Ahmedabad: અમદાવાદ મ્યુનિસિપલ કોર્પોરેશન (AMC)ની સાપ્તાહિક સ્ટેન્ડીંગ કમિટીનું દર ગુરુવારે આયોજન કરવામાં આવતું હોય છે, જે અંતર્ગત આજે મળેલી સ્ટેન્ડિંગ કમિટીમાં અમદાવાદ શહેરના રૂ. 2500 કરોડના વિકાસના કામોને મંજૂરી આપવામાં આવી છે, જે પૈકી રૂ. 600 કરોડના કામ માત્ર રોડ પ્રોજેક્ટના જ છે.
આ અંગે વિગતો આપતા સ્ટેન્ડિંગ કમિટીના ચેરમેન દેવાંગ દાણીએ જણાવ્યું કે, આગામી સમયમાં 2030 કોમનવેલ્થ ગેમ્સ આવી રહી છે, ત્યારે સારા ઈન્ફ્રાસ્ટ્રક્ચરના કામો ઝડપી થાય તે પ્રકારે સ્ટેન્ડિંગ કમિટીની અંદર ઈન્ફ્રાસ્ટ્રક્ચરને વેગ અપાવતા કામોને મંજૂરી આપવામાં આવી છે.
આ પણ વાંચો
સાઉથ બોપલમાં લોટસ ગાર્ડન બનાવવામાં આવશે (Lotus Garden)
આ સિવાય ગુજરાત યુનિવર્સિટી તેમજ એલ.ડી એન્જિનિયરીંગ સહિતના વિવિધ ભવનો, હેરિટેજ ઈમારત, મંદિરને વધુ સારી રીતે વિકસાવવા રૂ.250 કરોડના કામોને મંજૂરી આપવામાં આવી છે. અમદાવાદમાં કાંકરિયા અને વસ્ત્રાપુર લેક છે, એવી રીતે સાઉથ બોપલની અંદર લોટસ ગાર્ડન બનાવવામાં આવશે. જેમાં ભારતના દરેક રાજ્યના ફૂલોની પ્રતિકૃતિ જોવા મળશે. આમ લોકોનો હેપ્પીનેસ ઈન્ડેક્સ વધે એ રીતે લોટસ ગાર્ડન બનાવવામાં આવશે.
વધુમાં તેમણે જણાવ્યું હતું કે, અમદાવાદ મ્યુનિસિપલ કોર્પોરેશનની જે CCRS કમ્પલેઈન્ટ સેવા એપ છે, જેની ઉપર નગરજનો 155303 નંબર દ્વારા ફરિયાદ કરતા હોય છે. તેને આધુનિક રીતે વિકસિત કરવામાં આવશે, અમદાવાદ મહાનગરપાલિકા દેશની પહેલી મહાનગરપાલિકા બનશે જેની એપ AI આધારિત હશે.
પહેલાના સમયમાં કમ્પલેઈન ક્લોઝ થઈ જતી હતી, તેના બદલે પહેલા અને પછી એટલે કે, કામ થયા પહેલા અને પછીનો ફોટો અપલોડ થશે. આજની સ્ટેન્ડિંગ કમિટીમાં AI આધારિત CCRSના કામને મંજૂરી આપવામાં આવી છે.
આ સિવાય શહેરમાં જંક્શનના વિકાસની વાત કરતા ચેરમેને જણાવ્યું હતું કે, અગાઉ 100 જંક્શનના કામને મંજૂરી આપવામાં આવી હતી. હવે બીજા 25 જંક્શનને ડેવલોપ કરવામાં આવશે. આમ શહેરના અલગ-અલગ વોર્ડમાં હોલ, UHC, બ્રિજ, ફૂટપાથ સહિતના વિવિધ રૂ.2500 કરોડ કરતા વધુ કામોને સ્ટેન્ડિંગ કમિટીમાં મંજૂરી આપવામાં આવી છે. તેના પરિણામે, શહેરની વિકાસની ગતિશીલતમાં વધારો થશે.