AI Green Citizen Score App Gujarat: ગુજરાત સરકારે નાગરિકોને પર્યાવરણ સંરક્ષણ પ્રત્યે જાગૃત કરવા અને ટકાઉ જીવનશૈલી અપનાવવા માટે એક અભિનવ ડિજિટલ પહેલ શરૂ કરી છે. મુખ્યમંત્રી ભૂપેન્દ્ર પટેલના નેતૃત્વ હેઠળ ‘AI ગ્રીન સિટિઝન સ્કોર એપ’ લોન્ચ કરવામાં આવી છે, જે નાગરિકોના પર્યાવરણીય યોગદાનને ટ્રેક કરશે.
કોણે કરી છે આ એપ વિકસિત અને શું છે તેનો મુખ્ય ઉદ્દેશ્ય?
વડાપ્રધાન નરેન્દ્ર મોદીના ડિજિટલ ઈન્ડિયા અને ગ્રીન ઇનિશિેટિવ્સના વિઝનને આગળ વધારતા, આ મોબાઇલ એપનું નિર્માણ ગુજરાત સરકારના વિજ્ઞાન અને ટેક્નોલોજી વિભાગ (DST) હેઠળ કાર્યરત ગુજરાત ઇન્ફોર્મેટિક્સ લિમિટેડ (GIL) દ્વારા કરવામાં આવ્યું છે.
આ પ્લેટફોર્મ આર્ટિફિશિયલ ઇન્ટેલિજન્સ (AI)ની મદદથી પર્યાવરણ અને આબોહવા સંબંધિત પ્રવૃત્તિઓમાં નાગરિકોની ભાગીદારીને વધુ મજબૂત અને સરળ બનાવશે. આ એપ Google Play Store અને Apple App Store બંને પર ઉપલબ્ધ છે.
વિજ્ઞાન અને પ્રાદ્યોગિકી મંત્રી અર્જુન મોઢવાડિયાના મહત્વના વિચારો
વિજ્ઞાન અને પ્રાદ્યોગિકી મંત્રી અર્જુન મોઢવાડિયાએ જણાવ્યું હતું કે, આ પ્લેટફોર્મ દ્વારા નાગરિકો દૈનિક જીવનની પર્યાવરણલક્ષી પ્રવૃત્તિઓમાં ભાગ લઈ શકે છે.
ગ્રીન પોઈન્ટ્સ સિસ્ટમ: પ્રવૃત્તિઓમાં ભાગ લેવા બદલ નાગરિકોને ગ્રીન પોઈન્ટ્સ મળશે, જેનાથી તેઓ પોતાનો એકંદર ગ્રીન સ્કોર ટ્રેક કરી શકશે.
AI ટેક્નોલોજીનો ઉપયોગ: ફોટોગ્રાફ્સ અને સ્થળની માહિતીની ચકાસણી માટે AI આધારિત સુવિધાઓનો ઉપયોગ કરવામાં આવ્યો છે. સાથોસાથ, AI ગ્રીન આસિસ્ટન્ટ નાગરિકોને માર્ગદર્શન પણૂરું પાડશે.
એપમાં કઈ-કઈ પર્યાવરણલક્ષી પ્રવૃત્તિઓનો સમાવેશ થાય છે?
આ પ્લેટફોર્મ ટકાઉ જીવનશૈલીના વિવિધ ક્ષેત્રોને આવરી લે છે, જેમાં મુખ્ય પ્રવૃત્તિઓ નીચે મુજબ છે-
વૃક્ષારોપણ: વૃક્ષારોપણ અભિયાનમાં ભાગ લઈને નોંધણી કરવી.
કચરા વ્યવસ્થાપન: કચરાનું વિભાજન, રિસાયક્લિંગ અને સ્વચ્છતા સંબંધિત કાર્યો.
જળ સંરક્ષણ: પાણીના બચાવ અને જળ સંસાધનોની સુરક્ષાના પ્રયાસો.
ગ્રીન મોબિલિટી: પગપાળા ચાલવું, સાયકલ ચલાવવી, જાહેર પરિવહનનો ઉપયોગ અને કારપૂલિંગ.
ગ્રીન કેમ્પેઇન: વિવિધ પર્યાવરણલક્ષી અભિયાનોની માહિતી મેળવી ભાગ લેવો.
‘ગ્રીન સિટિઝન સ્કોર’ એપ કેવી રીતે કામ કરે છે?
વિજ્ઞાન અને પ્રાદ્યોગિકી વિભાગના સચિવ પી. ભારતી (IAS)ના જણાવ્યા અનુસાર, આ પહેલનો હેતુ પર્યાવરણ સંરક્ષણને સરળ અને રસપ્રદ બનાવવાનો છે.
ડિજિટલ રેકોર્ડ: વપરાશકર્તાઓ એપ પર પોતાની પ્રવૃત્તિઓની વિગતો રજૂ કરે છે.
ચકાસણી અને પોઈન્ટ્સ: પ્રવૃત્તિઓની ચકાસણી બાદ નાગરિકોને ગ્રીન પોઈન્ટ્સ મળે છે, જે ગ્રીન સ્કોરમાં ઉમેરાય છે.
લીડરબોર્ડ અને ઇતિહાસ: નાગરિકો પોતાનો પ્રવૃત્તિ ઇતિહાસ અને લીડરબોર્ડ પર પોતાનું સ્થાન ચકાસી શકે છે.
એક અધિકારીએ આ એપને નાગરિકો માટે ડિજિટલ ‘ગ્રીન ડાયરી’ ગણાવતા જણાવ્યું હતું કે તે સ્વચ્છ અને વધુ ટકાઉ ગુજરાતના નિર્માણમાં નાગરિકોના યોગદાનને યોગ્ય માન્યતા આપે છે.