AMC Standing Committee: અમદાવાદ મ્યુનિસિપલ કોર્પોરેશનની સાપ્તાહિક સ્ટેન્ડિંગ કમિટીની બેઠક ગુરુવાર, તારીખ 1 ઓક્ટોબર 2026ના રોજ સ્ટેન્ડિંગ કમિટીના ચેરમેન કમલેશભાઈ પટેલની અધ્યક્ષતામાં યોજાઈ હતી. આ બેઠકમાં શહેરના વિકાસ, નાગરિક સુવિધાઓ, જાહેર આરોગ્ય, ટ્રાફિક વ્યવસ્થાપન અને વહીવટી કામગીરીને લગતા વિવિધ મહત્વપૂર્ણ મુદ્દાઓ પર ઊંડાણપૂર્વક ચર્ચા કરવામાં આવી હતી.
જનતાનગર ઓવરબ્રિજની દરખાસ્ત પરત અને ટ્રાફિક નિયંત્રણ
સમગ્ર દેશમાં ફાટકમુક્ત અભિયાનના ભાગરૂપે અમદાવાદના ગોતા વોર્ડમાં જનતાનગર ખાતે ઓવરબ્રિજ બનાવવાની કામગીરીનો મુદ્દો સ્ટેન્ડિંગ કમિટીમાં રજૂ થયો હતો. આ અંગે વૈકલ્પિક ટ્રાફિક મેનેજમેન્ટના ઉપાયો, જંક્શન ઈમ્પ્રુવમેન્ટ, વન-વે સિસ્ટમ અને સિગ્નલ ઓપ્ટીમાઈઝેશન જેવા વિવિધ વિકલ્પોનું મૂલ્યાંકન કરવાની સૂચના આપવામાં આવી છે. જરૂરી વિગતો એકત્રિત કરીને ફરીથી કમિટી સમક્ષ દરખાસ્ત રજૂ કરવામાં આવે તે માટે હાલ આ દરખાસ્ત પરત કરવામાં આવી છે.
તહેવારો ટાણે હેલ્થ વિભાગ સક્રિય: ખાણી-પીણીના બજારોમાં રાત્રે પણ ચેકિંગ
નવરાત્રી અને દિવાળી જેવા આગામી તહેવારોને ધ્યાનમાં રાખીને નાગરિકોના સ્વાસ્થ્ય સાથે ચેડાં કરતા તત્વો સામે કડક કાર્યવાહી કરવાના આદેશ આપવામાં આવ્યા છે. દિવસ દરમિયાન ચાલતી તપાસ ઉપરાંત હવે રાત્રિના સમયે પણ ખાણી-પીણીનાં બજારોમાં સઘન તપાસ કરવા હેલ્થ વિભાગને વિશેષ નિર્દેશ અપાયો છે. ખાસ કરીને નવરાત્રી દરમિયાન રસ્તાઓ પર ઊભાં થતાં ખાણી-પીણીના સ્ટોલ્સ પર વેચાતા ખાદ્ય પદાર્થોની ગુણવત્તા, સ્વચ્છતા અને સુરક્ષાના તમામ નિયમોનું ચુસ્તપણે પાલન થાય તેની તકેદારી રખાશે.
ગેરકાયદે ફટાકડાના વેચાણ સામે લાલ આંખ: 30 એકમો સીલ
દિવાળીના તહેવારને લઈ ફટાકડાના વેપાર અંગે કડક નિયમોનું પાલન સુનિશ્ચિત કરવા કોર્પોરેશન દ્વારા તાકીદ કરાઈ છે. ફટાકડાનો વેપાર કરવા માટે અમદાવાદ મ્યુનિસિપલ કોર્પોરેશનની BU પરમિશન, ફાયર વિભાગની મંજૂરી અને પોલીસ વિભાગનું લાયસન્સ હોવું અનિવાર્ય છે. તાજેતરમાં જરૂરી મંજૂરીઓના અભાવે રાયપુર અને કાલુપુર સહિતના વિસ્તારોમાં ધમધમતા ૩૦ એકમોને સીલ કરવામાં આવ્યા છે.
આ ઉપરાંત, દિલ્હી દરવાજા વિસ્તારમાં કોર્પોરેશન દ્વારા ભાડે આપવામાં આવેલી જગ્યાઓમાં ફટાકડા વેચતા એકમોની પણ સઘન તપાસ કરાશે. આ જગ્યાઓ માટે કાયદેસરની BU પરમિશન છે કે નહીં અને મૂળ ભાડુઆત જ વ્યવસાય કરે છે કે જગ્યા પેટાભાડે અપાઈ છે, તેની તપાસ કરી બે દિવસમાં અહેવાલ રજૂ કરવા આદેશ કરાયો છે.
23 જુલાઈના અતિભારે વરસાદના નુકસાન અંગે સહાયની પ્રક્રિયા
ગત 23 જુલાઈ 2026ના રોજ અમદાવાદમાં પડેલા અતિભારે વરસાદથી થયેલા નુકસાન અંગે સહાય મેળવવા માટે 30 સપ્ટેમ્બર સુધી અરજી કરવાની સમયમર્યાદા આપવામાં આવી હતી. આ મુદત સુધીમાં અમદાવાદ શહેરમાંથી અંદાજે 75 અરજીઓ કોર્પોરેશનને પ્રાપ્ત થઈ છે. હાલમાં મામલતદાર સહિતના સંબંધિત અધિકારીઓની ટીમ દ્વારા આ અરજીઓની ચકાસણીની કામગીરી ચાલી રહી છે. રજૂ થયેલા પુરાવાઓની ખરાઈ થયા બાદ નુકસાનના આધારે રાહત આપવા અંગેનો અંતિમ નિર્ણય લેવાશે.
સી.જી. રોડ સ્માર્ટ પાર્કિંગ: એક સપ્તાહમાં 36 હજારની આવક
અમદાવાદને સ્માર્ટ સિટી તરીકે વિકસાવવાના ભાગરૂપે સી.જી. રોડ પર સ્માર્ટ પાર્કિંગની વ્યવસ્થા અમલમાં મૂકવામાં આવી છે. આ સ્માર્ટ પાર્કિંગ વ્યવસ્થા દ્વારા માત્ર એક જ સપ્તાહમાં અંદાજે રૂ. 36,000ની આવક પ્રાપ્ત થઈ છે. જોકે, હજુ પણ કેટલાક નાગરિકો ઓનલાઇન પાર્કિંગની પ્રક્રિયાથી પૂરેપૂરા પરિચિત ન હોવાથી યોગ્ય રીતે વાહનો પાર્ક કરતા નથી, જેના કારણે ટ્રાફિકની સમસ્યા સર્જાય છે. આ સમસ્યા નિવારવા માટે નાગરિકોને પાર્કિંગ પ્રક્રિયા અને પેમેન્ટની રીત સરળતાથી સમજાય તે માટે પાર્કિંગ સ્થળોની આસપાસ માર્ગદર્શક અને સૂચનાત્મક બોર્ડ લગાવવા સંબંધિત વિભાગને સૂચના આપવામાં આવી છે.