Ahmedabad News:મુખ્યમંત્રી ભૂપેન્દ્ર પટેલે રાજ્ય સરકારના કોકલીયર ઈમ્પ્લાન્ટ એક્સ્ટર્નલ સ્પીચ પ્રોસેસર રિપ્લેસમેન્ટ પ્રોગ્રામનો લાભ મેળવનારાં ૨૦ બાળકો સાથે અમદાવાદના સાયન્સ સિટી ખાતે સહજ સંવાદ સાધ્યો હતો. વાત્સલ્યસભર વાતાવરણમાં યોજાયેલા કાર્યક્રમમાં મુખ્યમંત્રીએ એક સ્નેહાળ વડીલ અને વાલી તરીકે બાળકો સાથે આત્મીયતા કેળવી હતી, જેના કારણે માસૂમ બાળકોના ચહેરા પર સ્મિત રેલાઈ ગયું હતું. વાણી મળ્યા પછી મુખ્યમંત્રી સાથે વાત કરવાની તક મળતાં બાળકો રાજી થઈ ગયાં હતાં.
સંવાદ દરમિયાન બાળકોના વાલીઓએ મોંઘા ઇમ્પ્લાન્ટ તદ્દન વિનામૂલ્યે ઉપલબ્ધ કરાવવા બદલ રાજ્ય સરકાર તથા આ યોજનાના સુઆયોજિત અમલીકરણ બદલ RBSK (રાષ્ટ્રીય બાળ સ્વાસ્થ્ય કાર્યક્રમ) ટીમ અને સરકારના આરોગ્ય વિભાગ તથા સોલા સિવિલ સહિતની હોસ્પિટલનો આભાર વ્યક્ત કર્યો હતો.
મુખ્યમંત્રી ભૂપેન્દ્ર પટેલે બાળકો સાથે સાયન્સ સિટીની પ્રખ્યાત ‘એક્વાટિક ગેલેરી’ની મુલાકાત લીધી હતી. મુખ્યમંત્રીરીએ રંગબેરંગી માછલીઓ અને જળચર સૃષ્ટિ જોઈને આશ્ચર્યચકિત થતાં બાળકોનો ઉત્સાહ વધાર્યો હતો અને તેમની સાથે બાળસહજ વાતો કરીને વાત્સલ્યભાવ પ્રગટ કર્યો હતો. મુખ્યમંત્રીશ્રીની આ સંવેદનશીલતા જોઈને ત્યાં હાજર બાળકોનાં માતા-પિતા અને અધિકારીઓની આંખો પણ હર્ષથી ભીની થઈ ગઈ હતી.
મુખ્યમંત્રીશ્રીએ હજુ પણ સમાજમાં આવાં જરૂરિયાત ધરાવતાં બાળકો હોય તો તમામ વાલીઓ અને ઉપસ્થિતોને આવાં બાળકો અને પરિવારોને આ યોજનાનો લાભ અપાવવા માર્ગદર્શન આપવા અનુરોધ કર્યો હતો.
આ પ્રસંગે ડિપાર્ટમેન્ટ ઓફ સાયન્સ એન્ડ ટેક્નોલોજીના સેક્રેટરી પી. ભારતી અને ફૂડ એન્ડ ડ્રગ્સ કમિશનર ડૉ. રતનકંવર ગઢવી ચારણ પણ ઉપસ્થિત રહ્યાં હતાં.