ્ચ આદર્શોનું સ્મરણ કર્યું. પૂજ્ય બાપુના વિચારો પરંપરાગત આસ્થાથી ઉપર ઊઠીને, સર્વધર્મ સમભાવની ભાવનાથી રાષ્ટ્રીય એકતા અને સામાજિક સમરસતાને મજબૂત કરવાનો સંદેશ આપે છે.

અરવલ્લી જિલ્લામાં છેલ્લા 10 દિવસની અંદર જ બીજી વાર પોલીસ અને બિશ્નોઈ ગેંગ આમને-સામને આવી ગયાં છે. કારમાં નશાકારક પદાર્થોની હેરાફેરી કરી રહેલા આ ગેંગના શખ્સોએ પોલીસની ટીમને જોતાં જ સીધું 3 રાઉન્ડ ફાયરિંગ ઝીંકી દીધું હતું. જોકે, પોલીસે પણ તાબડતોબ મોરચો સંભાળીને જવાબી ગોળીબાર કર્યો હતો, જેમાં 1 આરોપીને ગોળી વાગી હતી.

રાજ્યના શહેરોને વધુ સ્વચ્છ અને સુંદર બનાવવાના હેતુથી સ્વચ્છ ભારત મિશન અર્બન (SBM Urban), ગુજરાત દ્વારા એક નવી અને આધુનિક વોટ્સએપ આધારિત ફરિયાદ નિવારણ સિસ્ટમ શરૂ કરવામાં આવી છે. મારો કચરો, મારી જવાબદારીના મંત્રને સાર્થક કરવા માટે સરકાર દ્વારા આ ટેકનોલોજીનો ઉપયોગ કરવામાં આવ્યો છે, જેનાથી નાગરિકોની સુવિધામાં વધારો થશે અને સ્વચ્છતા અભિયાનને વધુ વેગ મળશે.

આગામી 15 ઓક્ટોબરથી UPI પેમેન્ટ પર લાગુ થનારા નવા મર્ચન્ટ ડિસ્કાઉન્ટ રેટ (MDR)ના વિરોધમાં ગુજરાતના આશરે 600 જેટલા વેપારી સંગઠનોએ આજે ૨ ઓક્ટોબરના રોજ 'નો UPI ડે' મનાવવાની જાહેરાત કરી છે. નવા નિયમ મુજબ રૂ. 2000થી વધુના મર્ચન્ટ પેમેન્ટ પર 0.4 ટકાનો ચાર્જ વસૂલવામાં આવશે, જેનો સખત વિરોધ કરી વેપારીઓ આ ચાર્જમાંથી મુક્તિની માંગ કરી રહ્યા છે. આ વિરોધના ભાગરૂપે આજે ગાંધી જયંતીના દિવસે કાપડ, મોબાઈલ, ઓટોમોબાઈલ, ઇલેક્ટ્રોનિક્સ અને જ્વેલરી સહિતના તમામ બજારોમાં દુકાનદારો પોતાના QR કોડ પર કાળું કપડું ઢાંકી દેશે અને ગ્રાહકો પાસેથી માત્ર રોકડમાં જ વ્યવહાર કરશે. ડિજિટલ પેમેન્ટના આ વ્યાપક બહિષ્કારને પગલે રાજ્યમાં અંદાજે 50 કરોડ રૂપિયાના ઓનલાઈન ટ્રાન્ઝેક્શનને સીધી અસર પહોંચવાની શક્યતા છે.